Saıypqyran syqaqshy

Onda birese qyzǵaldaq qyzǵa ǵashyq bolyp, mahabbattan bas aınalyp burqy­ratyp óleń jazamyz. Munymyz óleń degen óreli ónerdiń talabyna saı kele me, joq pa, arajigin ajyratyp jatqan biz joq. Qoıny-qonyshymyz tolǵan «óleń». Ishki daýysty tyńdasaq, mundaı keremet óleńdi tipti Abaı da jazbaǵan. Biraq eshbir gazet-jýrnal jarııalamaıdy. Sosyn, kósiltip áńgime, novella jaza bastaımyz. «Shıkileý eken» deıdi kóńilimizdi jyqqysy kelmeıtin kókeler.

«Qalaı pisemiz?» dep sharq uryp júr­gende qolyma ot aýyzdy, oraq tildi sy­qaqshy Sadyqbek Adambekovtiń «Atylǵan qyz týraly ańyz» atty satıralyq romany túse qalmasy bar ma? Jata qalyp oqıyn. Kitap 1969 jyly «Jazýshy» baspasynan shyǵypty.

Kórkem ádebıettiń basty mindeti sóz­ben sýret salý, bolmysty áserli berý, eles­tetý desek, Sadyqbek aǵanyń shaǵyn janr­larynyń ózi únemi búkil oqıǵa, ıirim­di kóz aldynan ótkerip otyrady eken. Árıne, bul syqaqshy týyndylarynyń tushym­dylyǵyn, kórkemdigin arttyryp jatatynyn ádebıet teorııasyn oqyǵandar jaqsy biledi.

«Atylǵan qyz týraly ańyzdyń» ekin­shi kitaby araǵa baqandaı 6 jyl salyp 1975 jyly jaryq kórdi. Osy 6 jyl men úshin 6 ǵasyrǵa teń boldy desem, qazirgi óndir jas «О́tirikti shimirikpeı aıtady ekensiz» derine kúmándanbaımyn.

Osylaı, Sadyqbek Adambekov esi­mine mektepte oqyp júrgen saryaýyz ba­la shaqtan qanyqtyq. Árıne, sary­aýyz bolǵan soń saıypqyran, saqa sy­qaq­­shynyń satıralyq romanyna te­reń boılaı almadym bilem. Biraq osy olqy­lyq­tyń ornyn S.M.Kırov atyndaǵy Qazaq­tyń memlekettik ýnıversıteti (qazir­gi ál-Farabı atyndaǵy qazaqtyń ult­tyq ýnı­versıteti) jýrnalıstıka fakýl­te­tinde oqyp júrgende kórnekti ǵalym, ula­ǵatty ustazymyz Temirbek Qojakeev tol­tyrdy. Negizinen sadyqbektanýdy úıret­ken sol kisi. Adambekovtiń shyǵar­malaryn jilikshe shaǵyp, talqylap jazǵan eńbekterin oqysańyz, kóp jáıtke qanyǵasyz. T.Qojakeev joǵarydaǵy kitap týraly «Bul – aýyz toltyryp aıtar­lyq, qazaq satırasyndaǵy erekshe atar­lyq jańalyq» dep baǵalady. Ra­synda, S.Adambekovtiń bul eńbegi qazaq áde­bıetindegi tuńǵysh satıralyq roman edi. Endi Qojakeevshe aıtsaq, asyly, sa­tıra áserli de yqpaldy, tárbıeleýshi, saq­tandyrýshy kúshi mol bolýy úshin onda túr-túsi men is-áreketterinen, oılaý, sóıleý parasatynan oqýshy túńiletin, «mundaı bola kórmeıin» dep jırenetin satıralyq obraz bolýy kerek. Sadyqbek kókem osy shartty únemi eskerip otyrdy. Ár týyndysynda-aq tıp jasaýǵa talpyndy. Kókemniń syqaq áńgime, feletondarynan ótirikshi sýaıttyń, jaýapsyz toǵyshardyń, jylpos urynyń, basynan jaqsylyǵy artylmaıtyn ózimshildiń, ymyrashyl, jershil, rýshyldyń, arsyz aryzqoıdyń bizben qaınasyp júrgen ómirdegideı beıneleri kóptep tabylady.

