Kodeksti jetildirý – ýaqyt talaby

Keshe Almatyda «Jańa Qylmystyq is júrgizý kodeksi jáne qylmystyq sot isin júrgizýdi jańǵyrtýdyń negizgi baǵyttary» degen taqyrypta ǵylymı-praktıkalyq konferensııa óz jumysyn bastady. Dóńgelek ústeldi kirispe sózben ashqan Qazaqstan Respýblıkasy Konstıtýsııalyq keńesiniń tóraǵasy Igor Rogov atalmysh konferensııa taqyrybynyń mańyzdylyǵyn eskere otyryp, oǵan qatysýshylardyń jumysyna sáttilik tiledi. Odan keıin sóz alǵan Qazaqstan Respýblıkasy Joǵarǵy sotynyń tóraǵasy Qaırat Mámı Elbasy tapsyrmasymen daıyndalǵan jańa Qylmystyq is júrgizý kodeksiniń jobasy tek qana zańgerler men sarapshylar tarapynan ǵana emes, sondaı-aq jalpy qoǵam tarapynan da keńinen talqylaýǵa ushyraǵan qujat ekenin tilge tıek etti. Sondaı-aq, konferensııada sóz alǵan Qazaqstan Respýblıkasy Prezıdent Ákimshiliginiń quqyq qorǵaý júıeleri bóliminiń meńgerýshisi Alık Shpekbaev, Eýropalyq Keńestiń Venesıandyq komıssııasynyń azamattyq bóliminiń basshysy Sergeı Kýznesov, EQYU-nyń Astanadaǵy ortalyǵynyń basshysy Natalıa Zarýdnaıa, «Adam quqyqtary hartııasy» qoǵamdyq qorynyń atqarýshy dırektory Jemis Turmaǵambetova konferensııa barysynda quqyqtyq tetikterdi jetildirý máseleleri boıynsha belsendi pikir-talastar bolatynyna senim bildirdi. – О́zderińiz bilesizder sońǵy úsh jyl boıy bizdiń mem­le­keti­mizde Qylmystyq is júrgizý kodeksiniń jańa jobasyn jasaý boıynsha biraz jumystar atqaryldy, – dedi Qazaqstan Respýblıkasy Bas prokýrorynyń birinshi orynbasary Iogan Merkel, – ótken jyly bul zań jobasy parlamentke usynylyp, halyq qalaýlylary ony birinshi oqylymda maquldady. Degenmen, keıbir máseleler boıynsha ekinshi oqylymnyń talqylaýlary júrip jatyr. Al búgin óz jumysyn bastaǵan konferensııaǵa biz zańgerlerdi, depýtattardy, úkimettik emes uıymdar músheleri men birge halyqaralyq sarapshylardy da shaqyryp otyrmyz. Talqylanyp otyrǵan máselede shetel sarapshylarynyń da oı-pikirlerin bilsek degen nıetimiz bar... Sharafaddın ÁMIROV, «Egemen Qazaqstan». ALMATY.