Konferensııaǵa bıyl 35 el men úkimet basshylary, júzge jýyq mınıstr, halyqaralyq uıymdardyń basshylary qatysty. Olardyń qatarynda BUU, NATO, Eýropalyq odaq basshylary da bar. Bıylǵy konferensııanyń kún tártibindegi basty taqyryp – Ýkraına máselesi boldy. Odan bólek «Bavarııa saraıynda» Reseı men Eýropa máselesi de talqylandy. Sarapshylar qyrǵıqabaq soǵys aıaqtalǵannan beri mundaı forýmdar úlken mańyzǵa ıe boldy degen pikir aıtady. Sondyqtan bul Batystyq forým kóptiń nazaryn aýdardy.
14 jyl boıy «Mıýnhen qaýipsizdik konferensııasynyń» tóraǵasy bolyp kelgen Volfgang Ishınger konferensııa tóraǵalyǵyn Angela Merkeldiń burynǵy keńesshisi Krıstof Hoısgenge tabystaıtyny málim boldy.
Alaıda bul konferensııada tóraǵa óz pikirin jasyrmaı ashyq aıtyp, birqatar eldiń basshylaryna óz pikirin jetkizdi. Bárinen buryn konferensııaǵa qatysýdan bas tartqan Reseı tarapyn synǵa aldy. Buǵan deıin Volfgang Ishınger Reseı prezıdenti Vladımır Pýtın Mıýnhenge shaqyrýdan bas tartqanyn, alaıda onlaın rejimde qatysatynyn aıtqanyn jetkizgen-di. 2021 jyly konferensııa onlaın rejimde ótkizildi. Bıyl tóraǵa «omıkron» shtamynyń taralýyna qaramastan, burynǵy formatqa oralýdy usynyp, saıasatkerler men sarapshylardy Mıýnhenge shaqyrdy. Tóraǵa saıasatkerler qaýipsizdik máselesin jeke kezdesýlerde de talqylaı alýy kerek dep túsindirdi.
Dástúrli túrde Bayerischer Hof qonaqúıinde ótkiziletin jıynda sanıtarlyq sharalar qatań baqylaýda boldy. Pandemııaǵa deıin jıynǵa 2 000-nan astam adam qatysa alsa, bıyl tek 600 delegat shaqyrtý aldy. Uıymdastyrýshylar qatysýshy sanyn taǵy da azaıtýǵa nıetti bolǵan. Sharaǵa qatysýshylardyń barlyǵy koronavırýsqa qatysty ekpe saldyrýy kerek. Sonymen qatar kún saıyn PTR-test tapsyryp, vırýs juqtyrǵanyn ne juqtyrmaǵanyn tekserip turýǵa mindetti.
NATO bas hatshysy Iens Stoltenberg Reseı syrtqy ister mınıstri Sergeı Lavrovqa Ýkraınamen shıelenisti sheshý maqsatynda dıalogti keńeıtý usynysyn bildirgenin ortaǵa saldy. AQSh vıse-prezıdenti Kamala Harrıs Reseı Ýkraınaǵa basyp kirgen jaǵdaıda ekonomıkalyq sanksııalar jarııalaıtynyn eskertti.
Jıyndy qorytyndylaǵan Volfgang Ishınger Reseıdiń qatyspaǵany jaǵdaıdy qıyndata túskenin taǵy bir eskertip, «Mıýnhen qaýipsizdik konferensııasy» negizinen adamzatqa qaýip tóndiretin jahandyq jylyný, klımattyń ózgerýi, pandemııamen kúres sııaqty máselelerdi talqylaý kerektigin, alaıda kúrmeýi sheshilmeı turǵan Reseı-Ýkraına máselesi bıylǵy jıynnyń negizgi taqyrybyna aınalǵanyn aıtyp ótti.
Jıynnan keıin jarııalanǵan 2022 jylǵy Mıýnhen qaýipsizdik baıandamasynda Batys elderinde «toptyq álsizdik» bary atap ótilgen. Bul COVID-19 pandemııasy, klımattyń ózgerýi, geosaıası máseleler saldarynan týyndap otyrsa kerek. Volfgang Ishınger jıynnyń ashylýynda álem elderinde bul máseleni sheshýge qajetti barlyq tásil men qural bolsa da álsizdik máselesi beleń alǵanyn atap ótti. Onyń aıtýynsha, keıbir jaǵdaılar elderdiń qol qýsyryp qarap otyrýǵa da májbúr etken.
Halyqaralyq basqosýǵa AQSh vıse-prezıdenti Kamala Harrıs, AQSh memlekettik hatshysy Entonı Blınken, GFR kansleri Olaf Shols, GFR Syrtqy ister mınıstri Annalena Berbok, GFR Qorǵanys mınıstri Krıstına Lambreht, Ulybrıtanııa premer-mınıstri Borıs Djonson, Polshanyń Úkimet basshysy Mateýsh Moraveskıı qatysty. Sondaı-aq jıynǵa Eýropa odaǵynan úsh kóshbasshy Sharl Mıshel, Ýrsýla fon der Lıaıen, Jozep Borrel keldi. BUU Bas hatshysy Antonıý Gýterrısh te, NATO Bas hatshysy Iens Stoltenberg te, Iran Syrtqy ister mınıstri Hosseın Amır Abdollahıan da jıynda boı kórsetti.
