Áriptestik baılanystar áleýeti zor

Táýelsiz Qazaqstan Prezıdenti Nursultan Nazarbaev alǵa tartqan ıntegrasııalyq ıdeıalar memleketaralyq yntymaqtastyqty nyǵaıtý qadamdaryna qýat berýde. Kúni keshe astanalyq Aqmola oblysynyń ákimi Qosman Aıtmuhametovtiń Kanadanyń Qazaqstandaǵy Tótenshe jáne ókiletti elshisi Stıven Mıllermen kezdesýinde osy máseleler keńinen talqyǵa salynyp, naqty sheshimder qabyldandy. Qabyldaýda óńir basshysy aýyl sharýashylyǵy men óndiris salasynda birlesken jobalardy júzege asyrýda Kanada Aqmola oblysynyń senimdi áriptesi ekendigin atap kórsetti. Máselen, 2013 jyly oblystyń Kanadamen taýar aınalymy 35,7 mıllıon AQSh dollaryn qurap, 2012 jylmen salystyrǵanda eki ese artyq kórsetkishke qol jetkizildi. Aıryqsha kóńil qoıarlyq jumystyń biri retinde, 2011-2013 jyldar aralyǵynda, etti qara mal sharýashylyǵyn damytý baǵdarlamasy sheńberinde, Kanadadan 1781 bas asyltuqymdy mal jetkizilgeni atap ótildi. Qazirgi tańda ozyq tehnologııa talaptarynda kútimge alynǵan maldan joǵary ónim alynýda. Sońǵy eki jyldyń tól tógimi nátıjesinde qosymsha tabyndar qatary aıtarlyqtaı kóbeıdi. Sondaı-aq, búgingi kúni Aqmola oblysynyń aýyl sharýashylyǵy taýar óndirýshileriniń balansynda 693 birlik kanadalyq ozyq tehnıka bar. Onyń jalpy quny 14,8 mıllıard teńgeni nemese 99,3 mıllıon AQSh dollaryn qurap otyr. Kezdesýge qatysýshy jergilikti taýar óndirýshiler men aýyl sharýashylyǵy mamandary Aqmola óńiri men Kanada ǵalymdary Shortandy aýdanyndaǵy A.I.Baraev atyndaǵy ǵylymı-zertteý ınstıtýtynyń bazasynda azyqtyq soıanyń aýdandastyrylǵan seleksııasyn jasaýda birlesip jumys istep kele jatqanyna rızashylyq bildirdi. Túpki maqsat – qatal klımattyq jaǵdaıda mańyzdy ónimniń 70-75 kúnde pisip-jetilýin qamtamasyz etý bolyp otyr. О́z kezeginde, Kanadanyń elimizdegi Tótenshe jáne ókiletti elshisi Stıven Mıller baıyrǵy áriptestik baılanystardy nyǵaıtyp,  aımaq sharýalary men kásipkerler qyzmetin óristetýge múddeli ekendigin málimdedi. Sonymen birge, ol memleketaralyq ıntegrasııany damytý maqsatynda Aqmola oblysynyń delegasııasyn Kanadaǵa kelip qaıtýǵa shaqyrdy. Oblys ákimi elshi yqylasyna rahmet aıtyp, aýyl sharýashylyǵy men óndiris salasyndaǵy eń sońǵy jobalarmen tanysyp, tájirıbe almasý maqsatynda Kanadaǵa arnaıy delegasııa baratynyn aıtty. Baqbergen AMALBEK, «Egemen Qazaqstan». Aqmola oblysy.