Áz Naýryzdy úlken-kishi jarysa kútetini aqıqat. Arqanyń aıazy báseńsip, kún jylýy da sezile bastady. Elimizdiń túkpir-túkpiri Ulystyń uly kúnin toılap jatqanda, elordalyq balalar da meıramnan tys qalǵan joq. Atap aıtsaq, Astana qalasyndaǵy №57 «Saltanat» balabaqshasynyń balaqaılary áz Naýryzdy án-bıimen, taqpaqtarymen qarsy aldy. Úsh aı boıy Jer-anany tońdyrǵan qar men sýyq yzǵardyń ketý men jer aıaǵynyń keńýin, oǵan qosa Uzynsaryny kútken, oıyn-dýmandy ańsaǵan balalardyń qýanyshynda shek joq.
Jyr syılaǵan, nur syılaǵan tirlikke,
Qasterledik, qadirińdi bildik te.
Qutty bolsyn, Ulys kún jumyldyrǵan,
Bárimizdi yntymaq pen birlikke, – dep biri taqpaqtatsa, ekinshileri kórinister qoıdy. Qyryqtyń biri Qydyr ata kelip, balalarǵa bata berdi. «El bolam deseń, besigińdi túze» degen támsil bar. Tektiligi tereńde jatqan elimizdiń bala tárbıesine basa nazar aýdarǵany belgili. Árdaıym urpaǵynyń rýhanı baı azamat bop ósýine kóńil bólgen halqymyz balasynyń dene bitiminiń durys qalyptasý men aqyl-oıynyń jetilýi úshin ulttyq oıyndardy oınatýdy jón kórgen. Qazirgi kúni de qala balasy óz tamyrynan alshaqtap ketpesi úshin balabaqshadan bastap halyqtyq pedagogıkany boılaryna sińirip ósirýde. Onyń dáleli, balaqandardyń ózderi oınaǵan, kórsetken arqan tartysy, qyz qýý oıyndary. Bul salt-dástúr balany jaqsydan úırenýge, jamannan jırenýge baýlýdyń kórinisi.
Basy barlyq yrystyń,
Basy barlyq uly istiń,
Qutty bolsyn, Naýryz toıy –
Uly kúni ulystyń!
Venera TÚGELBAI,
«Egemen Qazaqstan».
