Jaıbasarlyq joıylmaýda

Aqmola oblysynda qylmystyń qarqyny báseńdemeı otyr. Mysaly, bótenniń múlkin urlaý 15,7 paıyzǵa, uıaly telefondardy jymqyrý 9,4 paıyzǵa ósse, qaraqshylyq shabýyldar sany 15,6 paıyzǵa ósken. Oǵan qosa, tirkelgen qylmystar qurylymynda urlyq jasaýdyń úlesi 64,4 paıyzdy quraǵan. Ásirese, turmystyq sektordyń kóleńkede qalyp jatqany alańdatady. Sondyqtan da bul kemshilikti joıýdyń tóte joly retinde, ıaǵnı qylmystyń aldyn alý sharalaryna zamanalyq tehnıka jetistikterin tikeleı qosý jáne jer­gilikti atqarýshy organdar men azamattardyń qoldaýyna ar­qa súıeýdemiz, – deıdi bizben áńgimesinde IID memlekettik kúzet bóliminiń bastyǵy, polısııa pod­polkovnıgi Sáken Ábilmájinov. Áıtkenmen, istiń ózektiligine qaramastan, jaıbasarlyq kóri­nisteri de joıylmaýda. Mysaly, Zerendi aýylyndaǵy 498 páter men 9199 jeke turǵyn úıdiń ekeýi ǵana ortalyq baqylaý pýnktine qosylǵan. Dál osyndaı jaǵdaı Eńbekshilder, Ereımentaý, Jaqsy, Astrahan, taǵy basqa aýdandarda oryn alyp otyr. Halqymyz «saqtansań – saq­taımyn» degen naqyldy jıi aıtady. Onyń maǵynasyn túsindirip jatýdyń ózi artyq. Búgingi quqyqtyq qoǵamnyń ustanymy da solaı. Demek, ortaq kesapattyń aldyn alýǵa septesý, oǵan tikeleı qatysý barshamyzdan jaýapkershilikti eseleı túsýdi talap etetini anyq. Baqbergen AMALBEK, «Egemen Qazaqstan». Aqmola oblysy.