«Tótenshe ókil» degen syqaq áńgimeni oqyp kórelik. Aq qar, kók muzda tar shalbar, sholaq palto, istik tumsyq týflı kıgen ókil aýylǵa aryz tekserý úshin ke­ledi. Qalyń qarda qarǵa adym attaı almaı búrseń qaǵyp, sorlap qalady. Osyny paıdalanǵan sharýashylyq basshylary ókildi bir maıanyń túbine aparyp, konıakqa toıdyryp, kózi buldyrady-aý degen kezde qabat-qabat teńkıip jatqan tóbelerdi kórsetedi. О́kilge ár tóbe bir-bir maıa shóp bolyp elesteıdi. Tekserýshini tik kóterip, ıyǵyna qoıǵan Qaspaqov istik muryn ókildi ońǵa-solǵa buryp, sıraǵynan myqtap ustap turady.

– Kórdim, óte jaqsy kórdim. Týý, ne degen kóp shóp... Ah, ońbaǵan aryzqoılar. Qalaı uıalmaı ótirik aıtady? Túsirińiz endi... – deıdi tótenshe ókil.

«Tirsegi maıysqan ókildiń qulap ketem be dep júregi sýyldady. Qaspaqov ókildi dik etkizip, jerge qoıdy» deıdi avtor.

Bul, árıne, satıralyq eles berýdegi, sózben sýret salýdaǵy tyń tapqyrlyǵy. Aryzdaǵy aıǵaqtardy indetip tekserip, anyq-qanyǵyna kóz jetkizý ornyna, ókildiń sovhoz maıalaryn sharýashy­lyq basshylarynyń biriniń ıyǵyna shy­ǵyp turyp sanaýy – kúlkili eles, tap­qyrlyqpen salynǵan sýret ári ókildi aqy­maq etý. Munan soń dırektor «endi jaıaý júrip shópti ólshep qaıtyńyz, qane, alǵa túsińiz» deıdi. Uzyn tumsyq týflı kıgen ókil ólse alǵa túser me? Buta panalaǵan torǵaıdaı sıyr keýlegen maıa úńgirine kirip, dirdektep otyrǵan ókil «oıbaı, ólshe­meımin, sizderge senemin, ózim de kór­dim ǵoı» dep bezildeıdi.

Osyndaı tapqyr áreket, tapqyr eles, tapqyr til, tapqyr pikir Sadyqbek satırasyna nár berip, qýattandyryp turady. Aýyz tushyp, estetıkalyq áser alatyn mundaı shyǵarmalar «Qojanasyr qaq­pasy», «Aıýbaıdyń ajaly», «Kóseniń kózi» atty jınaqtarynda molynan kez­desedi.

Mine, osy úshin de Sadyqbek shyǵar­malary týraly kemeńger jazýshymyz Muhtar Áýezov kezinde: «Aqyndyq táji­rıbesin mol paıdalanbasa da, fele­ton, ázil-ájýa túrine aýysyp, sol kish­kene kórkem janrda óz ónerin ótkir­lep, aıqyndap ashyp kele jatqan S.Adam­be­kov­tiń tili de súısinerdeı nár tanytty» dep jazdy. Sondaı-aq uly jazýshy «Sa­dyq­bektiń ár saqalynyń túbinde bir-bir saıtan uıalap jatyr» (M. Áýezov. 20-tom) dep ázildeıtinin kónekózder áli de aıtyp otyrady.

QazMÝ-de oqyp júrgende Temirbek Qojakeev meniń eptep syqaq jazatynymdy bilip, qanatynyń astyna alyp júrdi. Bul kisi satıra janryna beıim jańa esimderge erekshe qamqorlyq tanytýshy edi. Birde sol ustaz:

– Sabyrbek, sen Sadyqbek degen aǵań­dy bilesiń be? - dep suraǵan.

Qalaı bilmeıin. Arys balalar úıinen shyqqan Sadyqbekteı kózi tiri satırıkti bilmeý ólim emes pe? Osyny aıtqanymda Temirbek aǵaı:

– «Ara» jýrnalyna izdep baryp, tanys. Men jiberdi deseń, jaqsy qarsy alýy tıis, – dep baǵyt-baǵdar siltedi.

– «Arada» jumys isteý jalańash quı­­ryqpen kirpiniń ústine otyrǵanmen bir­deı!» – depti ǵoı Kúlmeshannyń ózin kúl­­dirgen Qaltaı Muhamedjanov aǵamyz. Kirpiniń ústine jalańash otyryp júrgen kókelermen keshteý tanystym. Kókemmen alǵashqy tanystyq osylaı bastalǵan.

