Beıbit sherý quqyǵy, zańnyń ádil ári bárine birdeı ústemdik etýi, jasandy monopolııanyń yqpalyn tejeý el eńsesin tiktep, senimin arttyrǵanymen dál mundaı saıası reformaǵa qarsylyqtyń, teketires pıǵyldyń da bolǵany belgili. Keshegi «Qańtar qasiretiniń» kórinisi osynyń aıǵaǵy. Eki jarym jyl ishinde memleketti nyǵaıtý kezeńi iri saıası reformalardy bastan keshirip otyr. Ár Joldaýda saıası júıeniń jańa formýlasy usynylyp, halyq áleýmettik múmkindikterge qol jetkizdi.
Búgingi Joldaýdaǵy Semeı, Jezqazǵan, Almaty óńirleriniń oblys mártebesin qaıta ıelenýi halyqty erekshe qýanyshqa keneltti. Oblys mártebesinen aıyrylǵan qalalardyń ınfraqurylymynyń tozyǵy jetkeni de ras, halyqtyń turmysynyń tómendep ketkeni de ras. Endi osy olqylyqtyń orny tolyp, eldiń kórkeıýine jańa jol ashyldy dep oılaımyz. Úmit oty jandy. Keshegi ótken kóńildegi qaıaýdyń orny joǵymyzdy bútindep, jaramyz jazylǵandaı bir-birimizden búgin súıinshi surasyp, qýanyshtyń kýási boldyq. Joǵaltqanymyzdy taýyp, oljaly bolyp otyrmyz.
Memleket basshysy Qasym-Jomart Toqaevtyń: «Men halyqtyń erteń dep emes, búgin baqytty bolǵanyn qalaımyn. Maǵan jeke adamdardyń baǵasy emes, halyqtyń bergen baǵasy qymbat» degen tulǵalyq sózi tebirentti.
Buqaralyq aqparat quraldary básekelestigin arttyrý, otandyq aqparat quraldarynyń álemdegi oqıǵalarǵa baılanysty óz kózqarastarynyń bolýy, aıtaqqa, qalamaqyǵa, suranysqa «qyzmet» kórsetip ketetin jylpostyqtyń qoǵamǵa tıgizer zardabynan saqtaný kerektigi de ashyq, anyq aıtyldy. Tipti «Buqaralyq aqparat quraldary týraly» zańdy qaıta qaraý kerektigine mán berdi. Sonymen qatar Ulttyq qoǵamdyq keńestiń Ulttyq quryltaıǵa aınalýy – halyqtyń óziniń aralasýymen jańa qoǵam qurý, bastamashyl, isker, saıası orta qalyptastyrýǵa múmkindik berý. Bul, árıne bir adamnyń ǵana sheshim shyǵarýyna muqtajdyqtan arashalaıdy. Osyndaı tájirıbeler arqyly saıası ınstıtýttar jetildirý kerektigin meńzedi.
Joldaýdaǵy maqsat-múdde – úlken betburys. Jańa Qazaqstan túbegeıli jańǵyrýǵa bet aldy. Táýelsiz eldiń erteńgi tarıhy búgingi kúnniń jeńisi bolmaq.
Roza MUQANOVA,
dramatýrg,
Memlekettik syılyqtyń laýreaty
