Polısııa polkovnıgi júrgizýshi kýáliginen aıyryldy

Petropavl qalalyq soty mas kúıinde kólik júrgizip, jol apatynyń oryn alýyna sebepker bolǵan polısııa polkovnıgi Vladımır Zıborovty 9 aıǵa júrgizýshi kýáliginen aıyrdy. Bul týraly Remarka.kz habarlady. «Soltústik Qazaqstan oblysy ishki ister departamenti tyldaǵy qamtamasyz etý bóliminiń burynǵy basshysy Vladımır Zıborovqa 9 aıǵa júrgizýshi kýáliginen aıyrý jazasy taǵaıyndaldy», – delingen Petropavl qalalyq ákimshilik sotynyń sýdıasy Alena Devıatkınanyń qabyldaǵan sheshiminde. Sot prosesine Vladımır Zıborovtyń ózi qatysqan joq. Tek jol apatynan zardap shekken azamattar ǵana keldi. Esterińizge sala keteıik, burynǵy polısııa polkovnıgi mas kúıinde óz ıeligindegi «Chevrolet Niva» kóligimen «Toyota» men «Mitsubishi Pajero» markaly avtokólikterine soqqan. Ári ol jolaýshylar avtobýsyn da soǵyp ótken eken. Oqıǵa ornynda bolǵan kýágerler mas polkovnıktiń aıaǵyn nyq basa almaı turǵan sátin beınekameralarǵa túsirip alǵan. Keıin bul beınebaıandar ınternetke tarady. Aıdar О́risbaev. Derekkóz: Remarka.kz. Foto: Total.kz.