Aıta keteıik, atalǵan kórme – jas sýretshiniń shyǵarmashylyq jolyndaǵy alǵashqy debıýti, oǵan akvarel jáne maıly boıaýmen oryndalǵan 50-den asa jumysy qoıyldy.
Qylqalam sheberi kóbinese adamdardyń syrtqy kelbetin ǵana emes, olardyń jan-dúnıesine úńilip, is-áreketin beıneleýge mán beredi. Týyndylarynyń boıaýy qanyq, kóz tartyp turady. Ásirese, onyń shyǵarmashylyǵynda balalardyń portretteri erekshe oryn alady.
Is-sharanyń ashylýynda Elbasy kitaphanasynyń dırektory Baqytjan Temirbolat Memleket basshysy jarııalaǵan bıylǵy «Balalar jylyna» baılanysty ótip otyrǵan kórmeniń mańyzyna toqtalyp, talantty sýretshige shyǵarmashylyq tabys tiledi.
Kórmege avtordyń eki aıda salǵan jumystarynyń deni qoıylǵan.
«Ǵalamtordy óshirgen kezde, gadjetterden bas almaıtyn adamdar aınalasyna zer sala bastady. Men de jan-jaǵymdaǵy barlyq janǵa nazar aýdaryp, júregime jaqyn dúnıeni ǵana emes, qorshaǵan ortaǵa qymbat barlyq nárseni beıneledim», deıdi ol.
Aıdana Minaıdarova − qalalyq, respýblıkalyq jáne halyqaralyq kórmelerdiń belsendi qatysýshysy. 2017 jyly jaǵasy men oramalynyń avtorlyq sýreti bar aksessýarlar jelisin shyǵardy. Sol jyly sýretshi arnaıy Mılandaǵy kórme úshin AV brendimen birge dızaınerlik kózildirikterdi órnektedi. 2019 jyly Nur-Sultan, Almaty jáne Taılandtaǵy EURASIAN FASHION WEEK halyqaralyq alańynda NOSI MOYO qazaqstandyq brendimen birge kıim toptamasyn jasaý boıynsha sýretshi ári dızaıner bolyp óner kórsetti.
Sondaı-aq is-shara aıasynda kórme ıesiniń portret oryndaýdan sheberlik saǵaty ótti.
