Aýyl sportzaly atshaptyrym jerden kózge iligedi eken. Turǵyndardyń aıtýyna qaraǵanda, eńseli ǵımarattyń ishi bir bosaǵan emes. Tań sáriden júzden asa adam kelip árqıly jattyǵý ótkizedi. Dátke qýaty, kóńiliń qalaǵan sportpen aınalysýǵa qajetti qural-jabdyqtardyń bári bar. Fýtbol, basketbol jáne voleıbol alańdary muntazdaı tap-taza, jańa zamannyń talabyna saı jasaqtalǵan.
– Sportzalda ulttyq sport túrlerimen aınalysýǵa bar múmkindik týdyrylyp otyr, – deıdi aýyl okrýginiń jastar isi jónindegi mamany Ibragım Ybaev, – balalarmen arnaıy jattyqtyrýshy jumys isteıdi. Jastar arasynda ulttyq sport túrlerin meńgerýge degen yqylas ta zor. Úzbeı daıyndalǵannan keıin aýdandyq, oblystyq jarystarda júldesiz qalǵan kezimiz joq.
Osydan úsh jyl buryn shaǵyn ortalyq ashylypty. Bir kezde qaraýsyz qalǵan ǵımarat eken. Qazir qurqyltaıdyń uıasyndaı jyp-jyly, baqytty balalyq mekeni. Osy bir mysaldan-aq keıbir aýyldarda bos turǵan ǵımarattardy ıgilikke aınaldyrýǵa bolatyndyǵyna kózimiz jetti. Tek el qamyn jegen nıet bolsyn deńiz. Áıtpese, óńirdegi kez kelgen eldi mekende zamanynda klýb úıi, sportzaly bolǵan ǵımarattardyń qazir eshkimge kerek bolmaı, bosqa qaýsap jatqandyǵyn kóz kórip júr. Al mundaǵy balalar ortalyǵyndaǵy atshaptyrym bólmeler, balalardyń oıyn jáne jatyn oryndary tap-tuınaqtaı. О́zge de barlyq jaǵdaı týǵyzylǵan. Tipti oblys ortalyǵyndaǵy osy tektes mekemelerden synyq súıem kemdigi joq.
– Balabaqshaǵa 15 bala keledi. Tálim-tárbıe jumystary barlyq talapqa saı, balalar ortalyǵynyń tárbıeshisi Taısa Modarbıeva, bir aıta keterligi, úlkenderden kórgen ónegesi bolar, kishkentaı balalar da sport dese janyp turady.
Osyndaı ónegeli óris qalyptasqan aýyldyń tynys-tirshiligi kórgen kózdi qýantarlyq. Jaqsy ister jarasymdy qalyppen damyp jatsa, tutas aımaqtyń ajary kirip qalar edi-aý.
Aqmola oblysy,
Sandyqtaý aýdany
