Búgin Sáken Seıfýllınniń atylǵanyna 84 jyl toldy. 84 jyl buryn qyzyl úkimet qazaq halqynyń zııalylaryn qynadaı qyryp saldy. Qasiret qanyna boıalǵan qaraly kúndi qazaq halqy eshqashan jadynan shyǵarǵan emes. Ulty úshin oqqa ushqan batyr babalardy jyl saıyn eske alý dástúrge aınaldy.
Nur-Sultan qalasynda ornalasqan Sáken Seıfýllın mýzeıi qurylǵan otyz jyldan asa ýaqyt ishinde Sákenniń týǵan kúni men atylǵan kúnin atap ótýdi ózine paryz etken. Is-sharaǵa belgili Sákentanýshylar men qoǵam qaıratkerleri shaqyryldy. Alǵashqy sózdi Mýzeı basshysy, Memlekettik syılyqtyń laýreaty, aqyn Nesipbek Aıtuly alyp, Sáken atylǵan qasiretti kún týraly kúńirene tolǵandy. Sol zamandaǵy qazaqtyń talaı arysynyń baqılyq bolǵanyn ashynyp aıtty. Qyzyl úkimettiń qanǵa malynǵan qylyshynyń kesirinen talaı marqasqalarymyzdan aıyrylyp qalǵanymyzdy taǵy bir ret eske saldy.
Budan soń aqyn, QR Jazýshylar odaǵynyń múshesi, halyqaralyq «Alash» ádebı syılyǵynyń ıegeri aqyn Ǵalym Jaılybaı jalǵastyrdy. Ol Sáken ómiri týraly syr shertip, Sáken taǵylymy týraly tolǵanyp, Alash ardaqtysyna arnalǵan óleńin oqydy. Sákenniń aqyndyǵy men azamattyǵyna toqtala kelip, qyrǵyz degen ataýdan arylýymyzǵa tikeleı sebep bolǵan Sákenge qazaq halqy qaryzdar ekenin tiline tıek etti.
Keıinnen Sákenniń naǵashy qaryndasy Asylgúl Ábish sóz alyp, Sákenniń ómiri jaıly sóıledi. Sákendi taný qazaq jastaryna paryz ekenin taǵy bir eske saldy. Sákenniń sáni, áýelegen áni týraly tebirene tolǵady.
Qaraǵandy oblysy Nura aýdanynynyń Ahmet aýylyndaǵy Sáken mektebiniń dırektory Atymtaı Balabıev te sóz sóılep, Sákenniń bilim salasyna qosqan úlesi, ashqan mektepteri týraly tolyqqandy málimetterimen bólisti. Qoǵam qaıratkeri Oralbaı Ábdikárimov basshylyq etetin «Sáken qorynyń» ókilderi de gúl shoǵyn qoıý rásimine qatysty.
