«Arıstonnan» arylatyn boldyq

Qyzylorda – Qazaqstandaǵy qubyrynan ystyq sý aqpaıtyn birden-bir oblys ortalyǵy. Kúlersiz, erik ózińizde. Biraq áńgimeniń aqıqaty osyndaı. Sondyqtan, qala turǵyndary úıine sýdy ysytyp, onyń temperatýrasyn saqtap turatyn «Arıston» deıtin zatty paıdalanady. Mundaı dúnıe árbir úıde bar. Aqmeshitte saýdasy júrip turǵan osy «Arıston» endi az satylatyn shyǵar. Sebebi, qalaǵa ystyq sý kele bastady. Byltyr aımaqqa ákim bolyp taǵaıyndalǵan kezinde Qyrymbek Kósherbaev qalada ystyq sýdyń joqtyǵyna qaıran qalyp, aldaǵy eki jylda aǵaıynnyń atalǵan muqtajdyqtan qutylatynyn aıtqan. Bireý sendi, bireý senbedi. Sebebi, halyq buǵan deıin mundaı ýádeni estigen. Biraq sońǵy 30 jylda qubyrlarynan ystyq sý aqqan joq.  Desek te, Qyrymbek Eleýuly sózinde turdy. Búginde qalany tolyqtaı ystyq sýmen qamtý úshin tehnıkalyq-ekonomıkalyq negizdeme daıyndalyp jatyr. Oǵan arnaıy 45 mıllıon teńge bólingen. Al qanatqaqty joba retinde Qorqyt ata kóshesinde 40 páterli eki úı ystyq sýǵa qosyldy. – 25 mıllıon teńge qarjyǵa biz eki úıge jyldam jylý almastyrǵysh qondyrǵysyn ornattyq. Osy arqyly kópqa­batty úıdi ystyq sýmen qamtımyz. Bul jerge arnaıy qurylǵy ornatylǵan. О́zderińiz bilesizder, qysym az bolǵan ýaqyttary joǵary qabatqa sý kóterilmeı qalady. Endi mundaı problema bolmaıdy. Ázirge sýdyń 1 kýby 250 teńge shamasynda bolady dep eseptep otyrmyz,– deıdi Qyzylorda oblystyq energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Asylbek Shámenov. Bul úlken jumystyń basy. Aldaǵy ýaqytta joǵarǵy qabattarǵa sý jetpeı qalý, ystyq sýdyń kelmeýi degen sııaqty problemalardan qutylatyn sııaqtymyz. Oblys ortalyǵynda 584 kóp qabatty turǵyn úı bar. Endi eki jylda osy turǵyn úıdiń bári ystyq sýmen qamtylmaq. Erjan BAITILES, «Egemen Qazaqstan». QYZYLORDA.