Kómegi kóp qor

Keshe Ortalyq kommýnıkasııalar qyzmetinde «Damý» kásipkerlikti damytý qory» AQ-tyń basqarma tóraıymy Lázzat Ibragımova baspasóz máslıhatyn ótkizdi. Onda shaǵyn jáne orta bızneske qatysty máseleler sóz boldy. Brıfıngke qor basshysymen birge «Ta-Maq» JShS dırektory Gúlmıra Qońqasheva men «Astana Flora Inter» JK dırektory Gúlnár Bókebaeva da qatysyp, ózderiniń jumystarymen tanys­tyrdy. Sóz sirásin birinshi bolyp bastaǵan Lázzat Ibragımova shaǵyn jáne orta bıznesti tekserýge Elbasy jarııalaǵan moratorıı týraly áńgimelep, bul ıgi shara bıznestiń damýyna serpin berip, kásipkerlerge kóp kómek bolatynyna toqtaldy. Aıtqandaı, bul baspasóz máslıhaty bıznestegi názik jandarǵa arnalǵandaı áser qaldyrdy. Búgingi tańda elde­gi shaǵyn jáne orta bıznes salasyn­daǵy áıelderdiń deni bilim berý isi men densaýlyq saqtaý jáne ta­ǵam men tigin óndirisi salasyn tańdaı­dy eken. Onyń sebebi, atalǵan kásip túrleri áıelderge tán. Máselen, oqýshylarǵa repetıtor bolyp qyzmet kórsetken áıelder bolashaqta shaǵyn mektepter ashyp, bıznesin bastaıdy. Bul turǵyda «Damý» qorynyń kómegi úlken kórinedi. О́ıtkeni, olarǵa beriletin nesıeniń 7 paıyzyn atalǵan qor tóleıdi eken. Sonymen qatar, «Damý» qory kásipkerlerdiń alǵan nesıesine de kepil bola alady. Bul L.Ibragımovanyń sózi. Basqarma tóraıymy Memleket basshysy Nursultan Nazarbaevtyń shaǵyn jáne orta bızneske jarııalaǵan moratorııi týraly pikirimen bólisti. «Bul moratorıı shaǵyn jáne orta bızneske úlken múmkindikter ashady. Iri bıznes salasy quzyrly or­gan­dardyń tekserisinen qorǵana ala­tyny málim. Sebebi, olarda ma­mandandyrylǵan zań qyzmeti bar. Al, bıznesin tek ózi ǵana júr­gi­zetin kásipkerlerge bul tekserýler kóptegen qıyndyqtar týǵyzýy yq­tımal. Endigide, óz isin endi bastap kele jatqan kásipkerlerdiń osy to­by qorǵaýǵa alynyp, aıaǵynan nyq tu­ryp kete alatyn bolady», dedi qor tóraıymy. Qazaqtyń ulttyq taǵamdarynyń birqatary shetelderge shyǵarylyp, durys baǵalanatyny týraly ejelden aıtylyp kelgen. Atap aıtqanda, qazy-qarta men jal-jaıa batys elderiniń tańsyq taǵamdaryna, al qymyz-qymyran shıpaly sýsynyna aınalǵany maǵlum. Al endi, birer jyldyń kóleminde «Arzý» saýda belgisimen taǵam ónimderin shyǵaratyn «Ta-Maq» JShS Qazaqtyń et taǵamyna arnalǵan jaımasyn Eýropanyń taǵam sórelerine jónelte bastapty. Sondaı-aq, aldaǵy ýaqytta AQSh naryǵyna shyǵarýdy da kózdep otyrǵan kórinedi. «Biz ózimizdiń ónimderdiń 10 paıyzyn eksportqa shyǵaramyz. Negizgi tutynýshylarymyz Batys Eýropa elderi bolyp tabylady. Aldaǵy ýaqytta eksportty 22 paıyzǵa arttyrýdy kózdep otyrmyz. Bul úshin óz ónimderimizdi sapalyq tekseristen ótkizýge AQSh-qa jiberdik. Aldaǵy ýaqytta bul naryqqa da jaımanan ónimderin shyǵaramyz», dedi G.Qońqasheva. Jeke kásipker óz basshylyǵymen óndiriletin «Arzý» saýda belgisiniń ónimderin 14 jyldan beri shyǵaryp keledi. Búgingi kúnde kásipker sheteldik tehnologııamen jumys isteıtin 360 adamnan turatyn zaýytty jasaqtap úlgergen. Elimizde shaǵyn bıznespen aınalysatyn áıelder kóp. Máselen, jeke kásipkerlerdiń 50 paıyzǵa jýyǵy názik jandar. Al kásiporyn basqaratyn áıelderdiń úlesi 25 paıyz ǵana eken. Muny qordyń tóraıymy L.Ibragımova aıtty. Onyń sózine sensek, bıznes­te er-azamattarǵa qaraǵanda áıel­der­diń jaýapkershiligi mol. Sonymen qatar, asa tózimdi kórinedi. «Da­mý» baǵdarlamasy aıasynda kásip­kerlerdiń statıstıkasyna keletin bolsaq, qarjylandyrylatyn árbir tórtinshi jobany áıelder júzege asyrady, dep qosty ol. «Astana Flora Inter» JK dı­rektory Gúlnar Bókebaeva sha­ǵyn bıznes qurý týraly óz tájirı­besimen bólisti. Onyń sózine qara­ǵanda, kompanııanyń bıznesin qa­lyp­tastyrýǵa «Damý» qory júzege asyryp jatqan baǵdarlamalar kóp septigin tıgizipti. Olar 3 mln. teńge memlekettik grantty jeńip alyp, bıznestiń jol kartasy boıynsha gúl ósiretin jylyjaı salyp alypty. Munymen qosa, G.Bókebaeva Germanııada mashyqtanýdan ótip, sol eldiń landshaft salasyndaǵy tájirıbesin oqyp-úırenipti. Endi óz isin ónerkásiptik aýqymǵa deıin keńeıtýdi josparlap otyr eken. Nurbaı ELMURATOV, «Egemen Qazaqstan».