Kaleıdoskop

Keıde adamnyń oı keńis­tigi jer-álemnen de úlken sııaqty kórinedi. Máselen, tańǵy kofeńdi iship otyryp, sóredegi gúlge sý quıý kerektiginen bastap qıraǵan Marıýpolge deıin oısha bir sholyp shyǵasyń: náziktik pen qatygezdik.

Taǵy ne oıladyq?...

Astanaǵa kóktem keldi

Adamnyń kóńil kúıine belgili bir deń­geıde aýa raıy da áser etedi. Alty aı qystan soń astanaǵa da kók­tem keldi. Kóktemniń alǵashqy jańbyry jaýdy. Arqa tósindegi halyq úshin bul – úlken qýanysh. Kesh­qurym serýenge shyǵyp, kúnniń jylyǵanyn sezý, kóktemniń ıisin ıiskeý – bolmashy bolsa da baqyt. Árıne, bul kúıdi tek astanalyqtar túsinedi. Qazaq ózi kez kelgen jaqsylyqqa qutty bolsyn aıtqandy, súıinshilegendi jaq­sy kóretin halyq qoı. Al kóktem qutty bolsyn, astanalyqtar.

Qazaqsha kınony qalaı kóremiz?

Reseıge qatysty engi­zil­gen sanksııalardan keıin eli­mizdiń kınoteatrlarynda Gollıvýd fılmderi kórse­tilmeı qalýy múmkin. Osyǵan baılanysty Máde­nıet jáne sport mı­nıs­tri Dáýren Abaev qazir sheteldik kompanııalarmen bar­lyq qajetti kelissózder júrgizilip jatqanyn aıtqan edi. Iаǵnı aldaǵy ýaqytta sheteldik kompanııalar kı­no­ónimderin Qazaqstanǵa tikeleı beretin bolady. Osy taqyryptyń aıasynda qoǵamda qazaqtildi dýblıaj máselesi de qozǵala bas­ta­dy. Kınotanýshylar men rejısserler otandyq pro­katqa enetin kez kelgen fılm tek qazaqsha sýbtıtr­men berilip qana qoımaı, qazaq tilinde dýblıajdalýyn da talap etýde. Quptarlyq oı. Alaıda onyń sapasy syn kótere me? Máselen, qa­zir kınoteatrǵa barsańyz, sheteldik fılm­niń qazaqsha sýbtıtrin oqyp otyryp, kúlesiń. Qate kóp. Al telearnalarda kórsetiletin qazaq tiline dýblıajdalǵan she­tel­dik fılmderdi kórý tipti múmkin emes. Osydan soń kınoteatrlardaǵy fılm­der qazaqsha dybystalatyn bolsa, ol seansqa qansha kórer­men barady eken?..

Adam da ár nárseni bir oılaı beredi eken ǵoı. Aıt­paqshy, Japonııada sakýra gúldedi...