Atalǵan qujatqa sáıkes, Qazaqstanda JEK salasyndaǵy barlyq jobalar ınvestorlardyń menshikti jáne qaryz qarajaty esebinen iske asyrylady. Jáne de memleket óz tarapynan JEK nysandary óndiretin elektr energııasynyń barlyq kólemin belgilengen tarıf nemese aýksıondyq baǵa boıynsha kepildi satyp alý arqyly qoldaý kórsetip, JEK nysandaryn qoldaýǵa arnalǵan tarıf boıynsha dástúrli stansalar arasynda bóledi. Buǵan qosa, shaǵyn kólemdi JEK jobalary úshin memleket jergilikti atqarýshy organdar deńgeıinde shyǵyndardy ishinara sýbsıdııalaıdy.
Respýblıkada jańartylatyn energııa kózderi turaqty túrde ósýde. Sońǵy 7 jylda JEK obektileriniń belgilengen qýaty 11 ese, ıaǵnı 2014 jylǵy 177,52 MVt kórsetkishten 2021 jylǵy 2010 MVt-qa deıin ósti.
Energetıka mınıstrliginiń derekterine silteme jasalǵan taldamalyq sholýda atap ótilgendeı, Qazaqstandaǵy JEK resýrstyq áleýeti mynadaı kórsetkishtermen baǵalanady:
- jel energetıkasy – jylyna 920 mlrd kVtsaǵ;
- gıdropotensıal – jylyna 62 mlrd kVtsaǵ;
- kún energetıkasy – jylyna 2,5 mlrd kVtsaǵ;
- geotermaldyq sýlardyń jylý áleýeti – 4,3 GVt.
Qazaqstandyq iri elektr energetıkalyq holdıng sanalatyn «Samuryq-Energo» AQ quramynda búginde 5 JEK nysany jumys isteıdi. 2021 jyly olardyń elektr energııasyn óndirýdegi jıyntyq kólemi 325,3 mln kVts qurady. Bul Qazaqstandaǵy barlyq JEK obektileri óndiretin elektr energııasy kóleminiń 7,7%-yn qurap otyr.
«Samuryq-Energo» kásipornynda kúrdeli jobalardyń, onyń ishinde kompanııanyń 2022-2031 jyldarǵa arnalǵan Damý strategııasyna engizilgen energııa aýysý maqsatyndaǵy «jasyl» jobalardyń tizbesi ázirlendi. Bul jerde áńgime qazirgi tańda Aqmola oblysynyń Ereımentaý qalasy aýdanynda salynyp jatqan qýaty 50 MVt bolatyn, Almaty oblysynyń Eńbekshiqazaq aýdanyndaǵy qýaty 60 MVt bolatyn jel elektr stansalary týraly, sondaı-aq Shelek dálizindegi qýaty 240 MVt-tyq JES pen qýaty 71 MVt bolatyn sý elektr stansasynyń quramdastyrylǵan jobasy jáne Ile ózenindegi qýaty 40,6 MVt bolatyn Kerbulaq SES-i týraly bolyp otyr.