Ekinshi tanystyq

Qaıratty shashyn artyna qaraı shal­qaıta taraǵan kirpisheshen ústindegi kókem áýeli maǵan tym susty kórindi. Sodan amalsyz Ospanhan Áýbákirov aǵany jaǵaladym. Bir-eki shymshyma men syqaq óleńimdi barmaqtaı ǵana alǵysózben «Sú­zegen sózge» jarııalady.

Sóıtip júrgende telearnadan Sa­dyqbek Adambekovpen arnaıy suhbat ótti. Suhbat berip otyrǵan satırık qyzý­qandylyqqa salynyp, ersili-qarsyly júrip ketti. Qabaǵy qatań. Júrisi yldym-jyldym. Sózderi túıeden túskendeı. «Myna adam aldyna barsam tútip jeıdi ǵoı» dep topshyladym. Keńes ókimetiniń kúrkirep turǵan tusy ǵoı. «Ara» jýrnalyna shyqqan atqa minerler attarynan aýyp túsetin. Sákeńniń sur sadaǵynan atylǵan jebe talaılardyń belin búgip, tizesin dirildetip turǵan kezeń. «Men de osy kisideı bolsam-aý» degen arman sol kezde boı kóterdi bilem. Biraq ol kisideı bolý qaıda?!

Sozbalaqtap qaıtemin, «Araǵa» bara-bara, tabanymyz jara-jara bolyp júrip Sadyqbek kókemmen tanysýdyń oraıy kelgen. Tanystyrǵan Ospanhan aǵam edi.

– Kelip-ketip júretinińdi bilem. Qatıraǵa ǵashyq bolǵandaı satıraǵa da ǵashyqpysyń? – dedi Sadyqbek kókem salǵan jerden.

– Iá, aǵa!

– Qaıdansyń?

– Ońtústikten.

– Jerles ekenbiz. Birdeńe túrtip júr­seń, uıalmaı ákelip kórset.

– Makul, aǵa!

– Bar, endi sabaǵyńnan qalma.

Budan ári suhbattasýdyń artyqtyǵyn sezinip, sabaǵyma qaraı syrǵydym.

Birde osy kisini Temirbek Qojakeev aýdıtorııaǵa ertip keldi. Tanystyrdy. Men bul kisimen erterek tanys ekenimdi bildirgim kelgendeı elpektep ketsem ke­rek, Temirbek aǵaı qabaǵymen-aq tynysh otyrýymdy uqtyrdy. Bizdiń kýrs­ta Gúlmıra degen qyz oqýshy edi. Soǵan burylyp:

– Aınalaıyn, ýnıversıtetten soń qaı salaǵa barǵyń keledi? – dep surady.

Sol kezde bizdi eki salaǵa – gazet jáne telearnaǵa beıimdep oqytatyn.

– Gazetke, – dedi Gúlmıra irkilmeı.

– Qazir gazette qyzmet isteý tańsyq emes. Tanylamyn deseń telearnaǵa ornalas. Ol jaǵyna men kómek beremin, – dedi qurmetti qonaǵymyz.                       

Qonaqtyń qamqorlyǵyna qýandyq. Sákeń kýrstasymyzǵa óziniń mekenja­ıyn jazyp bergen. Keıinnen Gúlmıraǵa «seniń satırık kókeń bar emes pe?» dep ázildep júrdik.

Ol kezde Sadyqbek kókem jaıly nebir ańyzǵa bergisiz áńgimeler aıtylýshy edi. Sonyń biri mynaý.

Qaınekeı Jarmaǵambetov pen Sadyq­bek Adambekovtiń «Ara» jýrnalynda birge qyzmet istep júrgen kezi eken. Birde Sákeń jýrnaldyń bas redaktoryna kirip, aqsha surapty. Qanekeń myrs etipti de:

– Esikti jaýyp, kabınetten shyq ta, ile qaıta kirip, tórt jol óleń shyǵar. Sosyn kórermiz, – deıdi.

Sákeń «qup» dep shapshań basyp kabınetten shyǵyp ketedi de, artynsha qaıta oralady. Sóıtedi de bastyǵynyń aldyna bir tizerlep otyra qalyp:

– Qaınekeı-aý, Qaınekı,

Sadyqbegiń minekı.

Aqshań bar ma, qanekı?

Restoran ánekı! – dep tereze jaqty nusqaıdy.

