Úshjaqty komıssııa otyrysy

Keshe Premer-Mınıstrdiń birinshi orynbasary Baqytjan Saǵyntaevtyń tóraǵalyǵymen áleýmettik áriptestik pen áleýmettik jáne eńbek qatynastary boıynsha Respýblıkalyq úshjaqty komıssııanyń kezekti otyrysy boldy, dep habar­lady Premer-Mınıstrdiń baspasóz qyzmeti. Kún tártibiniń negizgi taqyry­by eńbek kıkiljińderiniń aldyn alý men saqtandyrý máselelerin talqylaý boldy. Bul másele boıynsha Eńbek jáne halyqty áleý­mettik qorǵaý mınıstri Tama­ra Dúısenova, Kásipodaqtar fe­derasııasynyń tóraǵasy Ábilǵazy Qusaıynov, ortalyq memlekettik organdar men oblys ákimdikteri basshylary sóıledi. «Memleket basshysy taıaýda ótken Úkimettiń keńeıtilgen otyrysynda álemdik ekonomıkaǵa qaraı baǵyt alý aǵymyn jáne ishki jaǵdaılardy esepke alyp, elimizde makroekonomıkalyq jáne áleýmettik turaqtylyqty saqtaý boıynsha saqtandyrý sharalaryn júzege asyrý mindetin qoıdy», dedi B.Saǵyntaev keńesti asha otyryp. О́z kezeginde, B.Saǵyntaev bıýd­jetten tólenetin áleý­met­tik járdemaqylar men tólem­der­diń ósirilýi ǵana emes, kvazı­mem­lekettik jáne jeke menshik sek­­torlar jumyskerleriniń eńbek­aqylarynyń arttyrylýy da qa­rastyrylatynyn atap ótti. «Prezıdent iri taý-ken jáne metallýrgııalyq kásiporyndar, munaı-gaz jáne ulttyq kompanııa­lar basshylaryna óndirispen aı­nalysatyn jumyskerlerdiń jala­qysyn 10 paıyzǵa kóterý jó­ninde úndeý tastady. Biz úshjaqty komıssııa retin­de Memleket basshysynyń bul bastamasyn júzege asyrýǵa óz úlesimizdi qosýymyz kerek», dedi birinshi vıse-premer. Tamara Dúısenova keltirgen derekke qaraǵanda, búgingi kúnge elimizde eńbekaqy boıynsha qa­ryz ótken jylǵy sáıkes mer­zim­men salystyrǵanda, 27 paıyzǵa kemigen, óndiriste jazataıym jaǵdaıǵa ushyraý sany azaıǵany baıqalady. Úkimet basshysynyń birinshi orynbasary B.Saǵyntaev ótken jyldyń basynan beri týyndaǵan eńbek kıkiljińderiniń jartysyna jýyǵy eńbekaqyny ýaqytynda tólemeý sebebinen bolǵanyn atap kórsetti. «Búgingi kúnge eńbek daý­lary­nyń aldyn alý men odan saqtandyrý tetikteriniń oıda­ǵy­daı jetilmeýi, áleýmettik-eńbek kıkiljińderin arandatýdyń qu­qyqtyq jaýapkershiliginiń tó­mendigi problemalary áli de qalyp otyr», – dep atap ótti B.Sa­ǵyntaev. Oryn alyp otyrǵan prob­lemalardy sheshý maqsatynda ká­sip­odaqtar qyzmetin jaqsartýǵa, áleýmettik-eńbek kıkiljińderin sheshý men áleýmettik shıele­nis­terden saqtandyrý boıynsha keshendi jospardy júzege asy­rýǵa baǵyttalǵan, «Kásiptik odaq­tar týraly» Zańnyń jobasy daıyndaldy. Otyrys qorytyndysy boıynsha B.Saǵyntaev boryshtardy óteý jáne tutastaı al­ǵanda, eń­bek­aqy tóleý máse­le­­lerin she­shý boıynsha ju­mys­ty jandan­dyrýdy tapsyrdy. Oblys ákimdikterine óńirlerdegi jaǵdaılarǵa ashyq ta turaqty monıtorıng uıym­das­tyrýdy, yqtımal degen eńbek kıkiljińderiniń ýaqytynda aldyn alý sharalaryn qabyldaýdy tapsyrdy.