Olardyń qatarynda ataqty ǵalym Shaıh Sýleıman Jamaldyń aýdarmasy boıynsha aýdarylǵan «Tafsır» kitaby, atadan balaǵa mura bolǵan ǵasyrlyq qazan, Temýrıdter memleketiniń Ámir Temir atymen 785-786 h.j. (1383-1385 jj.) jáne 832 h.j. (1428-1429 j.j) Buhara aqsha saraıynda soǵylǵan fýlýsi, Qoqan handyǵynyń eki dana tamshy pishindi, bir dana sharshy pishindi monetalary, XVII ǵ. usaq saýda isinde aınalymda júrgen tórtburysh pishindi mys aqshalar men Reseı patshalyǵynyń nýmızmatıkalyq jádigerleri, Qoja Ahmet Iаsaýı kesenesinde jerlengen Kárson Beknazaruly Tańybaı batyrdyń portreti, kózeshiniń móri bar. Mysaly, uldary men nemerelerin ertip kelgen 75 jastaǵy Asylbek Tańataruly babalarynan jetken úsh ǵasyrlyq qola qazannyń ári qaraı kesene mýzeıinde turýyn jón sanapty. Bereke daryǵan qola qazannan qazaqtyń qanshama jaqsylary men jaısańdary dám tatqan, ári áýlettiń de yrysy men berekesi ispettes. Asylbek Tańataruly áýlettiń jádigerin máńgilikke kózdiń qarashyǵyndaı saqtaý úshin mýzeı qoryna ótkizip, elge aq batasyn berdi.
Sondaı-aq «Áziret Sultan» memlekettik tarıhı-mádenı mýzeı-qoryǵynyń baspasóz qyzmeti habarlaǵandaı, Qoja Ahmet Iаsaýı kesenesinde jerlengen Kárson Beknazaruly Tańybaı batyrdyń portreti de eldiń yqylasyn aýdarǵan. Qazaq halqy, onyń kıeli mekeni úshin kúresken batyrdyń portretin tarıhı derekterge súıene otyryp, sýretshi Sapar Hasenuly maıly boıaýmen salǵan. Batyrdyń portretin «Qarakesek Kárson Beknazaruly Tańybaı batyr» atyndaǵy qoǵamdyq qordyń prezıdenti A. Esjanov bolashaq urpaq úshin Qoja Ahmet Iаsaýı kesenesine syıǵa tartty.
Aıta ketelik, mýzeıdiń qazirgi kezde qor saqtaý jáne esepke alý bóliminiń qorynda 24 558 dana kóne jádiger memlekettik tirkeýge alynǵan, onyń 13 640 danasy negizgi qor, 10 918 danasy ǵylymı kómekshi qor esebinde.
Túrkistan