Endi Sákeńniń saparlaýy jaıyndaǵy áńgime ertegige bergisiz. Jýrnalıst retin­de ol is-saparǵa shyǵatyn bolady. Bas redaktor Syrbaı Máýlenov oǵan qarajatty qomaqtylaý belgilese kerek. Jol júretin kúni «Sálem» meıramhanasynda Syrbaı Máýlenov, Juban Moldaǵalıev, Tahaýı Ahtanov barlyǵy jolasharǵa jınalady. Dastarhan qunyn Sákeń tóleıtin bolǵan soń aıansyn ba, tapsyrysty úıip-tógip beredi. Bul azdaı bylaı shyǵa ınternatta jarty nandy bólip jegen dosy Syrbaı Sadyqbektiń eki qolyn Juban men Tahaýıǵa ustatyp, qaltasyndaǵy qalǵan aqshasyn sypyryp alady.

– О́z aýylyńa bara jatyrsyń ǵoı. Sa­ǵan aqsha nege kerek? – dep úsheýi qarq-qarq kúlipti.

Aqsha qaltada. Ishtegi taǵy birdeńe ti­lep, túrtkileıdi. Úsh «seri» qaıta aınalyp «Sálemge» kiredi.

Osy kezdi paıdalanyp Sadyqbek kó­kem taksı ustaıdy. Áýeli Juban dosynyń úıine jetedi.

– Sofıa! Bol tez. Juban jumsady, – deıdi entigip.

– Ne úshin?

– Ortalyq dúkende ǵajap norka shýba satylyp jatyr eken. Saǵan shap- shaq. Juban qyrǵyn kezekte tur. Bol jyldam. Shýba taýsylyp qalar, – deıdi dosynyń jubaıyn asyqtyryp.

Jeńgeı Sadyqbek kókemniń qolyna suraǵan aqshasyn ustatyp qala bergen. Osy ádispen ol Syrbaı aǵanyń úıindegi Gúl­jamal jeńgeıdi de úptep ketedi.

Qaıtyp kelse úsheýi áli dýmandatyp otyr. Poıyzdyń júretin kezi de taqap qalady. Úzeńgige aıaq salǵan Sákeń:

– Úılerińe tezirek qaıtsańdarshy! – dese kerek «janashyrlyqpen».

– Aǵa, osy áńgimeler qanshalyqty shyndyq? – dep suradym bir kezdeskende kókemnen.

– Qyzyqsyń, – dedi ol qyńyrlanyp, – ótirik bolsa el qalaı aıtyp júr?

«Qazaq ádebıeti» gazeti, «Ara» jáne «Krokodıl» jýrnaldaryndaǵy qyzmetinen soń Sadyqbek kókem shyǵarmashylyq jumystarǵa birjolata ketti de, men de elge oraldym. Aradaǵy az-kem baılanys osylaı úzilip qaldy.

Muny qyrǵı tildi qaısar aǵamen ekin­shi kezdesý dep bilińiz.

 Úshinshi kezdesý nemese qoshtasýdyń qıyny-aı!

Bul kezdesý týraly oılasam, júregimdi saǵynyshqa bólep, arqama shanshýdaı bolyp qadalatyn eleýli oqıǵalar kóz aldyma keledi. Ǵumyrynyń sońǵy jyldarynda Sadyqbek kókem ózi týyp-ósken Arysyna keldi. Baıaǵy qaıratty qara shash seldiregen, bozań tartypty. Densaýlyǵy da asa máz emes-ti. Soǵan qaramastan shy­ǵar­mashylyqpen úzdiksiz aınalysty. Je­lisi jeltoqsan oqıǵasyn qamtıtyn 510 bet­tik roman jazdy. «Jeltoqsandaǵy qara tún» atty osy kitapty qysqarta-qysqarta kele 95 betke túsirdi.

– Densaýlyǵym bolmaı júr. Osy kita­bymnyń qarjysyna ota jasatýym kerek, – dep edi bir barǵanymda.

Qart Sákeńniń Shymkentke shapqylaýy jıiledi. Birde «Ońtústik Qazaqstan» gaze­tine arnaıy suhbat berdi. О́zi týraly bir aýyz sóz aıtqan joq. Aldyńǵy tolqyn aǵalar jaıly keńirek áńgimelegeni, búgingi qoǵam haqynda tolǵamdaryn aıtqany este qalypty. Áńgime Muhtar, Sábıt, Syrbaı, Juban, Tahaýıǵa kelgende kókem tolqydy.

