BAQ – halyq sanasyn ózgertetin negizgi kúsh

Sońǵy bir aıda búkil qoǵam rýhanı kúızelisti bastan keshirdi. Bastysy, el Táýelsizdigi men Turaqtylyǵy saq­taldy. Onyń quny qandaı bolǵanyn bárimiz bilemiz. Memleket basshysy da adam, sondyqtan onyń qańtar zaryn janymen, júregimen sezgeni anyq. Biraq bylaıǵy jurt emosııaǵa berile alsa, el basqarýshysynda mundaı múm­kindik joq. Sondyqtan alańǵa aqkóńilmen shyqqan ańqaý eldi paıdalanyp, aram pıǵylyn iske asyrmaq bolǵandardy taýyp, jazasyn berý – paryz. «Shash pen basty» shatastyratyndar da jazalanady.

Qazaqstan Prezıdentine qoǵamy­myzda qaldyrylǵan «mura» óte aýyr. Qazirgi ýaqyt – bılikke senim kredıti taýsylǵan kezeń. Baı men kedeı arasyndaǵy baılanys qasqyr men qoı «dostyǵyndaı» bolǵan ýaqyt. Jemqorlyq, jaǵympazdyq, ósek, ótirik – qoǵamnyń irińi shyqqan derti­ne aınalǵan zaman. Bizdiń ǵana emes, búkil álem jurtshylyǵynyń saıası, ekonomıkalyq, pandemııalyq qysym­nan júıkesi masanyń da yzyńyn kótere almaı turǵanda, bórik astynan bóltirik shaýyp, eldiń esin shyǵarǵanda el basqarý – úlken jaýapkershilik. Bul júkti tek bir adam alyp júre alatynyna keshegi suhbat taǵy bir dálel boldy.

Memlekettik til Qazaqstanda ult­aralyq til bolady. Tek qazaq qazaq­pen emes, barsha qazaqstandyqtar arasyndaǵy qatynas tiline aınalady. Kúni keshe ózim kórip, kýá bolǵan bes mıllıon ǵana halqy bar Nor­vegııada qanshama ult ókili turǵanymen jergilikti tildi bilmegen janǵa nan tabý qıyn. Talap pen qajettilik joǵa­lý­­­dyń shaq aldynda turǵan tildi osy­laısha qaıta damytty. Mundaı jetis­tiktiń bizde de bolatynyna suh­batta aıtylǵan áńgime senim uıalatty.

Robındranat Tagordyń «Jaratý­shy aldynda jamandyq jasaǵan jáne odan japa shekken adam birdeı jaýapty» degen sózi bar. Iаǵnı Qazaqstan­nyń Jańa tarıhynda bolǵan jáne bolatyn dúnıelerge bárimiz birdeı jaýaptymyz.

Memleket basshysy, ózimiz qyzyǵa qaraıtyn, keıbireýler chemodanyn alyp tura qashqan órkenıetti, damyǵan memleketter qataryna elimizdiń de qosylýyna ár qazaqstandyq belsene aralasýy qajettigine ekpin túsirdi. Ol zań bárimizge birdeı jáne búkil halyq tek zańǵa baǵynýy kerek. Ol – bilim men eńbek. Ol – urlanǵan qarajat­tyń Qazaqstanǵa qaıtyp, ulan-ǵaıyr elimizdiń órkendeýine jumsalýy. Qazaq­stan­nyń da órkenıetti, baqýat­ty, baqytty elge aınalýy úshin árqaısy­m­yzdyń boıymyzdy bılegen úreı men boıkúıezdikten tazartyp, adamı qasıetterimizdi – batyldyq, izgilik, adaldyq, adamgershilik, ultjandylyq, eńbekqorlyǵymyzdy kúsheıtýimiz kerek. Halyq sanasy ózgerse, bılik te basqa bolary anyq.

Halyqtyń sanasyn ózgertetin negizgi kúsh – buqaralyq aqparat qural­dary. BAQ halyqtyń baǵyn ashý, «Jańa ıakı Ádiletti Qazaqstan» jasaý jolynda qyzmet etý kerek. Jaına Slambektiń jasqanbaı jurt kókeıindegi ótkir suraqtardy qoı­ǵany, Memleket basshysynyń ár suraq­qa máımóńkelemeı naqty jaýap berýi sol ózimiz kútken ózgeristerdiń bastal­ǵanynyń aıǵaǵy. Al Siz daıynsyz ba? Osy suraqty árqaısymyz ózimizge qoıýymyz kerek.

Bıbigúl JEKSENBAI,

Bas redaktorlar klýbynyń prezıdenti