Jańa zaýyttyń jańalyǵy

«Agran» JShS Aqtóbe fılıaly kópsalaly kásiporyn. Buǵan deıin munda metall jabyndylar shyǵaratyn óndiristik jeli paıdalanýǵa berilip, qazir qalypty jumys istep tur. Jaqynda taǵy bir shaǵyn zaýyt iske qosyldy. Bul kásiporyn jylýustaǵysh áınek paketterin shyǵarady. Joba ótken jyldyń aıaǵynda qolǵa alynǵan bolatyn. Qondyrǵylardy qysqa merzimde ornatqan seriktestik mamandary endi onyń ıgiligin kórmek. Munda float áınek paketterine jylýustaǵyshtyq qasıet berý úshin óndiris jaǵdaıynda pırolız ádisimen ystyq áınek beti juqa qabatta arnaıy metall totyǵymen jabylady. Mundaı jabyndy áınekpen bite qaınasyp oǵan aıryqsha tózimdilik beredi. Jylýustaǵysh áınek joǵary sáýle ótkizgishtik qasıetke ıe bolyp, kózge kádimgi áınekten aıyrmashylyǵy baıqalmaıdy. Áınek negizinen Reseıdiń jaqyn óńirlerinen jetkiziledi. Zaýyttyń negizgi tehnologııalyq qondyrǵylary áınek kesý, áınek paketteri óndirisiniń avtomatty jelilerinen jáne áınekti pysytý peshinen turady. О́ndiris PVH men alıýmınııden jylý-ustaǵysh terezeler óndirisi úshin qondyrǵylar shyǵaratyn dúnıe júzindegi iri óndirýshi bolyp tabylatyn Avstrııanyń joǵary tehnologııalyq qondyrǵysy «LISEC» avtomattandyrylǵan jelisine negizdelgen. Bir jáne eki kameraly, onyń ishinde jylýustaǵysh áınek pen ártúrli mólsherdegi áınek paketterin shyǵaratyn mundaı jeli oblysta ázirge bireý ǵana. Shaǵyn zaýytty salýǵa 150,0 mıllıon teńge qarjy jumsalǵan. Kásiporynnyń jyldyq qýaty jylyna 200,0 myń sharshy metr qýat únemdegish áınek paketterin shyǵarýǵa múmkindik beredi. Jańa ınnovasııalyq óndiristiń iske qosylýymen 25 jańa jumys orny ashyldy. Munda tolyqtaı jergilikti adamdar jumys isteıdi. Olardyń aldyńǵy legi Reseıde osy óndiristi ıgerýge mamandanyp, tájirıbeden ótip kelipti. Olar kásiporynǵa keıinirek ornalasqan jumysshylarǵa óz bilgenderin úıretip, jańa mamandyqqa qalyp­tasýǵa kómektesýde. Jańa qýat únemdegish áınek paketterin shyǵaratyn kásiporynnyń tusaýkeserine oblys ákiminiń birinshi orynbasary Nurmuhambet Ábdibekov qatysyp, óndiristik jelini saltanatty jaǵdaıda iske qosty. Satybaldy SÁÝIRBAI, «Egemen Qazaqstan». Aqtóbe oblysy. Sýretterdi túsirgen Haıredın RAÝShANOV.