Kóne qala jańa kelbetke enbek

Túrkistanǵa joly túsken jandar Qoja Ahmet Iаsaýı babamyzdyń basyna baryp, rýhyna táý etip ketkendi jón kóredi. Er Túriktiń besigi Túrkistanǵa ótken jyly 701 myńnan astam týrıst kelipti. Iаǵnı, arǵy jylmen salystyrǵanda kıeli qalaǵa qydyryp kelýshilerdiń sany 15 paıyzǵa artqan degen sóz. Bul, árıne, Túrkistanda týrızmniń tútini túzý ushyp, qala kórkeıip, qyzmet kórsetý deńgeıi jyl sanap damyp kele jatqanyn bildirse kerek. Qalanyń kórkeıip, túrlenip kele jatqanyn mundaǵy qury­lys­tyń qarqynyna qarap ta bilý­ge bolady. Týrızmdi damytý maq­satynda munda qolóner orta­lyǵynyń qurylysy júrgizilip, is­ke qosylǵan. Budan bólek, 200 orynǵa arnalǵan týrısterge qyz­met kórsetý ortalyǵy salynýda. О́t­ken jyly bul óńirde 3 mektep ǵımaraty salynyp, 28 mekeme­ge kúrdeli jáne aǵymdaǵy jón­deý júrgizilipti. «Balapan» baǵdar­lamasynyń aıasynda 5 balabaqsha paı­dalanýǵa berilip, qala boıyn­sha 3-6 jastaǵy balanyń 65,1 paıy­zy mektepke deıingi mekemelermen qamtylǵan. Ásirese, aýysymyna 500 adam qabyldaıtyn qalalyq emhana iske qosylǵany túrkistandyqtardy erekshe qýant­ty. Budan bólek 200 tósektik kóp beıindi balalar aýrýhanasynyń qurylysy júrgizilip, 3 eldi mekende feldsherlik-akýsherlik beket paıdalanýǵa berilgen. Jergilikti bıýdjet esebinen ortalyq kitaphana ǵımaraty salyndy. «О́ńirlerdi damytý» baǵdarlamasy boıynsha 10 aýyldyq klýb aǵymdaǵy jóndeýden ótken. Endi búginde oblys bıýdjetinen 260 mln. teńge bólinip «Jabyq júzý basseıniniń» qurylysy júrgizilýde jáne jeke ınvestorlar esebinen jalpy quny 222 mln. teńgeni quraıtyn sporttyq saýyqtyrý kesheni salynýda. Sondaı-aq, 80 páterli jáne 60 páterli 5 qabatty turǵyn úı qurylysynyń boı kóterip kele jatqany Alla buıyrtsa, al­daǵy ýaqytta bul qalada bir qaýym el qonys toı toılaıtynyn aıǵaqtap turǵandaı. «Turǵyn úıdi jańǵyrtý» baǵdarlamasy boıynsha 11 kópqabatty úılerge jóndeý jumystary júrgizilgen. Mine, osynaý qaptaǵan qu­ry­lys­tyń bári kóne Túrkistannyń jańa zamanǵa saı kelbetin, sáýletin jasap, ajaryn asha túsýde. Eń bas­tysy, halyqtyń ıgiligi úshin jasa­lyp jatqan bul tirlikterdiń qarqyny esh tolastamaıdy, jal­ǵasyn taba beredi. Oralhan DÁÝIT, «Egemen Qazaqstan». Ońtústik Qazaqstan oblysy.