Erteden belgili, Ońtústik óńiriniń perzenti kıno túsirse, tereń kadr túkpirinde kóriner-kórinbes jańǵaq aǵashy ósip turady, al kórkem prozaǵa qalam tartsa, kitabynan biliner-bilinbes úndi shaıynyń tańǵajaıyp ısi keledi.
Bul alap Qudaıdyń nazary túsken, kóńili aýǵan jer, baq qonǵan berekeli meken, baqytty jurt ómir súretin aımaq – qashanda mamyrajaı jaz qushaǵynda, qashanda ystyq jalyny bet qaryǵan qalyń peshtiń mańy, shaqyraıǵan Kún astynda.
Shym eliniń bosaǵasy bir bosamaıdy. Tóri bos jatpaıdy. Toıy qyzyq-dýmanǵa ulasqan er kóńildi, er minezdi jomart halyq, áni bıge jalǵasqan merekeli jurt, qumyrsqa ıleýindeı qurylysy kóp, úıilip-tógilip jatqan jumysy kóp, meımandos, týysshyl qazaq.
Qazaqtyń beınetqory. Dastarqan men ot arasynan tabaq úzilmeıdi. Qalamy tóselgen qas talant áńgimelerin oqysań, kóz aldyńa osyndaı sýretter, oıyńa osyndaı oılar keledi.
Sáken Sybanbaı shyǵarmalarynda qys joq. Peıishtiń segiz qaqpasynyń biri Shymkentten bastalatyndaı. Bul óńir ıman nuryna toly. Áýlıe-ánbıeler kóptiginen shyǵar.
Avtor oqyrman nazaryna usynǵan ár týyndysynda – jarqyraǵan kún, jaıma-shýaq jaz mezgili. Kúlki kóp. Baqytty jurt qalyń.
Qaz-qalpynda qaǵazǵa túsirilgen aýyl ýaqıǵalarynda shek joq. Bitpeıdi. Estelik retinde, ertegi kúıinde. О́mirdeı qysqa, tirshilikteı uzyn.
Shaı ústinde shejireler túgendeledi. Tarıhtar qaıtalanady. Jalǵan sóz áshkerelenip, shyndyq tanylady.
Fabýladan fınal, ssenarııden kúrmeý kórinedi. Ádebı tildi erkin meńgergen avtor epızodtardy ornalastyrǵanda da, sıýjet qurǵanda da kúńgirt oılarǵa jolamaıdy. Shyǵarmasyna ár berý maqsatynda sóılemderin qoldan kúrdelendirmeıdi.
Kompozısııalyq qurylymy qandaı jeńil bolsa, sıýjettik jelisi de sondaı qarapaıym. Keıipkerleri, tipti týys, jaqyndyǵy bar.
Fınal sheshimin shytyrman jelige baılap, qıyndatýǵa qushtar emes. Sóılemderine tereń mán-maǵyna, kúrdeli oı-paıym júktemeıdi. Qajeti qansha... Obrazdary kesek, este qalatyndaı, umytylmaıtyndaı kózge ystyq kórkem beıneler.
Avtor bir týyndysy ishinde birneshe ýaqıǵanyń basyn qurap, sheber qııýlastyra biledi.
Aýyldyń obrazy andaǵaılap kórinedi: «Bir sháýgim shaı».
Qaıran, jaz ısi! Kitap saǵynyshymyzdy oıatady. Burq-sarq qaınap jatqan samaýyr shoǵynan, burqyraǵan shaıdan, samal lebinen, atqylaǵan qasqa bulaqtan jaz ısi ańqyp, kókiregińe tolady, kóńilińdi shabyttandyrady. Jaz ısi.
Shyǵarma ataýlary da shynaıy: «Keremet kún», «О́mir ótip barady», «Úmit úıi». Avtor jazǵanyna sendiredi, kúshi osynda.
Tili jatyq, shuraıly. Múlt ketpeıdi. Ondyqqa tıgizip otyrady. Bolashaqta avtordan iri shyǵarmalar da kútemiz.
Dıdar AMANTAI
