«Shymkent qalasynda oryn alǵan jaǵdaıǵa baılanysty tártipsizdikterdiń aldyn alý jáne qala turǵyndarynyń qaýipsizdigin qamtamasyz etý maqsatynda polısııa qyzmetkerleri kúsheıtilgen rejımde táýlik boıy jumys isteıdi. Sonymen qatar, Ulttyq ulan men Qorǵanys mınıstrliginiń sarbazdary, Tótenshe jaǵdaılar departamentiniń qyzmetkerleri jumyldyryldy. Olarǵa myńǵa jýyq qala turǵyny kómekke keldi. Osy kezeńde qoldaý kórsetken azamattarǵa zor alǵysymdy bildiremin», - delingen Shymkent qalalyq polısııa departamenti basshysynyń málimdemesinde.
Vedomstvonyń málimetinshe, qyzmet atqarý barysynda 45 qyzmetker túrli dene jaraqatyn alǵan. Onyń ishinde aýyr jaraqaty bar eki qyzmetker aýrýhananyń jansaqtaý bóliminde boldy jáne qazir arnaıy baqylaý palatalaryna aýystyryldy.
«Alǵan jaraqattaryna qaramastan, bul qyzmetkerlerdiń barlyǵy óz erkimen turǵyndardyń tynyshtyǵyn qamtamasyz etý úshin qyzmetine qaıta kiristi. Jaralanǵan polısııa qyzmetkerlerine qyzmet ornynda medısınalyq kómek kórsetiledi. Qazirgi ýaqytta Shymkent qalasynda jaǵdaı turaqty. Qala aýmaǵy tolyǵymen quqyq qorǵaý organdary qyzmetkerleriniń baqylaýynda, quqyq buzýshylyqtarǵa jol bermeý boıynsha is-sharalar júrgizilýde. Qala turǵyndaryn komendanttyq saǵat talaptaryn qatań saqtaýǵa shaqyramyn», - dedi Eraly Jumahanbetov.
