Bizdiń úı sonyń irgesinde edi...

Bizdi sol habarda tolqytqan, tolǵan­dyrǵan erekshe bir án edi. Án degende, Júrsin Ermannyń ataqty «Qasymnyń úıi» degen óleńine jazylǵan ǵajap áýen. Avtory – sol baǵdarlamaǵa shaıyrdyń shashbaýyn kótere kelgen aqyn Serik Qalıev.

«Degeni qaıda – basyldy quıyn?

Aqylym jetpeı, ashıdy mıym:

Vınogradov kóshesindegi,

Qıratyp jatyr Qasymnyń úıin»,

dep bastalǵan ǵajap týyndy adamdy birden ózine baýrap áketedi.

Ándi tyńdap otyrǵanda kez kelgen myq­ty aqynnyń basyndaǵy tragedııa – ol aqıqatynda búkil adamzat basyndaǵy aýyr taǵdyr ekenin uǵasyń...

«Júırigim edi jyr kóshindegi,

Baýyryn jazyp bir kósilmedi.

Qıratyp jatyr Qasymnyń úıin...

Bizdiń úı sonyń irgesinde edi!»

Oılanyp qalmasyńa shara joq... Biraz ýaqytqa deıin únsiz qalǵyń keledi. Ishińdi oı jeıdi. О́z-ózińdi suhbatqa shaqyrasyń...

Aqyn sonda daýylpaz Qasym úıiniń irgesindegi qaı úıdi aıtty?

Bálkim ol óziniń ala quıyn aqyn taǵ­dyry buıyǵy ǵana kún keship jatqan kish­kene qujyrasyn meńzedi... Bálkim, bári­mizdiń de bul ómirde turaq etetin, meken qylatyn ǵumyr-qosymyzdyń bir kúni qıraı qulaıtynyn aıtty?

Bálkim, bálkim...

Bizdińshe, sol qırap jatqan shaıyr sha­ńy­raǵynyń irgesinde barlyǵymyzdyń úıi­miz tur edi.

Keıin.

Keıin álgi habar kóp ótpeı elimizde dúr­beleń bastaldy. Qaıǵyly qańtar oqıǵasy oryn aldy.

Keshe ǵana ısi qazaqqa baıtaq astana bolǵan, áli de rýhanı elordamyz sanalatyn arý Almatymyz otqa orandy, oqqa ushty. Qanshama jazyqsyz jandar shahıd keshti... Záýlim ǵımarattar qırady, shahar aıaýsyz tonaldy. Shynylar shaǵyldy, edender opy­ryldy.

Qoǵam alasapyran kúıge tústi. Biri – shyn jan ushyrdy. Táýelsizdigimizge shyn mánin­de sát saıyn qaýip tónip kele jat­qanyn, azattyǵymyz qyl ústinde turǵanyn shyryldaı aıtty. Biri – órtengen úıdiń qasyna kelip qoıynyń basyn úıitip alǵysy keldi.

Sol qaraly qańtar tragedııasy kezinde arý shaharda órtengen, qıraǵan, shańyraǵy ortasyna túse opyryla qulaǵan ár úıdiń irgesinde siz ben bizdiń úıimiz turdy.

Ony biraz el sezdi, biraz el qannen-qa­persiz tátti uıqylarynda jata berdi.

Esenǵalı Raýshanovtyń «Joq, kún tu­tylǵan joq, Meniń kóńilim tutyldy» dep bas­talatyn ǵajap óleńi bar. Dál sol sııaq­ty. Almaty órtengen joq, bizdiń óze­gimiz ór­tendi. Eger biz «Ár qazaq – me­niń jalǵyzym» degen sózdi shyn túsinip aıta alǵan bolsaq, onda bizdiń úı sol Alma­tynyń qıraǵan ár ǵıma­ratynyń irge­sinde, joqshylyqtyń jasyl jalynyna órte­nip ólgen bes baldyrǵannyń jyrtyq lashy­ǵy­nyń qasynda turýy kerek edi.