Kún tártibinde – kelisim jobasy

Taıaýda Mınskide Eýrazııalyq ekonomıkalyq komıssııa Keńesiniń otyrysy ótti. Oǵan qazaqstandyq delegasııany Premer-Mınıstrdiń birinshi orynbasary Baqytjan Saǵyntaev bastap bardy, dep habarlady Premer-Mınıstrdiń baspasóz qyzmeti. Kún tártibindegi eń negizgi másele Eýrazııalyq ekonomıkalyq odaq týraly kelisimniń jobasyn daıyndaý máselesin talqylaý boldy. Memleket basshylarynyń tapsyrmasy boıynsha kelisimdegi bizdiń áriptes eldermen birlesken qyzmetimizdiń sheshýshi sátteri, sondaı-aq, memleketterdiń ózara tıimdi múddelerin qanaǵattandyrýǵa jáne ıntegrasııany odan  ári damytýǵa baǵyttalǵan erejeler qarastyrylýda, dedi otyrys qorytyndysynda B.Saǵyntaev. Atap aıtqanda, taraptar saýda saıasaty, tehnıkalyq retteý, sanıtarlyq-fıtosanıtarlyq sharalar salalaryn qarastyrdy. Sondaı-aq, basqosýda qarjy rynogyn damytýdyń kókeıkesti baǵyttary, Keden odaǵy men Birtutas ekonomıkalyq keńistikke múshe memleketterdiń ónerkásip jáne agroónerkásip kesheni salalaryndaǵy ózara is-qımylyn tereńdetý máseleleri talqylandy. Bútindeı alǵanda, biz Keden odaǵy men Birtutas ekonomıkalyq keńistik sheńberinde alǵa qoıylǵan maqsattarǵa qol jetkizýde ilgeri qaraı úlken qadam jasadyq, dep atap ótti B.Saǵyntaev. Osy kúni, EEK Keńesi otyrysyna qatysý sheńberinde Premer-Mınıstrdiń birinshi orynbasary Baqytjan Saǵyntaev Keden odaǵyna múshe memleketter delegasııalary basshylarymen birge Belarýs Respýblıkasynyń Prezıdenti Aleksandr Lýkashenkomen bolǵan kezdesýge qatysty. Kezdesýde Eýrazııalyq ekonomıkalyq komıssııa Keńesiniń kún tártibi talqylanyp, sonymen birge, Keden odaǵy men Birtutas eko­nomıkalyq keńistik sheńberindegi eko­no­­mıkalyq ıntegrasııa jáne ózara is-qı­myldardyń kókeıkesti máseleleri boıynsha pikir almasyldy.