Jyl saıyn mýzeıdiń restavratorlary mýzeı zattarynyń buzylýyn boldyrmaý jáne zergerlik buıymdardy qosa alǵanda, eksponattardyń saqtalýyna ońtaıly jaǵdaı jasaý boıynsha turaqty jumys júrgizedi. Bul jumystyń atqarylý barysy mýzeıde ótken «Naýryz naqyshtary» atty qazaq mádenıeti men dástúrli ulttyq óneriniń festıvalinde keńinen kórinis tapty.
Festıval aıasynda Memlekettik ortalyq mýzeı kolleksııasyndaǵy qalpyna keltirilgen zergerlik buıymdardyń negizinde «Kóneniń kózi» atty kórme ashyldy. Kórmede arǵy ǵasyrlardaǵy dástúrli qazaq zergerlik áshekeıleriniń san alýandyǵy men sulýlyǵyn ǵana kórsetip qoımaı, mádenı murany saqtaýǵa jáne mýzeı qundylyqtaryn jańǵyrtýǵa óz úlesin qosyp otyrǵan mýzeı restavratorlarynyń tynymsyz kúrdeli jumysynyń nátıjesi kópshilikke tanystyryldy.
Ortalyq mýzeı restavratorlary ártúrli sıpattaǵy artefaktilerdi qalpyna keltirý barysynda túrli tehnıkalyq ádis-tásilderdi paıdalana otyryp, eksponattardy jóndeý, ekspozısııalyq «túrge» keltirý jumysyn keshendi túrde oryndaıdy. Sońǵy ýaqytta mýzeıdiń sýretshi, zerger, taǵy basqa restavratorlary zergerlik buıymdardy qosa alǵanda, mýzeı jádigerleriniń 700-den astam saqtaý birligin qalpyna keltirdi.
«Kóneniń kózi» atty kórme ekspozısııasynda alǵash ret dástúrli qazaq zergerlik buıymdarynyń mýzeı qoryndaǵy biregeı toptamasynan 100-den astam qalpyna keltirilgen áıelderdiń zergerlik buıymdary usynyldy: syrǵalar, bilezikter, saqınalar, sholpylar, kıimge arnalǵan sándik ilgekterdi mýzeıge kelgender yqylaspen qyzyqtady
Eksponattardyń ishinde Garıf Jalmuhanov, Ivan Brıakın, Altynbek Abdýldaev sııaqty zergerlerdiń kópǵasyrlyq dástúr boıynsha daıyndaǵan zergerlik áshekeıleri de osy kórmeden oryn alǵan. Sonymen qatar kórmede ulttyq opera óneriniń shamshyraǵy Kúlásh Baıseıitova, qazaqtyń bı ónerin qalyptastyrýda ólsheýsiz eńbek sińirgen Shara Jıenqulova, jeztańdaı ánshi Jamal Omarova sekildi HH ǵasyrdaǵy aty ańyzǵa aınalǵan áıelderdiń zergerlik jınaqtary kórmeniń salmaǵyn arttyryp, ajaryn asha túsken. «Kóneniń kózi» kórmesi Ortalyq mýzeı restavrator sheberleriniń kóp jylǵy jumysynyń túrli qyrlary men qupııalaryn ashyp kórsetedi.
Mádenı is-shara baǵdarlamasy aıasynda zergerlik óner boıynsha sheberlik sabaqtary uıymdastyrylyp, óner maıtalmandary – etnıkalyq ánderdiń tanymal oryndaýshysy «Tengrı» mýzykalyq etnotoby, Qazaqstannyń eńbek sińirgen ártisi Sulýshash Nurmaǵambetova, J.Elebekov atyndaǵy estrada-sırk kolledjiniń stýdentteri óner kórsetti.
ALMATY
