Mańyzdy shara aldyndaǵy aýqymdy basqosý

Keshe Astanada «1540 qararynyń óńirlik jáne jahandyq qarýsyzdaný men taratpaý úderisterine úlesi – 1540 qararynyń 10 jyldyq mereıtoıyna» taqyrybynda «Ortalyq Azııa+» pishininde eki kúndik semınar bastaldy. Bul halyqaralyq aýqymdy sharany Qazaqstan Respýblıkasynyń Syrtqy ister mınıstrligi BUU-nyń Qarýsyzdaný máseleleri jónindegi basqarmasymen (UNODA) jáne BUU Qaýipsizdik Keńesiniń 1540 komıtetimen (1540 komıtet) birlesip uıymdastyrýda. Semınar BUU Qaýipsizdik Keńesi turaqty músheleriniń ókilderin, sondaı-aq, 30-dan astam Azııa memleketterin qosa alǵanda, «Ortalyq Azııa+» pishininde ótip jatyr. Bul sharaǵa memleket ókilderinen bólek, birqatar ha­lyq­aralyq jáne óńirlik uıym­­­dardyń, onyń ishinde EQYU, TMD, EO, MAGATE, HQTU (Hımııa qarýy­na tyıym salý jónindegi uıym) uıymdarynyń ókilderi qatysýda. Atap ótetin jaıt – bul halyq­ara­lyq basqosý 1540 qararynyń 10 jyldyq mereıi jáne Gaagada óte­tin Iаdrolyq qaýipsizdik jónin­degi sammıt qarsańynda uıym­das­­ty­rylyp otyr. Sondyqtan bar­lyq múd­deli taraptar úshin 1540 qara­ry boıynsha ulttyq deńgeıde táji­rıbelerimen bólisip, onyń óńirlik jáne jahandyq qarýsyzdaný jáne taratpaý salasyna qosyp otyrǵan úlesin baǵamdaý, sondaı-aq, taratpaý jáne terrorızmge qarsy is-qı­­myl salasyndaǵy óńirlik jáne ha­­lyqaralyq yntymaqtastyqty nyǵaıtý boıynsha usynystar engi­zý­ge tamasha múmkindik bolyp tabylady. 1540 qarary BUU Qaýipsizdik Keńesi tarapynan osy Bas uıym Jarǵysynyń 6-babyna sáı­kes­­ ­2004 jyldyń 24 sáýirinde qabyl­dan­ǵan bolatyn. Atalǵan qarar barlyq memleketterdi ıadrolyq, hımııa­lyq nemese bıologııalyq qarý túrle­rin jasaýǵa, satyp alýǵa, óndirýge, ıelenýge, tasýǵa, qaıta berý nemese qoldanýǵa árekettenetin memlekettik emes sýbektilerdi qoldaýdyń kez kelgen túrinen bas tartýǵa jáne ózderiniń ulttyq prosedýralaryna sáıkes tıisti zańdardy qabyldap, tıimdi qoldanýǵa mindetteıdi. 1540 qarar qabyldanýymen baıla­nysty BUU Qaýipsizdik Keńesiniń arnaıy komıteti quryl­ǵan bolatyn. Ol BUU Qaýipsizdik Keńesin memleketterdiń qarar talabyn oryndaýy týraly aqpa­rattandyryp otyrýy tıis. Qazaqstan taratpaý sala­syn­daǵy saıasatyn dáıekti­lik­pen júrgizip, 1540 qararynyń erejelerin tıimdi júzege asyrý boıynsha sharalar qabyldap keledi. 2011 jyly Qazaqstan 1540 qararynyń mindetterin oryndaý boıynsha osyndaı sharany óńirlik deńgeıde uıymdastyrǵan bolatyn. Qazaqstan BUU Qaýipsizdik Keńesiniń 2017-2018 jyldardaǵy turaqty emes músheligine kandıdat, eger osy laýazymǵa saı­lan­ǵan jaǵdaıda BUU-nyń atal­ǵan mańyzdy organy aıasynda ıadrolyq qaýipsizdik jáne taratpaý salasyndaǵy máselelerdi odan ári ilgeriletý nıetinde. Sáýlebek BIRJAN.