Sapaǵa mán bergen utymdy

Qazaqstan Parlamenti Májilisiniń depýtaty, «Nur Otan» partııasy fraksııasynyń múshesi Qaıyrbek Súleımenovtiń tóraǵalyǵymen Jemqorlyqqa qarsy respýblıkalyq qoǵamdyq keńestiń otyrysy ótti. Otyrys barysynda memlekettik organdar tarapynan Keńes usy­nym­darynyń oryndalýy talqylandy. Máselen, 2013 jyly elimizdiń Tóten­she jaǵdaılar mınıstrligine sot sheshimderi men úkimderin oryndaý boıynsha, sondaı-aq, Qostanaı jáne Qaraǵandy oblystarynda jemqorlyqpen kúres jónindegi «Nur Otan» partııasynyń baǵdarlamasyn oryndaý boıynsha usynymdar berilgen bolatyn. Máselen, Tóten­she jaǵdaılar mınıstrligine 2013 jyldyń 25 qańtarynda 12 is-sharany júzege asyrý, sondaı-aq, ol sharalardyń oryndalýy jóninde 2013 jyldyń 1 jartyjyldyǵynda aqparat berý tapsyrylsa, Bas prokýratýra men Ádilet jáne Qarjy mınıstrlikteriniń árqaısysyna 1 usynymdar berilipti. Sondaı-aq, 2013 jyldyń 31 mamyrynda sot sheshimderiniń oryndalý úderisi kezindegi sybaılas jemqorlyqtyń aldyn alý baǵytyndaǵy Ádilet jáne Ishki ister mınıstrlikterine – 12, Úkimetke – 5, Bas prokýratýraǵa 1 usynym berilipti. Qostanaı jáne Qaraǵandy oblystary da mundaı usynymdardan syrt qalmapty. Máselen, 2013 jyldyń 2 sáýirinde Qostanaı oblysynda «Nur Otan» partııasynyń sybaılas jemqorlyqpen kúres jónindegi baǵdarlamasyn oryndaý maqsatynda oblystyq fılıaldyń tóraǵasyna – 10, sondaı-aq, 2013 jyldyń 30 qyrkúıeginde osy baǵdarlamanyń Qaraǵandy oblysynda oryndalýyna qatysty atalǵan óńirdegi oblystyq fılıaldyń tóraǵasyna 9 is-sharany júzege asyrý tapsyrylǵan eken. Jıynda osy máseleler boıynsha sóz alǵan JQRQK múshesi Dýlat Qusdáýletov Keńes usynymdarynyń basym kópshiligi ýaqtyly jáne sapaly oryndalyp jatqanyn málimdedi. «Usynymdardy oryndaý maqsatynda Tótenshe jaǵdaılar mınıstrligi janynan Qoǵamdyq keńes qurylǵan. Ortalyqta jáne jergilikti oryn­dardaǵy partııanyń Qoǵamdyq qabyl­daý bólmelerinde azamattardy qabyldaý júrgizilýde. 2013 jyldyń 1 toqsanynda jemqorlyqqa jol ashatyn sebepterge taldaý júrgizilip, jeke quram arasynda olardy azaıtý jóninde keshendik sharalar ázirlendi, jemqorlyq zań buzýshylyq jasaǵan laýazymdy tulǵalar úshin qyzmetten bosatýǵa deıin talap kúsheıtildi», dedi Dýlat Qusdáýletov. Onyń keltirgen málimetine súıen­sek, Tótenshe jaǵdaılar mınıs­tr­liginde túgendeý, tizimge alý júr­gizilip, ruqsat qujattaryn berý tár­tibin retteıtin normatıvtik quqyqtyq aktiler qaıta qaralǵan. Nátıjesinde ruqsat etý sharalary­nyń sany 86 paıyzǵa (177-den 26-ǵa deıin), onyń ishinde órt qaýipsizdigi salasynda 78 paıyzǵa (74-ten 16-ǵa deıin) qysqaryp, 5 shara boıynsha eskertý tártibi belgilenipti. Sondaı-aq, Tótenshe jaǵdaılar mınıstrligi Úkimettiń 4 qaýlysynda zańnamaǵa qarama-qaıshy keletin normalardy anyqtap, búgingi tańda ondaı kedergilerdi alyp tastaý sharalary qolǵa alynyp jatqan kórinedi. Jıynǵa qatysýshylar, sondaı-aq, «Jumyspen qamtý-2020» baǵdarlamasynyń durys júzege asyrylmaýyna, qarjylyq tártipti buzǵan jáne bıýdjet qarjysynyń durys ıgerilmeýine sebepker bolǵan birqatar azamattardyń tártiptik jaýapkershilikke tartylǵanyn atap óte kele, bul baǵyttaǵy sharalardyń budan keıin de jalǵasatynyna toqtaldy. Máselen, Keńes múshe­leriniń aıtýynsha, sybaılas jem­qorlyq áreketteri jıi kezdesýi múmkin dep boljanǵan uıymdar men mekemelerde partııalyq baqylaýdyń 18 bólimshesi qurylypty. Talqylaýlardyń nátıjeleri boıynsha Jemqorlyqqa qarsy respýblıkalyq qoǵamdyq keńestiń qaýlysy qabyldanyp, onda mem­lekettik organdarǵa Qaraǵandy, Qos­tanaı oblystary ákimdikterine naqty usynymdar, sondaı-aq, jemqorlyqqa qarsy is-qımyl boıynsha qoldanylatyn sharalardyń sapasy men tıimdiligin arttyrý baǵy­tynda «Nur Otan» partııasynyń aımaqtyq fılıaldary janyndaǵy keńesterge tapsyrmalar berildi. Láıla EDILQYZY, «Egemen Qazaqstan».