Joldaýdy ýnıversıtettiń professor-oqytýshy quramy, stýdentter, barlyǵymyz úlken yntamen tyńdadyq. Shyn máninde ómirimizdegi iri saıası oqıǵa boldy dep esepteımiz. Oblys bolý máselesin bárimiz burynnan aıtyp júrgen edik. Biraq mynaý pandemııa degen bas kótertpeı turǵan kezde qabattastyrmaıyq deıtinbiz. Onyń ústine qańtardaǵy memlekettik tóńkeris jasaýǵa umtylǵan sodyrlardyń soıqany taǵy bir eńsemizdi túsirse, aınalamyzdaǵy geosaıası jaǵdaı da asa qıyn ekendigin bilesizder. Shynymyzdy aıtsaq, alaǵaı-bulaǵaı kezde jaǵdaıymyzdy aıta bermeıik dep júrgenbiz. Sóıtsek, Prezıdentimiz kóregendik kórsetip, halyqtyń uzaq jyldar boıǵy suranysyna qulaq asty. Álemdik dárejedegi iri memleket qaıratkeri, dıplomat ekendigin, kóregen basshy ekendigin kórsetti.
Endigi kezekte, Abaı oblysy dep syrtqy belgimiz ǵana aýysyp qoımaı, bizdiń ómirimizge úlken jańalyq ákeledi dep oılaımyn. Mysaly, Taldyqorǵan oblysy jeke oblys bolǵan soń qulpyryp, jaınap ketti. Búginde iri megapolıske aınalyp barady. Soǵan qarap úlken úmit kútemiz. Bári sátimen júzege asyp jatsa, Abaı oblysynyń ortalyǵy, Semeı qalasy qazaq eliniń sáýletti de, dáýletti qalasyna aınalady dep oılaımyz, senemiz.
Jańaǵy jańalyqty estigende bir-birimizdi qushaqtap, kóshedegi jurt súıinshi surasyp, kózderine qýanyshtyń ystyq jasy keldi. Prezıdent eldiń kókeıinde júrgen máseleni salmaqtap, saralap batyl sheshim jasaýy – iri tarıhı oqıǵa. Endeshe, jańa oblysymyz Qazaqstannyń damýyna úles qosatyn óńir bolady degenine úmittemiz. Osy tarıhı-saıası sheshimge halyq zor senim artyp otyr. Senim aqtalsyn!
Arap ESPEMBETOV,
fılologııa ǵylymdarynyń doktory, professor
SEMEI
