Kollajdy jasaǵan Qonysbaı ShEJIMBAI, «EQ»
Amandyq, saýlyq surasqan soń:
– Anaý bizdiń kýrstas dosymyz Banzaı-Banzaıdyń jumyssyz júrgenin bilesiń ǵoı, – dedi.
Biz stýdenttik shaqtardan ózimizben birge oqyǵan dosymyz Qoǵabaı Sársekeevti syrtqy keskin-kelbetiniń japondyqtarǵa uqsastyǵyna qaraı ózara áńgimemizde japon sózderimen «Banzaı-Banzaı» dep te ataı beretin edik.
– Qazir sende bas redaktoryńnyń orny bos tur ǵoı, sol orynǵa Qoǵabaıdy alsań qaıtedi? – dep usynysyn qosa aıtty Rymǵalı.
– Alýǵa qarsy emespin. Biraq áýeli Qoǵabaıdyń ózimen sóılesip alaıyn, – dedim men.
– Men sóılestim. Sen shaqyrsań, ol barady, – dedi Rymǵalı.
Qoǵabaı Sársekeev ol kezde esimi elge tanylyp kele jatqan jazýshy, «Qazaqstan pıoneri», «Sosıalıstik Qazaqstan», «Qazaq ádebıeti» sııaqty gazetterde jaýapty qyzmetter atqaryp, tájirıbe jıǵan, «Drýg chıtatelıa» sııaqty aptalyq basylymda bas redaktor bolyp ysylǵan qyzmetker edi. Coǵan deıin ol burynǵy jumysynan ótinish jazyp bosanǵan soń halyq batyry Amangeldi Imanov týraly roman jazyp júrgenin de biletinmin. Shamasy, endi qyzmetke qaıta turýdy oılaı bastaǵan sekildi.
– Jaraıdy, onda. Alaıyn, – dedim.
Sóıtip, Qoǵabaı dosymyz men dırektor bolyp isteıtin «Jalyn» baspasyna bas redaktor bolyp kelgen edi.
Baspaǵa túsken qoljazbalarmen tanysý, árbir jylǵa taqyryptyq jospar qurý, oǵan táýir degen dúnıelerdi iriktep engizý, shyǵarmalardy redaksııalaý, tergizý, shyǵatyn kitaptardy kórkemdeý, sýretshilermen, baspahanamen jumys isteý, daıyn bolǵan kitaptardy oblystyq kitap saýdasy mekemelerine jóneltý sııaqty óndiristik, baspagerlik jumystardyń barlyǵyn tez arada meńgerip alyp ketti.
Ol kezderde jyl saıyn Máskeýde halyqaralyq kitap jármeńkesi ótetin. Oǵan óz elimizdiń de, shetelderdiń de baspagerleri qatysatyn. Shyǵarylǵan kitaptar sol jármeńkede barlyq jaǵynan synǵa túsetin. Táýir degen kitaptarǵa gramotalar beriletin. Shetel baspalary ózderine unaǵan shyǵarmalardy óz elinde bastyryp shyǵarýǵa bizderdiń baspalarmen shart jasasatyn. Ol jármeńkelerden de «Jalyn» baspasy oljaly bolyp oralyp júrdi. Osyndaı jumystardyń bárinde Qoǵabaıdyń da aıtarlyqtaı úlesi bar edi.
Odan keıingi kezeńde men joǵary jaqtyń sheshimimen respýblıkalyq kitap saýdasy mekemesi «Kazknıgaǵa» basqarýshy bolyp taǵaıyndaldym. «Qazaq kitaptarynyń tırajy óspeı qoıdy, sony qalaıda ósirý kerek» degen mindet qoıyldy maǵan. Kórshi respýblıkalardyń kitap saýdasy mekemeleri «О́zbekkitap», «Qyrǵyzkitap» dep óz tilderinde, al bizdiń mekeme «Kazknıga» dep oryssha atalatyn. Osyny Máskeýdiń ruqsatymen «Qazaqkitap» dep ózgertýge jarty jyldaı ýaqyt ketti. Qazaq kitaptarynyń tırajyn ósirý máselesi de oıdaǵydaı sheshildi.
Osydan keıin men respýblıkanyń Aqparat jáne kitap baspasy mınıstrliginiń Bas redaktory bolyp taǵaıyndaldym da, «Qazaqkitapqa», meniń ornyma «Jalyn» baspasynan bastyq bolyp Qoǵabaı bardy.
