Ortalyq kommýnıkasııalar qyzmetinde ótken brıfıngte mınıstrlik ókili qazirgi ýaqytta qar shyǵarý jumystarynyń jalǵasyp jatqanyn, al sý tasqynyna qatysty túpkilikti boljamdy 1 naýryzdaǵy jaǵdaı boıynsha Qazgıdromettiń habarlaıtynyn málimdedi. «Aqpan jáne naýryz aılarynda temperatýra kúrt kóterilip, jańbyr kóp jaýsa, erigen qar men jańbyrdan sý tasqyny bolýy ábden múmkin. Osyǵan oraı qardaǵy sý qorynyń mólsherin, topyraqtyń kúzgi ylǵaldanýyn, topyraqtyń qatý tereńdigin taldaı otyryp, sý tasqyny qaýpi bar aımaqtar anyqtaldy», dedi R.Amrın. Onyń aıtýynsha, Batys Qazaqstan, Soltústik Qazaqstan, Qaraǵandy, Aqmola, Qostanaı jáne Aqtóbe oblystarynda topyraqtyń qatý tereńdigi ótken jylǵy kórsetkishten orta eseppen 6-68 sm-ge tómendegen. «Al qardyń baıaý erýi sý tasqyny kezeńiniń ótýine oń áser etedi» deıdi spıker. «Tótenshe jaǵdaılar mınıstrligi ortalyq jáne jergilikti atqarýshy organdarmen birlesip, kóktemgi sý tasqyny kezeńinde tótenshe jaǵdaılardyń týyndaý qaýpin azaıtý jónindegi is-sharalar keshenin júrgizýde. Basqa apattardyń da, sý tasqynynyń da saldaryn joıýǵa qaraǵanda olardyń aldyn alý ońaı jáne arzan. Bul álemdik tájirıbe jáne tıisinshe, bizdiń saıasatymyz», degen departament basshysy 2021-2023 jyldarǵa arnalǵan sý tasqynyna qarsy is-sharalardyń Jol kartasy iske asyrylyp jatqanyn da jetkizdi.
TJM málimetterine qaraǵanda, sońǵy bes jylda sý tasqynynan elimizdiń on óńirindegi 165 eldi meken zardap shekken. Sý tasqynynyń teris áserin tómendetý maqsatynda mınıstrlik júrgizgen taldaý nátıjeleri kóktemgi sý tasqyny kezinde 1010 eldi mekenniń sý basý qaýpine neǵurlym beıim ekenin anyqtap bergen. Al bul jerlerde 800 myńnan astam halyq turady.
