Eldigi – birliginde, erligi – shejiresinde

«Nur Otan» partııasynyń basty ustanymy osy

«Nur Otan» partııasynyń Saıası doktrınasyn oqyǵan tusta, sóz joq, Qazaqstannyń HHI ǵasyrdaǵy murattary, memleket pen onyń azamattary arasyndaǵy ortaq maqsattarǵa negizdelgen unamdy da ońdy áreket-qımyldar, el damýyna qatysty basym baǵyttar men jańa qaǵıdattar keń oryn alǵanyn kóresiń. Jańa baǵyttar men ortaq qundylyqtarǵa, birlik pen qoǵamdyq kelisimge, áleýmettik saıa­sat pen zııatker ult murattaryna, rýhanııat pen mádenıet arnalaryna, eldik pen erlik shejirelerine kóp kóńil bólgenine kóz jetkizesiń. Ult pen tarıh aldyndaǵy jaýapkershilikke, adam men onyń bostandyǵyna, quqyqtyq erekshelikterine, ashyq qoǵam men básekege qabilettilikke, álemdik damý úderisterine aıryqsha nazar aýdarylǵanyn ańǵarasyń. Elimizdiń elýlikke enýi – Elbasy saıasatynyń, strategııalyq maqsatynyń berik te aıqyndyǵynyń jarqyn kórinisteriniń biri. Elbasynyń Qazaqstan halqyna Joldaýy men «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty keń kólemdi, tereń mazmundy eńbeginde «Qazaqstan-2050» Strategııasynda qalyptasqan memlekettiń jańa saıası baǵyty, el damýynyń bolashaǵy, maqsat-murattary jan-jaqty aıqyndaldy. Ult pen urpaq qamy, mádenı-rýhanı aspektiler, bilimı-ǵylymı arnalar, tálim-tárbıe taǵylymdary da negizgi nazarda boldy. Osy rette «Nur Otan» partııasy jańa Saıası doktrınasynyń basty baǵyttarynan Qazaqstannyń ekonomıkasy men saıası-áleýmettik júıesi keń kólemde oryn alǵan. El damýynyń órkendi óristeri, básekelestikke qabilettilik, áleýmettik baǵdarly memleket qurý máseleleri jan-jaqty qozǵalǵan. Bastysy, «Nur Otan» partııasynyń búkil halyqtyq mıssııasynda ulttyq murat-múdde basym baǵyttarǵa ıe bolyp, azamattyq qoǵam men zııatkerlik ulttyń belgi-erekshelikteri aıqyndalyp otyr. Adam ómiri men eńbegine, quqyqtary men bostandyqtaryna keń óris ashylyp, ult muraty, el tarıhy men damýynyń evolıýsııalyq joly, bolashaq baǵyt-baǵdarlary keńinen kórinis tapqan. «Nur Otan» partııasynyń jańa Saıası doktrınasy birneshe basym baǵyttardan turady («Nur Otan» partııasynyń HHI ǵasyrdaǵy mıssııa­sy»; «Bizdiń qundylyqtarymyz»; «Azamat jáne memleket: ózara is-qımyldyń jańa qaǵıdattary»; «Jańa baǵyttyń maqsattary: tabysty damýdyń jeti faktory»; «Partııanyń tarıhı jaýapkershiligi»). Onda, ásirese, Qazaqstandy órkendetý, Táýelsizdikti nyǵaıtý, Otanǵa súıispenshilik, ult tutastyǵy men qoǵamdyq kelisim, azamattardyń zııatkerlik jáne jasampazdyq áleýeti, otbasy jáne dástúr qundylyqtary keńinen sóz etiledi. Adam men onyń ómiri, quqyqtary men bostandyqtaryna zor mańyz beriledi. Azamattyq qoǵam, demokratııalyq dástúrler men mádenıettiń damýy jan-jaqty oryn alady. Áleýmettik saıasat, ekonomıkalyq damý, ınnovasııalyq baǵyttarǵa keń óris ashylady. Barlyq qazaqstandyqtardyń sapaly bilim alýy, medısınalyq qyzmet pen qoljetimdi turǵyn úı máseleleri de basty nazarda bolady. Ulttyq murat-múddege adaldyq, qorǵanys qabiletin nyǵaıtý, qaýipsizdikti qamtamasyz etý máseleleri de keńinen qozǵalady. Eldiń qoǵamdyq hám saıası