Kókpekti kárin kórsetti

Burnaǵy kúni túnde Qaraǵandy oblysy Buqar jyraý aýdanyndaǵy Kókpekti sý qoımasyndaǵy plotınanyń jyrylyp ketýine baılanysty Kókpekti aýylyn topan sý basyp qaldy. Joǵarydan kóp aǵyn sýdyń kelip quıylýy men shlıýz kamerasynyń ótkizý qabiletiniń nasharlyǵy saldarynan tasqynnyń plotınadan asyp túsý yqtımaldylyǵy 18 saǵat 30 mınýtta baıqaldy. Osyǵan baılanysty Kókpekti aýylynyń ózen jaǵalaýyna ornalasqan 70 úıi  men Qaraǵandy qalasyna qarasty Sortırovka eldi mekeniniń 30 úıine jaǵdaı habarlanyp, turǵyndardy basqa jaqqa kóshirý oryn alyp qalýy múmkin ekeni eskertildi. Turǵyndardyń kóshiriletini týraly aqpar Kókpekti jáne Nura ózenderi jaǵalaýlarynda turatyn turǵyndardyń barlyǵyna jetkizildi. Ol úıme-úı aralap shyǵý tártibimen júrgizildi. Alaıda, jaǵdaı oılaǵannan da tez óris alyp ketti, 31 naý­ryz kúni túngi 1 saǵat 30 mınýtta sý plotınanyń erneýinen asyp ketti. Nátıjesinde Kókpekti aýylynda 810 adamy bar 100 úıge tasqyn sý lap qoıdy. Sýdyń deńgeıi birden 1,5-1,8 metrge jetti. Túngi 2 saǵat 45 mınýttan keıin ǵana kenttegi sýdyń deńgeıi qaıta bastady. Tótenshe jaǵdaıdy joıý men sý basqan jerlerdegi turǵyndardy kóshirýge Tótenshe jaǵdaılar mınıstrliginiń quramynda 124 adamy men 15 joǵary ótimdi tehnıka birligi bar azamattyq qorǵanys polki, medısınalyq apat bólimsheleri, qutqarýshylary tartyldy. Júrgizilgen jumystardyń nátıjesinde Kókpekti kentiniń 125 adamy qutqaryldy. Qutqarý jumystary barysynda qaza tapqan 5 adamnyń deneleri tabyldy. Medısınalyq pýnktke 9 adam kómek surap kelse, olardyń 6-ýy shuǵyl aýrýhanaǵa jatqyzyldy. Keshe tańerteń oqıǵa bolǵan jerge Tótenshe jaǵdaılar mınıstri Vladımır Bojko ushyp keldi. Jaǵdaıdy 7 baǵytta zertteý maqsatynda tótenshe jaǵdaılar, ishki ister organdary, ákimdikter, densaýlyq saqtaý salasy qyzmetkerlerinen quralǵan  7 top qurylyp, jumys jasaýda. Qazirgi tańda tótenshe jaǵdaılar qyzmeti qutqarý jumystaryn jalǵastyryp jatyr. Oryn alǵan oqıǵaǵa baılanysty qylmystyq is qozǵaldy. QARAǴANDY.