Damýǵa birlikten basqa jol joq

Qazaqstan táýelsizdigin endi alǵan kezde aldymen mán beriletin ózekti máselelerge basymdyq berilgeni aıan. Elbasy Nursultan Nazarbaev qazaqtyń keń dalasyn jaılaǵan túrli ulttar ókilderiniń arasyndaǵy tatýlyq pen birlikti, túsinistikti nyǵaıtýdy ózekti másele etip aldy. Bul tegin emes edi. Jalpy memleketti damytý reformalaryn qolǵa alǵanda eń keregi sol qoǵamda ómir súrip otyrǵan ulttar ókilderiniń tynyshtyǵy, birligi, túsinistigi bolyp tabylady. Atalarymyz: «Bir kún urys bolǵan úıdiń qyryq kún berekesi ketedi» degen emes pe? Yntymaq bar jerde memlekette kóp jaqsy ister atqarylatynyn, ekonomıkanyń, áleýmettik salanyń qalypty damıtyndyǵyn bizdiń táýelsiz elimizdiń tarıhy pash etip otyr. Qazaqstan óziniń tarıhynda kóp ult ókilderi mekendegen el bolyp qalyptasty. Sondyqtan qoǵamda túrli ult ókilderiniń syılastyǵyn, túsi­nis­tigin saqtaý úshin bir kúsh qajet boldy. Ol – Elbasymyz Nursultan Nazarbaevtyń bastamasymen qurylǵan Qazaqstan halqy Assambleıasy bolatyn. Álemdegi oqıǵalarǵa qarap otyryp, Elbasynyń bul saıasatynyń ómirsheń ári ózekti ekenine kóz jetkizemiz. Qazaqstan halqy Assambleıa­synyń óz ereksheligi bar. Onyń tóraǵasy Memleket basshysy Nursultan Nazarbaevtyń ózi bolyp tabylady. Uıym memleket tarapynan qoldaý taýyp otyr. Ekinshiden, etnomádenı birlestikter joǵarydan, bıliktiń aıtýymen emes, tómennen qoldaý taýyp, ár ult ókilderi ózderiniń ynta-yqylasymen quryp jatyr. Parlament Májilisindegi 107 depýtattyń 9-y Qazaqstan halqy Assambleıasynan bardy. Olar Qazaqstandaǵy barlyq ulttar ókilderiniń múddesin qorǵaıdy, eldiń birligin oılaıdy. Qostanaı oblysynyń orta­lyǵynda 18 etnomádenı ortalyqtar jumys isteıdi. Al oblystyń ózge aýdandary men qalalarynda taǵy da 60 osyndaı uıymdar bar. Olardyń barlyǵy da ózderiniń tilin, dástúrin, mádenıetin saqtaý úshin júrgizetin sharalardy ótkizgende memleketten qarjylaı qoldaý tabady. Biz ǵylymı-saraptaý tobynyń músheleri aýdandar men qalalarǵa jıi shyǵyp, etnomádenı ortalyqtar jumysymen tanysamyz, turǵyndarmen kezdesemiz. Jaqynda A.Baıtursynov atyn­daǵy Qostanaı memlekettik ýnıversıtetinde de stýdentter assambleıasy quryldy. Onda 7 ulttyń ókili bas qosady. Olar qurǵan etnomádenı birlestik qyzyqty sharalardy bastap ta ketti. Maqsaty  – qazaqstandyq patrıotızmdi nasıhattaý, eldiń damýyna úles qosý. Qalqaman JAQYP, oblystyq Qazaqstan halqy Assambleıasy ǵylymı-saraptaý keńesiniń múshesi, A.Baıtursynov atyndaǵy Qostanaı memlekettik ýnıversıtetiniń professory. QOSTANAI.