Arqalaǵany alǵys

Biz 8 naýryz qyzdar merekesi qarsańynda Almaty qalasy, Alataý aýdanyndaǵy №14 emhanaǵa barǵanymyzda merekelik kóńil-kúıde qyzmet etip jatqan ujym músheleriniń jaıdary júzderine kýá boldyq. Bul emhana 45 myńǵa taıaý turǵyndarǵa qyzmet etse, onyń 14 myńy balalar eken. Aýdan alǵash shańyraq kóterip, jańa emhana jumys isteı bastaǵannan bergi kezeń ishinde 7 myńnan asa náreste ómirge kelipti. Emhananyń bas dárigeri Toǵjan Esbergenova búkil eńbek jolyn densaýlyq saqtaý salasyna arnap kele jatqan aq halatty abzal jan bolyp shyqty. Ol Almaty memlekettik medısına ýnıversıtetin 1985 jyly bitirgen soń, aýylǵa baryp ondaǵan jyl eńbek etip, odan keıin qalaǵa aýysypty. Qarapaıym dárigerden bas dárigerge deıin joldan ótken tájirıbeli jan eken. Jańa emhana iske qosylǵan kúnnen bastap basshylyq jasap kele jatqan Toǵjan Saǵynyshqyzyn áńgimege tarqanymyzda ol: «Elbasy Nursultan Nazarbaevtyń «Qazaqstan-2050» Strategııasynda «Ult densaýlyǵy – bizdiń tabys­ty bolashaǵymyzdyń kepili» degen edi. Shynynda, Táýelsiz memleketimizdiń ár azamatynyń densaýlyǵy dárigerlerdiń qaltqysyz jumysyna baılanysty dep bilemin. Bizdiń emhana dárigerleri turǵyndar ǵımarat tabaldyryǵynan attaǵannan bastap olardyń búkil talap-tilekteri múltiksiz oryndalady. Ár kelýshimen sypaıy sóılesip, til tabysý dárigerdiń azamattyq boryshy dep bilemin», dedi. Toǵjan Esbergenovanyń aıtqan ýájin biz «Alǵys kitapshalaryna» kóz júgirtkende aqıqat ekenin ańǵardyq. Tipti onyń ózi jetekshi bolyp, qarttar men kóp balaly otbasylary turatyn úılerdi aralaýdy úrdiske aınaldyrǵany kóńilge jylylyq uıalatty. Mundaı kishilik pen kisilik árbir aq halatty abzal jannan tabylyp jatsa, nur ústine nur bolmaq. Emhanany aralaǵanda jurtshylyqqa qyzmet kórsetetin zamanaýı qural-jabdyqtardyń minsiz jumys istep jatqanyna, oǵan kelýshilerdiń dán rızalyǵyna tánti boldyq. Sansyzbaı MOLDAJAN. Almaty.