baǵyty, áleýmettik arnalardyń órkendeýi men turaqtylyǵy basty nazarda bolady. Jahandaný jáne básekege qabilettilik baǵyttary da nazarda turady. Qoǵamdyq kelisim men ultaralyq tatýlyqqa, dostyq qarym-qatynasqa kóp kóńil bólinedi. Elbasy bastamalary men ustanymdary, Táýelsizdik tabıǵaty men taǵylymy, eldik múdde men dástúr qundylyqtary jan-jaqty qozǵalady. Bastysy, ult muraty men qundylyqtary, atap aıtqanda, adam men onyń eńbegi, ómiri men ónegesi keń oryn alady. Ol týraly: «Bizdiń mıssııamyz – damýdyń evolıýsııalyq jolyn qamtamasyz etý, sondaı-aq, órkendegen, básekege qabiletti ári áleýmettik baǵdarly memleketti qurý. Munda árbir maqsatker, eńbekqor jáne zań tártibin saqtaıtyn azamat tabysqa jetip, ózine de, qoǵamǵa da paıda keltiredi», dep atap kórsetedi. Doktrınada ult muraty men táýel­sizdik máselesine keń oryn beriledi.Ultqa adaldyq, Otanǵa súıispenshilik, eńbekke qyzyǵýshylyq pen turaqtylyq syndy qasterli uǵymdardyń syr-sıpattary ashylyp, mańyz-máni aıqyndalady. Ultqa qyzmet pen táýelsizdiktiń baıandylyǵy jolynda tabandy da turaqty eńbek etý – abyroıly da kádeli, saýapty isterdiń biri ekendigi basa kórsetiledi. Ultty qorǵaý men qalyptastyrý, Táýelsizdik jolyndaǵy ata-babalarymyzdyń naızanyń ushymen, bilektiń kúshimen kún-tún qatyp, jankeshti áreketterge barýy – eldik pen erliktiń úzdik úlgisi, ǵajaıyp ónegesi ekendigi negizgi nazarda turady. Oǵan tómendegishe túıin jasalady: «Táýelsizdik – elimizdiń basty qundylyǵy. Biz búgingi jetistikterimizdiń qaı-qaısysyna da Táýelsizdiktiń arqasynda qol jetkizdik. Sondyqtan, Táýelsizdik – biz úshin baǵa jetpes baılyq! Memleket pen qoǵamnyń bar kúsh-jigeri Táýelsizdikti nyǵaıtýǵa arnalýy tıis. Osy maqsat úshin qyzmet etý jáne memleketti qorǵaý – tarıhtyń, sondaı-aq, keleshek urpaq aldyndaǵy árqaısymyzdyń azamattyq paryzymyz. Muny jas urpaq árqashan jadynda tutqany abzal». Elorda men Elbasy, ulttyq rámizder men memlekettiń mindetti atrıbýttary da tıisinshe oryn alyp, oǵan degen jas urpaqtyń qurmeti men taǵzymy aıryqsha bolý qajettiligi jiti kórsetiledi. Eldik múdde men ulttyq qaýipsizdikti qorǵaý mıssııasy osy turǵydan unamdy kórinis tabady. Qazaq rýhanııaty men mádenıeti máselesi ulttyq qundylyqtardyń basym baǵyttaryn aıqyndaıdy. Ult tarıhynyń áýelgi bastaýlary men damý kezeńderiniń bári-bárinde rýhanııat órisi, mádenıet órnekteri kóptep kezdesedi. Rýhanııat qundylyqtary qalyptasyp, tarıh pen mádenıet, dástúr men sabaqtastyq, din men dil, bilim men ǵylym, tanym men til, t.t. júıeli damýy – memlekettilikti nyǵaıtý, táýelsizdikti baıandy etý, básekege qabilettilikti arttyrý isindegi aıryqsha faktorlardyń biri bolǵandyqtan, onyń mańyz-máni barynsha aıqyn kórsetilip, bederlenip beriledi. Tutastaı alǵanda, «Nur Otan»  par­­tııasy Qazaqstannyń damýy men ór­kendeý baǵyttaryn baıandy etýge, ha­lyqty birlik-berekege shaqyryp, ortaq maqsat jolynda eńbek etýge uıytqy bolyp kele jatqan birden-bir saıası kúsh retinde qoǵamda aıryqsha oryn alady. Raqymjan TURYSBEK, L.N.Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory.