Tekserý nátıjeleri boıynsha joldardy kútip ustaýǵa jaýapty 220 adam túrli ákimshilik jaýapkershilikke tartylǵan, onyń ishinde 21 aýyl jáne aýyldyq okrýg ákimi bar.
«Jalpy somasy 6 mıllıon teńgeden astam aıyppul salyndy. Máselen, avtojoldardy qanaǵattanarlyqsyz ustaǵany úshin QR ÁQBK 631-baby – «joldarda jumys júrgizý, joldar men jol qurylystaryn kútip ustaý erejelerin buzý» boıynsha «Qazaqavtojol» Pavlodar fılıalynyń dırektory ákimshilik jaýapkershilikke tartyldy», dedi Pavlodar oblysy PD ákimshilik polısııa basqarmasy bastyǵynyń mindetin atqarýshy Bákibaı Ahmedıanov.
Jol tóseminiń nashar bolýy da jol-kólik oqıǵalarynyń sebepteriniń biri bolýy múmkin. Polısııa departamenti jol-kólik oqıǵasynyń aldyn alý, óńir joldarynda jaraqattaný men ólim-jitim deńgeıin tómendetý maqsatynda turaqty negizde jalpyǵa ortaq paıdalanylatyn joldarǵa, onyń ishinde respýblıkalyq jáne jergilikti mańyzy bar joldarǵa tekserý júrgizedi.
«Temirjol ótkelderi de nazardan tys qalǵan joq. 190 temirjol ótpesi tekserilip, qajetti jol belgileriniń bolmaýy, durys jaryqtandyrylmaý sııaqty aqaýlar anyqtaldy. Tekserý nátıjeleri boıynsha 27 laýazymdy tulǵa temirjol ótkelderine jaýapsyz qaraǵany úshin ákimshilik jaýapkershilikke tartyldy. Aıyppuldardyń jalpy somasy 750 myńnan astam teńgeni qurady», dedi Bákibaı Ahmedıanov.
