Sońǵy táýlikte ǵana 700-den astam indet juqtyrǵan. Onyń 536-y eresek adam bolsa, qalǵandary – 14 jasqa deıingi balalar. Indet ásirese, Kókshetaý, Stepnogorsk qalalary men Býrabaı, Ereımentaý, Atbasar aýdandarynda jaıylyp barady.
Qaýipti dertke oqýshylar da jıi ushyraýda. Máselen, tórtkúl dúnıeniń apshysyn qýyra jetken KVI derti bastalǵaly
5 742 oqýshy indetke shaldyǵypty. Jańa oqý jylynan beri 3 myńnan astam oqýshy aýyrǵan. Joǵary jáne orta oqý oryndarynyń stýdentteri de indet juqtyrýshylar qatarynda. Olardyń sany 300-den asady.
– Qaýiptiń betin qaıtarý úshin árbir turǵynnyń ekpe qabyldaýy qajet. Árıne, ekpe qabyldaǵannan keıin de dertke ushyraǵandardyń bar ekenin jasyrýǵa bolmas, – deıdi óńirdiń bas sanıtarlyq dárigeri, – bir jaqsysy, ekpe qabyldaǵannan keıin indettiń áseri jeńildeý bolady.
Búginde óńirde 150-ge jýyq vaksına pýnktteri jumys isteýde. Sóz arasynda osy bir jaýapkershiligi mol iste Qosshy qalasynyń turǵyndary kósh bastap turǵandyǵyn aıta ketsek artyq bolmas. Qala turǵyndary túgel vaksınanyń birinshi jáne ekinshi komponentin alyp úlgergen. Tıimdiligi osy jerde kórinip tur. Saraptap qarasańyz, indet qarqyny bul qalada óte tómen. Demek, vaksına salýdyń tıimdiligi kózge kórinip tur.
– Búginge deıin revaksınany turǵyndardyń 50 paıyzy ǵana aldy. Bul barlyq kólemniń jartysy ǵana. Kópshiligi – mektep muǵalimderi men medısına qyzmetkerleri, – deıdi bas sanıtarlyq dáriger.
О́ńirde 207 monıtorıng toby jumys isteýde. Jyl basynan beri olar 200-den astam baqylaý jumystaryn júrgizgen. Nátıjesinde, karantın sharalaryn buzǵan 4 nysan anyqtalypty, 2 myńnan astam turǵyn oqshaýlaý talabyn buzǵan, 522 oblys turǵynyna 27,6 mln teńge aıyppul salynǵan.
Búgingi tańda oblystaǵy 17 stasıonarda
1 205 tósektik orny bar. 700-den astam syrqat em qabyldaýda. Jan saqtaý bóliminde 23 naýqas jatyr. Dári-dármektiń eki aılyq qory qamtamasyz etilgen.
Qaýiptiń betin qaıtaratyn jalǵyz jol – ekpe qabyldaý ekenin mamandar aıtyp otyr. Demek, jalpaq jurt janashyr sózge qulaq asýlary qajet.
Aqmola oblysy
