60 jyldyǵyn atap ótken qazaq taý shańǵysy kýrortynda aǵylshyn bekzadasy Garrı Ýelskıı demaldy
Bul kúnderi brıtandyq aqparat kózderi bekzada Garrı, ıaǵnı Genrı Ýelskııdiń qalyptasqan dástúrdi buzyp, aǵylshyn monarhtary 30 jyl boıy demalyp kelgen Shveısarııa kýrorttaryna barmaı, súıiktisi Kressıda Bonaspen birge Qazaqstanda qydyrǵanyn jáne sol qyzǵa júregin usynǵanyn jabyla jazýda. Brıtan basylymdary bekzadanyń Shymbulaqqa appaq tikushaqpen jetkizilgenin, aýqattylarǵa arnalǵan tamasha qonaqúıde turǵanyn aıtady. Árıne, Charlz Ýelskıı men marqum Dıana begaıymnyń ortasynda dúnıege kelgen Garrıdiń – Ulybrıtanııa patshaıymy II Elızavetanyń súıikti nemeresiniń bul sátine kýá bolǵan eshkim joq.
Biraq, «Shymbulaq» taý shańǵy kýrorty óziniń 60 jyldyq mereıtoıyn keńinen atap ótkeni shyndyq. Naýryz merekesine sáıkes eki kún qatarynan ótken mereıtoıda Almaty qalasynyń ákimi Ahmetjan Esimov te boldy. Merekelik baǵdarlamany Qazaqstan men Almaty qalasynyń týyn ustap túsken shańǵyshylar ashty. Bul kóshti shahar basshysy Ahmetjan Esimov bastady.
Naýryz kójesi qaınap, tabıǵaty jaınap jatqan Shymbulaqta oıyn-saýyqtyń barlyq túri uıymdastyryldy. Taý-shańǵy sporty ardagerleriniń sherýi, Shymbulaq týraly retro fotolardyń kórmesi, slalom jarystary men túngi syrǵanaq osynda demalýǵa kelgen eshkimdi de beıjaı qaldyrmady. Dýman arasynda «Shymbulaq arýy» anyqtalyp, mereıtoıǵa arnalǵan úzdik tilekterdiń ıeleri shetelge joldamaǵa ıe bolyp jatty.
Almaty mańynda Ile Alataýy shatqalynyń 2510 metr bıiktiginde oryn tepken bul sporttyq keshen 1954 jyldan bastap taý shańǵysy sportshylarynyń súıikti ornyna aınalǵan. Alǵashqyda bul keshen keńes taý shańǵyshylarynyń olımpıadaǵa daıyndyq bazasy retinde qurylǵan.
Al Azııa oıyndary Shymbulaqty jańa zamanǵa beıimdep, tehnıkalyq sıpattamasy jaǵynan Eýropanyń eń jaqsy jarys joldarymen teńestirip ketti. Al qarynyń syrǵanaqtyq sapasy boıynsha olardan artyq desedi, kásipqoı shańǵyshylar.
Aıtpaqshy, osy kúnderi «Medeý» muz aıdynyna jetýge sál ǵana qalǵanda zamanaýı gondoldyq aspaly jolmen 15 mınýtta álemdik dárejedegi taý shańǵy kýrortyna jetip alýǵa bolady. Aspaly jolmen ketip bara jatyp qysta da, jazda da tabıǵattyń tamashasyna tek tańǵalýmen bolasyz. Senseńiz, jyldyń 300 táýliginde bul jerde kún jarqyrap turady jáne bul tustaǵy qar da aıryqsha – qurǵaq ári jeńil, sondyqtan, bul jaıly jáne jyldam syrǵanaýǵa kepildik beredi. Bul jaǵdaı syrǵanaý maýsymy bolyp tabylatyn 7 aı boıy saqtalady. Qysta Shymbulaq shatqalynda aýa raıynyń salqyndyǵy – 9 gradýstan aspaıdy. Jazda – salqyn, qysta – jyly.
– Azııa oıyndaryn ótkizý kýrortqa jańa serpin berdi. Sońǵy birneshe jyl ishinde Shymbulaqqa kelip demalýshylar úshin qaýipsizdik pen jaıly demalys máselesi joǵary deńgeıge jetti. Búginde Shymbulaq tek respýblıkalyq emes, halyqaralyq taý shańǵy jarystaryn da ótkizýde. 2010 jyldan beri munda kelýshiler sany bir mıllıonnan asty, – dedi Ahmetjan Esimov.
Sondaı-aq, qala ákimi Shymbulaqqa kelýshi týrıster sany artqanyna baılanysty demalýshylardyń barlyǵy taý shańǵysy keshenine syımaı ketetinin alǵa tartyp, «Kók Jaılaý» kýrortyn salýdyń qajettiligine de toqtaldy.
Aınash ESALI,
«Egemen Qazaqstan».
ALMATY.
Sýretterdi túsirgen
Dáýren ISAEV, Erlan OMAROV.
