Birligi jarasqan elmiz

Shymyldyǵy shyraıly shy­ǵys­ta, asqaraly Altaı óńirinde túri­lip, odan ári qasıetti Áýlıeata jerinde jalǵasqan «Máńgilik El» ulttyq ıdeıasyn qoldaýǵa arnalǵan patrıottyq aksııa Maǵjan eline jetti. Qazaqstan halqy Assam­bleıa­synyń qoldaýymen uıymdas­tyrylǵan aıtýly shara M.Qozy­baev atyndaǵy Soltústik Qazaq­stan memlekettik ýnıversıtetinde jalaýyn jelbiretip, Elbasymyz dástúrli Joldaýynda belgi­lep bergen ultty uıys­ty­ryp, uly maqsattarǵa jete­leı­tin, ultymyzdyń uly baǵ­da­ry – «Qa­zaqstan-2050» Strate­gııa­synyń túp qazyǵy ispetti Máńgilik El ıdeıasy tatýlyq, dostyq, birlik se­k­ildi asyl qundylyqtarymyz­dy ás­petteýmen, ardaqtaýmen ózgeshe jarasym, keremet úılesim tapty. Eńbek ujymdarynyń, úkimettik emes uıymdardyń, etnomádenı birlestikter, jastar ókilderiniń, ardagerlerdiń belsene qatysýymen ótken aksııa barysynda Memleket basshysynyń búkilhalyqtyq qoldaýǵa ıe bolǵan turmysy ba­qýatty, tútini túzý ushqan, erteńine senimmen qaraıtyn ba­qytty el bolý zańǵaryna jeteleıtin qaǵıdattary men talaptary ata-babalarymyzdyń san myń jyldan beri ańsaǵan asyl armanynyń shynaıy kelbetin tanytqandaı. Alqaly forýmdy oblys áki­mi Samat Eskendirov ashyp, Pre­zı­denttiń syndarly da baıypty saıasatynyń arqasynda egemendi damýdyń 22 jylynda barsha qa­zaq­standyqtardy biriktiretin, or­taq maqsatqa judyryqtaı ju­myldyratyn arqaýly qun­dylyqtar qalyptasqanyn, osy­nyń arqasynda áleýmettik-eko­no­mıkalyq jetis­terimizdiń, tabystarymyzdyń ny­ǵaıa túskenin jetkizdi. Endigi maq­sat, Joldaýda atap ótilgendeı, bar­lyq kúsh-jigerimizdi jumsaı otyryp, «2050» Strategııasynyń basty talaptaryn júzege asyrý bolyp tabylady. Elbasy jastarǵa arnaǵan sózinde «ony júzege asyratyn da, jemisin kóretin de sizder. Eldiń bolashaǵyn barsha halyqpen birge jasańyzdar!» degen mindet qoıdy. Olaı bolsa, Máńgilik El bolý óz qolymyzda. Otanymyz – bireý. Qoǵamymyzdaǵy ulttyq birlik, beıbitshilik pen kelisim Qazaqstannyń bolashaǵyn baıandy etýge arnalǵan. Qazaqstan halqy Assambleıasy Tóra­ǵasynyń orynbasary – Hat­­shylyq meńgerýshisi Era­ly Toǵ­janov óz sózine «Qazaq­stan-2050» – Elbasy negizin salyp bergen Máńgilik Elge bastaıtyn abyroı­ly da mártebeli joldyń armannan aqıqatqa aınalǵanyn arqaý ete kelip, Assambleıanyń HH ses­sııasy «bir el, bir halyq, bir taǵ­dyr» uranymen ótkenin, tarıh­tyń, mádenıettiń, tildiń ortaq­tyǵy joǵary rýhanııatty, zaıyrly memleket qurýǵa keń jol ashqanyn eske saldy. Odan ári Táýelsizdigimizdiń negizgi aıshyqty belgileriniń biregeıi sanalatyn jańa elordamyzdyń turǵyzylyp, az ǵana ýaqyttyń ishinde tórtkúl dúnıe tórinen oıyp turyp oryn alǵanyn maqtanyshpen jetkizdi. SQMÝ stýdenti Asqar Baı­mu­qanovtyń jigerli sózderi de ár júrekti tolqytyp, úlken oı sal­ǵany anyq. Ol óz sózin «Elba­symyzdyń senimin úzdik oqýmen, jasampaz eńbekpen aqtaıyq!» degen kóterińki leppen aıaqtasa, oblystyq assambleıa janyndaǵy «Birlik» jas­tar qoǵamdyq bir­lestiginiń lı­deri Naıra Zargarıan máńgilik táýel­sizdigimizdi kózdiń qarashyǵyndaı saqtaı bi­lý­ge úndedi. «Dıplommen – aýyl­ǵa!» baǵdarlamasy arqyly ju­mys­qa ornalasý múmkindigine ıe bolǵan dıplomdy maman Álııa Shıro­jeeva jastardyń ozyq jo­ba­larǵa qatysýy jaıly oı qoz­ǵa­dy. Petropavl áskerı ınstıtý­tynyń kýrsanty Murat Erzat bos­tan­dyq, azattyqty qansha ań­sa­­sa da jete almaı ketken ata-baba­­­la­rymyzdyń asyl murat, ıgi tilegi oryndalǵanyn, ult retinde tutas­tyǵymyzdy saqtaýdyń joly ótkennen taǵy­lym ala otyryp, kele­shekke senim­men qaraý ekenin tilge tıek etti. Basqa da sóıleýshiler «Máń­gi­lik El» patrıottyq aktisi birlikke, patrıotızm men yntymaqqa jete­leıtinin atap kórsetti. Aksııa sheńberinde «Máńgilik El» ıdeıasyna qatysty tilek­ter ja­­zylǵan kitapqa soltústik­qa­zaq­stan­­dyqtar da ystyq yqylasty lebiz­deri men qoltańbalaryn qal­dyrdy. Saltanatty shara án men bılerge jalǵasyp, kesh shyraıyn asha tústi. Onyń sońy memlekettik Ánurannyń oryndalýymen túıin­deldi. «Máńgilik El» ıdeıasyn qol­daý­ǵa arnalǵan patrıottyq aksııa­nyń kezekti estafetasyn Qyzyl­orda men Pavlodar oblystary qabyldap aldy. О́mir ESQALI, «Egemen Qazaqstan». Soltústik Qazaqstan oblysy. –––––––––––––––– Sýretti túsirgen Amangeldi BEKMURATOV.