Qazaqstan ınvestısııa úshin ashyq

Keshe Premer-Mınıstr Serik Ahmetov Syrtqy ister mınıstrliginde Qazaqstannyń shetelderdegi dıplomatııalyq ókildikteriniń basshylarymen shetel ınvestorlaryn tartý máselesi jóninde beıne konferensııa túrindegi keńes ótkizdi, dep habarlaıdy Premer-Mınıstrdiń baspasóz qyzmeti. Ústimizdegi jylǵy 14 aqpanda ótken Úkimettiń keńeıtilgen májilisinde Memleket basshysy naq osyndaı tapsyrma bergen bolatyn. Keńes jumysyn ashyp, Serik Ahmetov sóz sóıledi. «Qazirgi kezde ınvestısııa tartý jónindegi Keshendi jospar belgileý jáne ınves­torlar úshin jańa yntalandyrý sharalaryn jasaý úshin arnaıy komıssııa qurylýda» dedi ol óz sózinde. «Osy baǵytta qazaqstandyq elshilikterge belsendi jumys júrgizýge týra keledi jáne biz sizderden naqty nátıjeler  kútemiz» dedi dıplomattarǵa arnaǵan sózinde Premer-Mınıstr. Odan ári Úkimet basshysy Qazaqstan ınvestısııa úshin árqashan ashyq ekendigin atap kórsetti. «Biz ınves­torlar úshin barlyq qolaıly jaǵdaıdy jasaımyz. El Prezıdentiniń naqty tapsyrmasy bar: ınvestorlar úshin ashyq erejeler jasaý kerek. Keden odaǵy jáne Biryńǵaı ekonomıkalyq keńistikte bizdiń eldiń salyq tóleý tártibi eń tıimdi ekendigin eskertip, Qazaqstan ınvestorlar úshin paıdaly alań ekendigin atap kórsetemin» dedi S.Ahmetov. Keńeste Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev, birqatar dıplomatııalyq ókildikterdiń basshylary sóz sóıledi. Keńes qorytyndysynda S.Ahmetov Syrtqy ister mınıstrligine, dıplo­ma­tııa­lyq ókildikterdiń basshylaryna iri kompanııalardyń, transulttyq korporasııalardyń basshylarymen kezdesýler ótkizýdi tapsyrdy. «Biz qandaı salalarda áriptestik jasaıtynymyzdy naqty bilýimiz kerek. Ústimizdegi jyldyń 10 naýryzyna deıin Qazaqstanda jumys isteýge nıet bildirgen áleýetti ınvestorlardyń tizimi jasalýy kerek» dedi Premer-Mınıstr. Buǵan qosa, Úkimet basshysy shetel ınvestorlarynyń qazaqstandyq seriktesterimen kezdesýin uıymdastyrý jóninde tapsyrma berdi. «Bul jumysqa barlyq salalyq memlekettik organdar, holdıngter, ulttyq kompanııalar jáne JZQ qatysýy kerek. Osy kezdesýlerdiń nátıjesinde naqty kelisimder jasalýy qajet», dep atap kórsetti Úkimet basshysy. Sonymen birge, Premer-Mınıstr ókiletti memlekettik organdarǵa, ulttyq kompanııalarǵa «Qazaqstandyq ónimderdi eksportqa shyǵarýdy yntalandyrý maqsatyndaǵy naqty saýda mıssııalaryn uıymdastyrý Josparyn belgileý» máselesin tapsyrdy.