– Jalǵyz qaldym. Olar meni jalǵyz qaldyryp ketti, – dep jylady.

Qaıratty kisiniń jylaǵany meni qatty tolqytty.

Men bilgeli ol jalǵyzilikti ǵumyr keshti. Ilgerirekte halyq aqyny Isa Baı­za­qovtyń qyzy Mahfýzamen dám-tuz­dary jarasyp, birge turǵanyn estýshi edim. «Sodan keıin úılengen joq» deıtin biletinder. Ony men de sezetinmin. Úıine barǵanda jalǵyz qarsy alýshy edi. О́zi de, taǵdyry da kúrdeli jan edi ǵoı.

Obaly ne kerek, qalalyq ákimdik pen týǵan-týystary jatsa – kórpe, jantaısa – jastyq bolyp óbektep kútti. Qala ákimi bir ózine úlken úı syılady. Sadyqbek kókemniń osy úıine jıi kelýshi edim. Bul týraly tanymal jazýshy, halyqaralyq «Alash» ádebı syılyǵynyń laýreaty Marhabat Baıǵut bylaı dep jazdy:

«Satıra sardarlarynyń biri Sa­dyq­bek Adambekov aǵamyz ómiriniń soń­ǵy jyldarynda Almatyda mazasy bo­lyń­qyramaı, týyp-ósken óńirinde, atap aıt­qanda, Arys qalasynda turdy ǵoı. Bir­neshe jyl boıy Sabyrbek salyp-uryp Arysqa tartyp kete barar edi. Sadyqbek aǵasy satırık inisin jaqsy kóretin. Syqaqtaryn tyńdap, máz-máıram kúı keshetin, jaı adamdardy, jaıdaq áńgimelerdi jaqtyrmaıtyn Adambekov tiliniń qotyry bar, syqy­lyqtaı kúlip, syqaqtaı súıkenetin jas baýyrlaryn janyna jaqyn tartyp, jibermeı, bular biraz ýaqyt barmasa jas balasha ókpelep júrýshi edi. Kúnderdiń kúninde qazaq satırasynyń klassıgi Sadyqbek aǵamyz inisi Sabyrbekke:

«Kelgen bala ekensiń saǵyndyryp,

Endi syqaq jaza ber qaǵyndyryp.

Qandaı asaý bolsa da jalynda oına,

Qalamyńnyń ushyna baǵyndyryp, – dep óleń arnady».

Rasynda, dál osylaı edi. Birde men Sadyqbek kókeme keleshek kitabymdy kórsettim. Alyp qaldy. Artynsha Arys qalasy ákiminiń orynbasary Sábıt Sul­tanov ekeýi «Ońtústik Qazaqstanǵa» meni izdep keldi. Qoljazbamdy ustatyp turyp jymıyp kúldi. Az ǵana jazǵan jolashar tilegi bar eken.

«...Alys saparǵa shyǵarda kókiregi oıaý, kórgendi eldiń balasy aýyldyń aqsa­qalynan bata surap, qol jaıyp tizerlep otyrady eken qarııanyń aldynda.

– Jorytqanda joly bolsyn, jolda­sy Qydyr bolsyn! – dep aýyl aqsaqaly bata berip, kúmis saqalyn sıpap, aldynda­ǵy jas jigitke baısaldy kózben qaraı­dy eken.

Ol baıaǵy, baǵzy zaman...

Qazir ár úıde bir-bir klassık, ózinen basqa adam joq, keýdesine nan pisip, ózi bolyp, ózi tolyp osqyryp turǵan kezeńde:

– Sáke, osy bir jınaǵymdy oqyp berińizshi, – dep bar yqylasymen kelip turǵan aqyn, kádimgi ózimizdiń jigitterge uqsaıdy eken.

Bul – izgilik...               

Men Sabyrbekti oqyp kelemin. Ushqa­nyna, qonǵanyna qarap, ishteı tilektes bolyp otyramyn.

«Músátirdi» tilime tıgizip kórdim. Endi osy jınaǵy jaryq kórgen soń satıra – syqaq aqynynyń «Qus joly» aıqyndala túsedi.

Jolyń bolsyn, Sabyrbek!

Satıranyń sary shaly Sadyqbek Adambekov» depti qamqor kókeshim.

Osy alǵysózimen jańa syqaq óleńderim kitap bolyp shyqty. Kókeme arnaıy alyp baryp berdim. Qatty qýandy.

