Bul jádigerdi 2015 jyly «Mýzeıge syı tartý» aksııasy aıasynda aqynnyń qyzy Áıken tapsyrǵan. Pıdjak eki túımeli, qara tústi bylǵarydan tigilgen. Ony aqyn Máskeýdegi ádebıet ınstıtýtynda oqyp júrgende satyp alypty. Qundy eki jádiger de jaqsy saqtalǵan. Arqaly aqyn «Joq, umytýǵa bolmaıdy!», «Jaryq pen jylý», «Kúı kitaby», «Mezgil áýenderi», «Ulym, saǵan aıtam», «Qyzǵaldaq jaıly ballada», «Men týǵan kún», «Jeti boıaý», «Meniń topyraǵym», «Urpaǵym, saǵan aıtam» jáne taǵy basqa jyr jınaqtarymen ulttyq poezııamyzǵa ózgeshe órnek, jańa lep ákeldi. Proza janrynda da tabandy eńbek etip, «Aq shaǵyl», «Kishkentaı», «Dańq pen daqpyrt» atty romandaryn jazdy. Sondaı-aq Jumeken aǵamyzdyń esimin memlekettik Ánuran avtorynyń biri retinde qurmetpen aıtamyz. Sańlaq sýretkerdiń «Meniń Qazaqstanym» atty óleńder men dastandar jınaǵyna 2010 jyly Memlekettik syılyq berildi.
Aqynnyń dosy, belgili jazýshy, Memlekettik syılyqtyń laýreaty Orazbek Sársenbaı «Jumekenniń júregi» degen esteliginde: «Qazaq poezııasynyń oqshaý turǵan úsh báıteregi – Qasym, Muqaǵalı, Jumeken bir-birimen taǵdyrlas ómir keshipti. Jas jaǵynan úsheýi de qyryqtyń qyrqasyna shyqqanymen, elýdiń eteginen ustap úlgermegender. Al shyǵarmashylyq ómirbaıan turǵysynan kelsek, bizdińshe bul úsheýi de negizinen aıtaryn aıtyp, jazaryn jazyp ketkender», dep salmaqty sóz aıtqan eken.
