Jobany júzege asyrý úshin Qaz Carbon kompanııasy óziniń jekemenshik qarajatynan 11 mlrd teńge jumsady. Al negizgi ınvestısııa kózi «Qazaqstannyń damý banki» AQ tarapynan bolǵan. Bank atalǵan jobaǵa 38,8 mlrd teńge qarjy salǵan. Al «KazakhExport» ESK» AQ jańa kásiporynnyń eksporttyq baǵdarlanýyn eskere otyryp, osy qarjylandyrý boıynsha kredıttik táýekelderdiń jaýapkershiligin óziniń moınyna aldy.
Ferroqorytpa zaýytynyń qurylysy 2020 jyldyń jeltoqsan aıynda bastaldy. Tamyz aıynda alǵashqy rýdotermııalyq ferroqorytpa peshi iske qosyldy. Qazirdiń ózinde 3 myń tonnadan astam otandyq sılıkomarganes óndirilgen. Kásiporynnyń alǵa qoıǵan maqsaty – eksport kólemin arttyrý. Alǵashqy ónim Japonııa, Ońtústik Koreıa, Eýroodaq jáne TMD elderine jóneltile bastady.
О́ndiristik úderis tolyǵymen avtomattandyrylǵan. Peshter úsh saǵat ishinde qorytpalardyń bir túrinen ekinshisine ózdiginen aýysa alady. Kásiporyn Qaraǵandy óńiriniń shıkizatyn qaıta óńdeýge jobalanǵanyn da aıta ketken lázim. Bul úzdiksiz óndiristik sıkldy qamtamasyz etýge jáne álemdik naryqtarǵa sapaly ónim shyǵarýǵa múmkindik beredi.
Jańa zaýyttyń ashylý saltanatynda Qaraǵandy oblysynyń ákimi Jeńis Qasymbek Qaz Carbon kompanııasynyń iri ınvestısııalyq jobalardy iske asyrýda úlken tájirıbesi bar ekenin atap ótti.
– Mundaı jobany iske asyrý – Memleket basshysynyń ınvestısııalar tartý, óńdeý ónerkásibindegi eńbek ónimdiligin arttyrý jónindegi naqty tapsyrmalaryn oryndaýǵa tikeleı yqpalyn tıgizedi. Jańa zaýytta 300-den astam turaqty jumys orny ashyldy, – dedi óńir basshysy.
Jańa kásiporyn jylyna 57 myń tonna ferroqorytpa óndiretin bolady. Zaýyttaǵy árqaısysy 8 MVt bolatyn 8 pesh táýligine 25 tonna túrli ferroqorytpa ónimderin shyǵarýǵa qaýqarly. Birinshi kezeńde 4 pesh jumys isteı bastaıdy, qalǵan tórteýi jyl sońyna deıin paıdalanýǵa berilmek.
Qaz Carbon kompanııasynyń aksıoneri Erlan Nyǵmatýlın kásiporynda álemdik tehnologııalyq ázirlemeler qoldanylǵanyn jáne jańa jabdyqtar ornatylǵanyn aıtady.
– Bul óndiristiń ekologııalyq turǵyda taza ekenin aıtqym keledi, qorshaǵan ortaǵa tıgizer áseri barynsha az. Zaýytta aýany lastamaıtyn úsh satyly gaz tazalaý júıesi jumys isteıdi. Qaldyqtardy qaıta paıdalaný kózdelgen. Qaz Carbon jobasynyń jalpy somasy 50,7 mlrd teńgeni quraıdy, oǵan baıytý fabrıkasy, aglomerasııalyq fabrıkasy bar «Saryarqa» ferroqorytpa zaýyty jáne qoldanystaǵy óndiristi jańǵyrtý kiredi, – dedi aksıoner.
«Qazaqstannyń damý banki» AQ basqarma tóraǵasy Abaı Sarqulov Qaz Carbon ınnovasııalyq kásipornynda QDB-nyń strategııalyq baǵyttaryna – óńirdiń áleýmettik-ekonomıkalyq damýyna, ımportty almastyrýǵa, eksportqa baǵdarlanǵan strategııaǵa jáne álemdik naryqta qosylǵan quny joǵary básekege qabiletti ónimniń otandyq óndirisine zaýyt quryltaıshylarynyń tolyq kólemde sáıkes keletin biregeı ınjenerlik oıynyń iske asyrylǵanyn málim etti.
Jalpy, Qaz Carbon kompanııasy 2021 jyldyń sáýir aıynda jylyna 2 mln tonna kómir óndiretin baıytý fabrıkasyn iske qosqan bolatyn. Kompanııanyń kórme ortalyǵy salyndy. Osy jyldyń sońyna deıin qýaty jylyna 200 myń tonna aglomerasııalyq fabrıkany iske qosý josparlanýda.
Al kúni keshe ǵana paıdalanýǵa berilgen jańa zaýytty elimizdegi qolaıly ınvestısııalyq ahýaldyń kórsetkishi dep senimdi túrde aıtýǵa bolady. Iаǵnı bul jerde sheteldik ınvestorlar alańsyz jumys isteýge zańnamalyq baza múmkindik beredi jáne basqa da qolaıly jaǵdaılar jasalǵan. Munyń ózi Qazaqstannyń búginde ferroqorytpa naryǵyndaǵy bolashaǵy zor oıynshy ǵana emes, sonymen qatar qory mol myqty básekeles bolý faktoryna da tikeleı áser etedi.
QARAǴANDY
