Bıyl EXPO-2017 kórmesiniń qurylysy bastalady

Álem kóz tikken EXPO-2017 kórmesiniń qurylysy Astanada sáýir aıynda bastalady. Bul týraly «Qazaqstan» telearnasy habarlady. EXPO nysanynyń jalpy aýmaǵy - 173,4 gektar. Bul aýmaqta 24 000 sharshy metrdi quraıtyn  kópqabatty úıler salynady. Al 148 gektar  jerge áleýmettik-mádenı, bilim jáne ǵylym, densaýlyq saqtaý nysandary, saýda jáne oıyn-saýyq ortalyqtary men saıabaqtar boı kóteredi. Taǵy bir atap óterimiz, úsh aıǵa sozylatyn  kórmege 5 mln.-ǵa jýyq saıahatshy keledi dep kútilýde. Al keler jyly bas shaharda uzyndyǵy 21,5 shaqyrym jylý magıstrali tartylady. Ol qalanyń soltústik-batysyn, ońtústik-batysyn jáne EXPO-2017 alańyn jylýmen qamtamasyz etetin bolady. Álemniń aldyńǵy qatarly memleketteri ǵylymdaǵy ozyq jańalyqtaryn usynatyn osy sharanyń mańyzy orasan. Naqtyraq aıtqanda, balamaly qýat kózderin tıimdi paıdalaný máselesi basty taqyryp bolǵaly otyr. Onyń mańyzy týraly osynyń aldynda Astanada «Bolashaq energııasy. Ǵalamshardyń turaqty damýy» atty halyqaralyq sımpozıým ótkizildi. Osy jıynǵa 160 eldiń 150-ge jýyq delegattary qatysty. Sonda birqatar mamandar energetıka salasynyń  qýattylyǵyn arttyrý balamaly qýat kózderimen tikeleı baılanysty ekenin joqqa shyǵarmady. Endeshe, aldaǵy ýaqytta ótkiziletin bul jıynnyń  Astanada ótkizilýiniń ózindik máni bar. Ámirhan Almaǵanbetov. Derekkóz: «Qazaqstan» telearnasy. Foto: «Qazaqstan» telearnasy.