«Qazaqstan barysy» týrnıri bastaldy

Keshe elimizde tórt jyldan beri kúres dese delebesi qozatyn jankúıerlerdiń qyzyǵa tamashalaıtyn jarysyna aınalǵan Qazaqstan Respýblıkasy Prezıdenti Nursultan Nazarbaevtyń júldesi úshin qazaq kúresinen ótetin «Qazaqstan barysy» respýblıkalyq týrnıriniń irikteý kezeńi bastaldy. Osy oqıǵaǵa baılanys­ty keshe týrnırdi uıym­dastyrýshylar kezdesý ót­kizip, bıylǵy jarystyń erek­shelikteri týraly aıtyp berdi. Onda aldymen Sport jáne deneshynyqtyrý iste­ri agenttiginiń tóraǵasy Tas­tanbek Esentaev tórt jyldan beri dástúrge aınalǵan týrnırge jyldaǵydaı salmaǵy 80 kılodan asatyn, jasy 18-ge tolǵan árbir balýannyń qatysýǵa múmkindigi bar ekenin aıtty. Sodan keıin ol elimizde qazaq kúresimen aınalysatyn adamdardyń kóbeıip jatqanyn, qazir Qazaqstan boıynsha 35 000-nan astam balalar men eresekter tól kúresimizben aınalyssa, 500-den astam jattyqtyrýshy solarmen jumys istep jatqanyn atap ótti. Osydan keıin ol bıylǵy «Qazaqstan barysy» týrnıriniń irikteý jarystaryna toqtaldy. «Jarystyń birinshi kezeńi 31 naýryzǵa deıin aýyldarda ótse, ekinshi kezeńi aýdandyq jáne qalalyq deńgeıde sáýir aıynda ótedi. Osy eki kezeńnen ótkender 1-20 mamyr kúnderi bolatyn oblystyq jarys túrindegi úshinshi kezeńge qatysady. Týrnırdiń fınaly 29 maýsymda Astanadaǵy «Saryarqa» respýblıkalyq velotreginde ótedi», – dedi ol. Jalpy, T.Esentaevtyń aıtýynsha, qazir balýandardyń jarysqa daıyndyǵy jaq­sy. Búginde elimizde qazaq kú­resiniń balýandary basqa da kúres túrlerinen óte­tin syndarǵa qatysyp, sheber­likterin arttyryp keledi. Osynyń ózi balýandardyń shyńdalýyna septigin tıgizip otyr. Endi osy úsh kezeńnen iriktelgen sportshylar 25-30 mamyr kúnderi Almatyda 5 kúndik oqý-jattyǵý jıyny­na qatysady. Osy jıynda fınalǵa qatysatyn balýan­dar úshin tereńdetilgen medı­sınalyq tekserý, dopıng-synama, foto-beıne túsirilimder ótkiziledi. Kezdesýde agenttik tór­aǵa­­sy «Qazaqstan barysy» týr­­­nırine ózgerister engi­zil­­genin aıtty. Ol bıylǵy beldesýlerge burynǵydaı 12 emes, 6 tóreshi ǵana qyzmet ete­tinin, olardan týrnır aldynda em­tı­han alynatynyn baıandady. Onyń aıtýynsha, synaqtan ót­­­­ken tóreshiler jarnaǵa 1 000 AQSh dollary kóleminde aqsha tóleıdi. Eger týrnırde jaq­sy tóreshilik etse, aqshasy qaı­­­­tarylyp, buǵan qosa 5 000 dol­lar kó­leminde syıaqy alady. Jıynda taǵy bir aıtylǵan ózgeris jeńimpaz balýannyń jattyqtyrýshysynyń syı­aqysyna qatysty boldy. Osy másele boıynsha agent­tik tóraǵasy bıyl je­­ńim­paz balýannyń bapkerine byltyrǵydaı 50 000 AQSh dol­­­lary emes, 20 000 dol­lar beriletinin eskertti.­ Sonymen birge, ol ekin­­­shi, úsh­in­shi oryn alǵan balýan­dar­dyń jáne olardyń jattyq­ty­rý­shy­la­rynyń syıaqylary sol kúıinde qalatynyn aıtty. «Iаǵnı, kúmis júldeger 75 000 AQSh dollaryn alsa, qola júldeger 50 000 dollar alatyn bolyp qaldy», – dedi ol. Osy jerde «Qazaqstan ba­rysy» qazaq kúresin damytý qory qamqorshylar keńe­siniń tóraǵasy Arman Sho­raev týrnır jeńimpazyna 150 000 AQSh dollary tabys etiletinin málimdedi. Bı­yl­ǵy jylǵy taǵy bir ja­ńa­lyq, buryn týrnırde je­ńim­pazǵa berilip kelgen kólik júl­dege jete almasa da, kórermen kózaıymyna aınalǵan balýanǵa tapsyrylatyn boldy. Osydan keıin agenttik tóraǵasy qazaq kúresin Olımpııa oıyndaryna engizý jospary jasalǵanyn habarlady. Ol qazir agenttik aldynda qazaq kúresin Azııa jáne Olım­pııa oıyndarynyń baǵdarlamasyna kirgizý maq­sa­ty turǵanyn aıtty. Dastan KENJALIN, «Egemen Qazaqstan».