Sol joly biz redaksııanyń aýlasyn­daǵy shaǵyn baýda eskertkishke sýretke tús­tik. Osy sýret kelesi kitabymda jarııa­landy.

Sadyqbek aǵa meniń satıradaǵy sara ustazyma osylaı aınaldy. Bul meniń eń baqytty kúnderim edi. Úlkendi-kishili kez­de­sýlerde, basqosýlarda oqyrmandar: «Ádebıettegi ustazyńyz kim?» dep surap jatady ǵoı. Mundaıda meniń aýzyma bir­den Sadyqbek aǵa túsedi.

Shákirttik mindetim ári boryshym re­tinde uly ustazym týraly estelikter, ma­qa­lalar jazyp turamyn. Asyl aǵa bir­de «Ońtústik Qazaqstan» gazetine meni arnaıy izdep keldi. Qasynda joǵarydaǵy Sábıt Sultanov bar. Túste úsheýimiz bir meıramhanadan tústendik. Júziktiń kózinen ótkendeı bir ádemi boıjetken bizge izetpen qyzmet kórsetti. Qyraǵy kóz­di kókem álgi qyzdyń kelgen-ketkenin baǵyp otyrdy. Áldene kerek bolsa «Aq qa­natty perishtem, kelip ketshi» dep sha­qyrady. Rasynda, álgi arý júrip emes, ushyp kele jatqandaı, aıaǵynyń tyqyry sezil­meıdi-aý. Ár kelgen saıyn kókem qısynyn taýyp qyzdyń qolynan bir súıip qalady.

Mine, osy kózmergen kókeme qasıetti Túrkistannyń topyraǵy buıyrdy. Bir tóbeniń basynda tómpeshik qana bolyp uıyqtap jatyr.

Bir qýanarlyǵy, qazaq ádebıetinde tuńǵysh ret satıralyq roman jazǵan jazýshy retinde Sadyqbek Adambekovtiń esimi altyn áriptermen jazylyp qaldy. Arys qalasynda S.Adambekov atynda­ǵy orta mektep bar. Biraq bul bizge satıra saıypqyrany Sadyqbek kókeme kórsetilgen qurmet áli de az sııaqtanady da turady. Bıyl onyń týǵanyna 100 jyl tolýyna oraı sańlaq satırıktiń kóp tomdyǵy jaryq kórse nur ústine nur bolar edi. Sodan sońǵy mindet Shymkenttegi satıra jáne ázil teatryna Sadyqbek Adambekovtiń esimi berilse dep tanymal satırık, aqyn Kópen Ámirbek ekeýmiz kópten bastama kóterip kelemiz. Bıyl osy tilegimizdi Úkimet hosh kórip, teatrǵa aty berilse, bul da satırık aǵamyzǵa kórsetilgen úlken qurmet bolar edi.

Osydan birshama jyldar buryn Kópen Ámirbek aǵa Sadyqbek Adambekov atyn­daǵy halyqaralyq satırıkter baıqaýyn ótkizdi. Zaman aǵymy men saryny qolaı kórmedi me, álde tıisti mekemeler men bizdiń baı-baıshykeshter demeýshilik jasap, qarjy bermedi me, osy jaqsy bastalǵan úrdis toqtap qaldy. Qazaqtyń jany – kúlki, ázil-ospaq. Kúlki – vıtamın. Kúlki – adamnyń ómirin uzartatyn dámdi dárýmen. Ýytsyz, dostyq ráýishtegi ázil-qaljyń adamdardy tabystyrady, tanystyrady. Qaljyńqoı qazaq bar­lyq qıyndyqtarda boıyndaǵy úreıdi ázil­men jeńgen, el arasyndaǵy kúrmeýli túıin­derdi astarly ázilmen tarqatqan. Endeshe, kúlkiniń kúmbezin kelistirip somdap ketken Sadyqbekteı sara satırıkten neni aıaýymyz kerek?

Bizdiń bul tilegimizdi el bolyp qoshtap, Úkimet, Qazaqstan Jazýshylar odaǵy qol­dap, asyl aǵanyń mereıtoıyn jetim qyz­dyń toıyndaı emes, jetilgen eldiń mere­ıindeı etip óz dárejesinde ótkizer degen úkili úmittemiz.

 Sabyrbek OLJABAI,

Sadyqbek Adambekov atyndaǵy

ádebı syılyqtyń laýreaty