Ulttyq ekonomıka mınıstri Álibek Qýantyrovtyń aıtýynsha, joba 10 baǵyt boıynsha júzege asyrylatyn 36 is-sharadan turady.
Osylaısha, prezıdenttik ókilettikterdi shamadan tys shoǵyrlandyrýdan bas tartý maqsatynda el zańnamasyna kelesi túzetýler engiziledi:
- Prezıdenttiń prezıdenttik ókilettigin oryndaý merzimine Prezıdenttiń saıası partııaǵa músheligin toqtatýy;
- Prezıdenttiń jaqyn týystary úshin memlekettik saıası qyzmetshiler jáne kvazımemlekettik sektor kásiporyndary basshylary laýazymdaryna ornalasýǵa tyıym salý;
- Prezıdenttiń oblystar, respýblıkalyq mańyzy bar qalalar jáne astana ákimderi aktileriniń kúshin joıý nemese toqtata turý jónindegi quzyretin alyp tastaý, sondaı-aq Prezıdenttiń aýdandar, oblystyq mańyzy bar qalalar, aýdandyq mańyzy bar qalalar, aýyldar, kentter, aýyldyq okrýgter ákimderi qyzmetinen alý quqyǵyn joıý.
«Sondaı-aq ákimder men olardyń orynbasarlaryna saıası partııalardyń fılıaldarynda qyzmet atqarýǵa tyıym salynady», dedi Álibek Qýantyrov.
Budan basqa, QR Parlamenti Senatynyń qurylý tártibi men birqatar fýnksııalary qaıta qaralatyn bolady.
Atap aıtqanda:
Senattaǵy prezıdenttik kvota 15 depýtattan 10 depýtatqa deıin qysqarady, olardyń beseýi Qazaqstan halqy Assambleıasyna usynylady;
- QHA kvotasy Májilisten Senatqa beriledi;
- QR Parlamenti Senatynyń Májilis qabyldaǵan zańdardy maquldaý nemese maquldamaý quqyǵy kózdelgen;
- QR Parlamenti Senatynyń ókilettigi Konstıtýsııalyq Keńestiń jáne Joǵary Sot Keńesiniń tóraǵalary qyzmetine kandıdatýralardy kelisý quqyǵymen tolyqtyryldy;
- QR Parlamenti Májilisi Zań qabyldaý quqyǵyna ıe bolady;
- Esep komıteti joǵary aýdıtorlyq palataǵa qaıta qurylatyn bolady.
UEM basshysynyń aıtýynsha, eldi odan ári saıası jańǵyrtý maqsatynda májilisti qalyptastyrýdyń aralas júıesin kózdeıtin saılaý júıesiniń proporsıonaldy-majorıtarlyq modeli engiziletin bolady.
«Saıası partııalardy tirkeý rásimin ońaılatý, onyń ishinde tirkeý shegin 20 myńnan 5 myń múshege deıin tómendetý kózdelýde. О́ńirlik ókildikterdiń eń az sany 600-den 200 adamǵa deıin azaıtylady. Partııa qurý úshin bastamashyl azamattar tobynyń eń az sany 1000-nan 700 adamǵa deıin qysqarady», dep qosty Álibek Qýantyrov..
Sonymen qatar Qazaqstanda konstıtýsııalyq sot paıda bolady. BAQ týraly zań qaıta qaralady.
Úsh jańa oblys - Abaı, Jetisý jáne Ulytaý paıda bolady. Ulttyq ekonomıka mınıstri atap ótkendeı, bul baǵyttaǵy jumys bastalyp ketti.
Qazaqstan Premer-mınıstri Álıhan Smaıylov usynylǵan Jalpyulttyq is-sharalar jospary qoıylǵan mindetterge tolyq jaýap beretinin jáne kelisýdiń barlyq qajetti rásimderinen ótkenin atap ótti. Osyǵan baılanysty Úkimet basshysy ony júzege asyrýǵa kidirissiz kirisýdi tapsyrdy.
«Barlyq Birinshi basshylardyń nazaryn aýdaramyn – sizder jospardyń árbir is-sharasynyń sapaly jáne ýaqtyly oryndalýyna derbes jaýap beresizder. Orynbasarlaryma jospardyń baǵyttaryn qatań baqylaýda ustaýdy tapsyramyn», dedi Álıhan Smaıylov.
