Atalǵan konferensııany «Dýbna» memlekettik ýnıversıteti, Reseı Jaratylystaný ǵylymdary akademııasy, Reseı geologııalyq qoǵamy jáne V.Vernandskıı atyndaǵy memlekettik geologııalyq murajaı uıymdastyrǵan bolatyn.
Aıta ketý kerek, jeńimpaz jup Qazaqstannan qatysqan jalǵyz-aq komanda bolypty. Al jalpy, konferensııada bular úzdik shyqqan «Adamnyń sharýashylyq qyzmetinde taý jynystary men mıneraldaryn qoldaný» baǵyty boıynsha 14 joba synǵa túsken.
Joba jetekshisi – geografııa pániniń muǵalimi Janar Baımetovanyń aıtýynsha, oqýshylar Qaraǵandy aýmaǵynda kómirdiń paıda bolýynyń geologııalyq erekshelikterin jáne ony zamanaýı kómir ónerkásibinde qoldaný tehnologııasynyń qyr-syryn ashý jolynda jemisti eńbek etken.
Al Dalıla Qýanyshova atalǵan konferensııaǵa eki aı boıy daıyndalǵandaryn aıtady.
– Bul – bizdiń ortaq eńbegimiz. Shynymdy aıtsam, birinshi oryn alamyz degen oı úsh uıyqtasaq túsimizge kirmegen edi. Qýanyshymyzda shek joq. Bul jeńis bizge senimdilik berdi, ilgeri jyljýǵa yntalandyrady. Aldaǵy ýaqyttaǵy josparymyz zor. «Kómir ónerkásibiniń ekologııaǵa jáne qorshaǵan ortaǵa áserin eskere otyryp damýy» taqyryby boıynsha jumys isteımiz degen nıetimiz bar, – deıdi D. Qýanyshova.
Qaraǵandy oblysy
