Keıde bizge qordaly qazaq tarıhynyń bir parasy Shyńǵys hanmen birge jerlengendeı kórinedi. Beıiti qaı beldiń qoınynda qalǵany Qudaıǵa aıan! Belgili sýretshi Maqsut Jaqanovtyń «Shyńǵys han – álemdi dúr silkindirýshi» kartınasyna qarap, eski zamanmen enshiles esti oqıǵalar eske tústi.
Qarańyzshy, Shyńǵys han alqarakók aspanda sozylyp jatqan túnergen bult pen dala peızajy fonynda beınelengen. Bulttardyń arasynan shyqqan kún sáýlesi qula dala men Shyńǵys hannyń jyljyp kele jatqan orasan zor áskerine jaryq túsirýde. Qolbasshy otyrǵan keıipte berilgen. Terisi ımpasato tehnıkasymen jasalǵan malaqaıy kórermenniń nazaryn ózine tartady. Altyn tústi teriniń ar jaǵyndaǵy kóleńkege Shyńǵys hannyń qatý júzi jasyrynǵan. Ol erinderin jymqyryp, nazaryn alysqa qadaýda. Úlken oı ústinde alaburtady. Sýretshi keneptiń bos jerlerine hrıstıan hramynyń, qytaı pagodasynyń, eýropalyq qala úıleriniń tóbelerin ornalastyrǵan. Hannyń qasynda jabaıy ańnan góri úı janýaryna kóbirek uqsaıtyn qasqyr jatyr.
Qasqyr demekshi, qylqalam sheberleri óz keıipkeriniń qandaı da bir qasıetine nazar aýdartý úshin sımvol retinde ańdy paıdalanady. Qasqyr – ejelgi mońǵoldardyń totemi sanalǵan. Mońǵol ańyzdaryna saı, qasqyr – bul kók haıýany jáne olja ákelýshi. Kóshpendi mońǵoldar ózderine orasan zor ımperııa qurýǵa kómektesken urys taktıkasyn qasqyrlardy baqylaı otyryp jasaǵanyn aıtady.
Kartınadaǵy tús sımvolıkasy da úlken mánge ıe. Sýretshi kartınany eki bólikke bólgen. Aldymen Shyńǵys hannyń tulǵasyn qyzyl túspen erekshelep, sodan soń kók tústi sýyq boıaýlarmen shekteýli peızaj jazǵan. Jalpy, qyzyl tústi kóbi qanmen jáne otpen baılanystyrady. Qyzyl boıaý – jalyndaǵan alaýdy, sol sııaqty bılikti ári aıbyndylyqty bildiredi. Al kók tús – aspandy jáne máńgilikti meńzeıdi
