As atasy

Nan – toqshylyq, barshylyq belgisi. Dastarqannyń tórinde turǵan nan, tipti, nannyń ıisiniń ózi adamnyń kóńilin hosh etedi emes pe? Osy aptada Shym-qala turǵyndarynyń dastarqany molshylyqqa, berekege kenele tústi. «Atameken korporasııasy» JShS-niń jer jyrtyp, egin egip, dıirmen tartýmen aınalysyp kele jatqanyna kóp jyldyń júzi boldy. Adal eńbekteriniń arqasynda eldiń alǵysyna bólengen bul serik­testik osy aptada nan zaýytyn iske qosyp, as atasynyń túr-túrin shyǵarýdy qolǵa aldy. Jobanyń quny 2,5 mln. AQSh dollaryn quraıdy jáne 50 ja­ńa jumys ornyn ashýǵa múmkin­dik berip otyr. Zaýyttaǵy bar­lyq qural-jabdyqtar shvedter elinen ákelingen. Buryn-soń­dy Ońtústikte sheteldiń mun­daı ozyq úlgili jabdyqtary paı­da­lanylmaǵan. Jalpy alǵanda, kásip­oryn tutynýshylar úshin barlyq jaǵdaıdy jasaýda. Shyraıly qalany nanmen qamtamasyz etý úshin 10 «Mersedes Sprınter» kó­ligi saqadaı-saı tur. Osy kólikter ar­qyly qaladaǵy azyq-túlik dú­kenderiniń 50-60 paıy­zyna nan jetkiziledi. «Bul nan zaýyty táýligine 50 tonna undy qajet etedi. Bizdiń bas­ty maqsatymyzdyń biri – áleý­mettik nannyń baǵasyn turaqty ustap turý. Baǵanyń aspandamaýyna kóp septigimiz tıedi dep oılaımyn. О́ıtkeni, un ózimizden shyǵady jáne onyń tasymaldanýy­na kóp aqsha ketpeıdi. Dál qazir bizdiń zaýyttan kóterme baǵamen satyp alamyn degender bolsa, ár bólke nandy 25-28 teńge arasynda berýge daıynbyz. Sodan bolar, kún saıyn tapsyrystyń sany artyp kele jatyr», deıdi «Atameken korporasııasy» JShS-niń dırektory Murat Tóltebaev. Al, Ońtústik Qazaqstan oblysy ákiminiń orynbasary Saparbek Tuıaqbaev zaýyttyń zamanaýı tehnologııasyna tánti bolǵanyn jasyra almady. «Zaýyttyń táýligine 150 myń dana nan shyǵarýǵa múm­kindigi bar. О́te qymbat jab­dyqtarmen jumysyn bastap otyr­ǵan alǵashqy kásiporyn. Bul sheteldik jabdyqtardyń eń basty erek­sheligi – energııany únemdeıdi. Bul, árıne, shyǵyndy azaıtatyny anyq. Zaýyt nandy barlyq talap­tarǵa saı shyǵaryp otyr, arnaıy zerthanasy bar», deıdi Saparbek Quraqbaıuly. Bir sózben aıtqanda, barlyq talapqa saı bul zaýyt ár úıge toq­shylyq, bereke syılaı bermek. Oralhan DÁÝIT, «Egemen Qazaqstan». Ońtústik Qazaqstan oblysy. Sýretterdi túsirgen Arman ÁBDIRAShULY.