Maınıngtiń masqarasy

Taıaýda ótken Úkimettiń keńeıtilgen otyrysynda Memleket basshysy Qasym-Jomart Toqaev maınıng ortalyqtardyń jumysyn retteýdi tapsyrǵan bolatyn. Tapsyrmanyń alǵashqy nátıjesi – osy.

Qarjy monıtorıngi agenttigi tek­serý jumystary barysynda Ekibastuz GRES-1 kásiporny aýmaǵynda maınıng da­ta-ortalyqtardyń úzdiksiz jumys isteýi úshin elektr energııasyn zańsyz tutyný men satý isi uıymdastyrylyp kelgenin anyqtaǵan. Elektr energııasy jekemenshik kompanııa arqyly eki kásiporynǵa turaqty túrde taratylyp kelgen. Kompanııanyń «Ruqsattar men eskertýler týraly zańǵa sáıkes rásimdelgen eshqandaı lısenzııa­sy bolmaı shyqty. Stansadan elektr jaryǵyn «óndiristik qajettilik retinde» dep kádege jaratypty.

Árıne, mundaı jaǵymsyz aqparat Ekibas­tuz GRES-1 sııaqty alpaýyt kásip­oryn­ǵa abyroı ápermeıtini túsinikti. Ile-shala stansa basshylyǵy resmı jaýap berdi.

– Ekibastuz GRES-1 óndiristik alań­darynda eshqandaı bógde uıymdar nemese obektiler joq jáne bola almaıdy. Stansa aýmaǵynda maınıng fermalar tabyldy degen aqparat shyndyqqa janas­paıdy. Áńgime stansaǵa jaqyn uıymdarda anyq­talǵan maınıng data-ortalyqtary týra­ly aıtylyp jatqan bolýy múmkin. Biraq olar GRES-1 aýmaǵynda ornalaspaıdy. Ári stansanyń olarǵa eshqandaı qatysy joq, – deıdi kásiporynnyń baspasóz qyzmeti.

Ne desek te, quzyrly organdar isti tergeý­­di jalǵastyrýda. Prezıdent tap­syr­ma bermese, zańsyz áreketter áshke­re bolmaı ma sonda? Energetıka mınıstr­liginiń aqparatyna súıensek, buǵan deıin energııa berýshi jáne energııa­ny ótkizetin kompanııalar maınıng ortal­yq­tardyń ornalasqan jeri týraly aqpa­rat bermepti. Shynymen bilmeıdi nemese ja­syryp kelgen. Bul másele de jiti tekserilmek.

Pavlodar oblysy