Qazaq qyzy qaıran qaldyrdy

«Astana Opera» memlekettik opera jáne balet teatrynyń jetekshi solısi Áıgerim Beketaevaǵa Býdapesht pen London bıigin baǵyndyrý múmkindigi týyp tur. Reseıdiń halyq ártisi Borıs Eıfmannyń bul tańdaýy negizsiz dep aıta almaısyz. Elordalyq óner ordasy jaqynda Marııa teatryna gastroldik saparmen baryp qaıtqan bolatyn. Sankt-Peterbýrg memlekettik akademııalyq balet teatry dırektorynyń kózine qazaqtyń qaǵylez qara qyzy shoqtaı basyla ketti. Áıgerimniń sahnada jany úzilip ketip bara jatqan aqqýdyń beınesin somdaýdaǵy keremet sheberligine tánti bolǵan rejısser jas qyzdyń shyǵar bıigi munan da joǵary bolaryn ishteı moıyndap qoıdy. Ne nárseni de óte muqııat tekserip, zerttep baryp qana ishki oıymen bólisetin kánigi maman astanalyq aqqýdyń kásibı deńgeıine óte joǵary baǵa berdi. Munyń dáleli – ony óz trýppasyna qosyp, sáýir aıynyń alǵashqy kúnderi Býdapeshtte, al 15-i men 19-y aralyǵynda Londonda, «Kolızeı» teatrynda ótetin gastroldik saparǵa dál osy juldyzben baratynyn jarııa etti. Reseıdiń halyq ártisiniń bul usynysyn elordalyq ónerpaz qýana qup aldy. Eske sala ketetin bolsaq, B.Eıfman buǵan deıin «Astana Opera» teatrynda «Roden» baletin sahnalaǵan bolatyn. Al názik te kórkem qyz Kamılla Klodeldiń beınesin somdaýymen kórermen súıispenshiligine ıe bolǵany óz aldyna bólek áserge bóleıdi. Býdapesht pen London saparyna qaıta oralsaq, jas ártis eýropalyq sahnalarda da osy róldi oryndamaq. Bul árıne, ońaı olja emes. Sebebi, atalmysh balettiń horeografııa­sy ádettegi klassıkalyq shyǵarmaǵa qaraǵanda óte kúrdeli ári ózindik ereksheligi taǵy bar. Mundaǵy basty keıipker adamnyń denesi jáne onyń múmkindikteri bolyp tabylady. Jetekshi solıstke sondyqtan óte joǵary jaýapkershilik júktelip otyr. Birinshiden, bul «Roden» baletiniń Londondaǵy tusaýkeseri desek, ekinshiden, Borıs Eıfman óz trýppasyna basqa tea­trdan birde-bir ártisti tartqan emes, mundaı tańdaýdyń qazaq qyzyna túsýi jaı kezdeısoqtyq deý de jańsaq pikir. Jas teatrdyń balet trýppasyn, onyń ishindegi ásirese, Áıgerim Beketaeva sııaqty jaryq juldyzdardy reseılik maıtalman áldeqashan moıyndap qoıǵan desek, mine, osy oı shyndyqpen janasatyn pikir. Á.Beketaeva týraly naqtylaı ketsek, ol – Almatydaǵy A.V.Seleznev atyndaǵy horeografııalyq ýchılısheniń túlegi. 2012 jyly Varnadaǵy (Bolgarııa) balet ártisteriniń, bir jyldan soń Rýdolf Nýrıev atyndaǵy balet ártisteriniń halyqaralyq konkýrstarynyń laýreaty jáne balet ártisteri men horeograftarynyń XII halyqaralyq konkýrsynyń (Máskeý) dıplomanty. Balerına ózi úshin jańa eıfmandyq janrdy ashqanyn jáne búgingi tańda aldyna qoıǵan maqsatqa jetý jolynda aıanbaı ter tógip júrgenin aıtady. Osy rette, óziniń biraz jetistikke qol jetkize alǵanyn da jasyrmaıdy. «Men óz keıipkerimniń qandaı sezim-kúıde, emosııalyq jaǵdaıda bolǵanyn dálme-dál jetkizý úshin ol jaıly kóptegen kitaptar oqyp, fılmder kórdim. О́te kóp jumys jasaldy, maǵan deıin bul róldi oınaǵandar sahnadaǵy sezimdi múltiksiz jetkizip, sondaǵy atmosferany uǵyndyra alý úshin tipti, júıke aýrýlaryn emdeıtin aýrýhanalarǵa deıin bas suǵýǵa týra kelgenin aıtty», – deıdi ol. Áıgerim arada biraz jyldar ótkende onyń Kamıllasy da adam tanymastaı bolyp ózgerip shyǵaryna ımandaı senedi. Balet trýppasynyń kórkemdik jetek­shisi Tursynbek Nurqalıev «Astana Opera» teatrynyń solısteri ózge elge baryp óner kórsetýge kásibı jaǵynan óte joǵary deńgeıge jetkenin tilge tıek etken edi. Bul baılam elordalyq jas teatr aty men zaty jaǵynan álemdik teatrlarmen salystyrǵanda kem túspeıdi degen sózdi esh qymsynbaı aıta júrýimizge ıtermeleı túsedi. Jetiqara QOŃYR.