Sol ýaqytta respýblıkamyzda jekeshelendirý naýqany bastaldy. Ár ýaqytta shıraq qımyldaıtyn Qoǵabaı bul bóliste qur qalmaı, Almatynyń Kók bazary mańyndaǵy jedel basylymdar baspahanasyn menshigine alyp, memlekettik baspa komıtetinen bólinip shyǵyp, baspahana jumysyn tıimdi kommersııalyq jolǵa qoıdy. Sóıtip, bizdiń qatarymyzdaǵy alǵashqy «aqshaly myrzalardyń» birine aınaldy. Sóıtsek, ol tapqan tabysyn tek óz ıgiligine ǵana jumsamaı (sol kezde Almatyda ekiqabatty kottedj salyp, astyna jarqyraǵan qymbat kólik alyp mingennen basqa), jınaqtap qor qurýǵa kirisken eken. Ondaǵy oıy óziniń jerlesteri, alashordashyl aǵalary revolıýsııaǵa deıin-aq týǵan halqyna jany ashyp, sonyń keleshegi jarqyn bolsyn, soǵan qyzmet etsin dep shyǵarǵan «Qazaq» gazeti men «Aıqap» jýrnalyn qaıtadan tiriltý eken ǵoı. Ol óziniń bul oıyn sol kezderi aralasqan, syrlas jaqyn dostary bolǵan bizderge de bildirgen emes. Gazet shyǵarýǵa tıisti qarjyny jınap bolyp, «Qazaq» gazetin qaıta shyǵarýǵa úkimetten lısenzııa alyp, redaksııa ujymyn jasaqtap, ótken ǵasyrda, 1918 jyly 265 sany shyqqannan keıin qarajat tapshylyǵynan toqtap qalǵan ult gazetin № 266 dep qaıta jalǵastyryp, tiriltip, 2006 jyldyń 22 naýryzy kúni qaıtadan shyǵara bastaǵanynda bir-aq bildik. Onyń bul isi shyndyǵynda erlikke tán qareket edi.
Jurtqa unaıtyn, oqylatyn, sonymen birge respýblıka ómirindegi mańyzdy jańalyqtardy der kezinde jarııalap otyratyn, eleýli, ózekti máseleler kóteretin, elimizdiń gúldenip, kórkeıýine belsendi atsalysatyn gazet shyǵarýdyń ońaı emestigin osy salada qyzmet atqaratyn jýrnalıster jaqsy biledi. Qoǵabaı sońǵy demi taýsylǵansha osylaısha, óz erkimen, bar mashaqatyn aýyrsynbaı arqalap, úzbeı shyǵarǵan «Qazaq» gazeti de kópshiliktiń kókeıinen shyqqan basylym bolǵanyn aıtýǵa tıspiz.
«Aqsaq qoıdaı basqadan keıin qalǵanymyz ba? Joq, qalmas amalyn izdep qamdanamyz ba? Qalmaımyz desek, qarap jatpalyq. Kóp isine kóp bolyp jabylaıyq. Sańylaýly, sanaly, halyq azamattary kómek etip, kúsh qosyp, demer degen úmit zor...
Ataly jurtymyzdyń, adýyndy ultymyzdyń arýaqty aty dep gazetimizdiń esimin «QAZAQ» qoıdyq. Ult úshin degen istiń ulǵaıýyna kúshin qosyp, kómektesip, qyzmet etý qazaq balasyna mindet. Halyqqa qyzmet etemin deseńder, azamattar, týra joldyń biri osy. Jol uzaq, ǵumyr qysqa, qoldan kelgenin ǵumyr jetkeninshe istep ketelik. Malsha ottap, asap iship, halyq úshin qam qylmaı, qaryn toıǵanyna máz bolyp, mal óliminde ólmeıik.
Ult halyn oıymyzǵa alyp, qyzmet etýdi moınymyzǵa alyp, arnaǵan bir isimiz. Qudaı sátin salsyn, «áýmın» dep qol jaıyp, «áýp» dep kúsh qosyp, «Alla» dep iske kiriselik! «Qazaq», № 1, 1913 jyl.»
О́tken ǵasyrda, 1913 jyly «Qazaq» gazeti alǵash shyqqanda Alash arystary Álıhan Bókeıhanov, Ahmet Baıtursynov, Mirjaqyp Dýlatov qazaq halqyna osyndaı úndeý tastap, elshildik minez tanytyp, halqymyzben osylaısha dıdarlasypty. Baıyptap qarasaq, osy sózdiń, osy urannyń búgin de mańyzyn joımaǵany, ultymyzǵa áli kúnge kerek ekeni, qyzmet ete beretini anyq.
Osy jerde men endi Qoǵabaı Sársekeev bas redaktory bolyp shyǵarǵan «Qazaq» gazetiniń syr-sıpatyna, mán-mańyzyna, mazmunyna azyraq toqtalyp ótýdi jón kórip otyrmyn. Eń aldymen aıtylar nárse – ótken jıyrmasynshy ǵasyrdyń bastapqy jyldarynda, dálirek aıtsaq 1913 jyldyń 2 aqpanynda alǵashqy sany jaryqqa shyqqan «Qazaq» gazeti qarajat joqtyǵy, jańa ókimettiń qyryn qaraǵany men basqa da qıyndyqtar saldarynan 1918 jyly shyǵýyn toqtatqany – tarıhı fakti. Bul gazet bar ǵumyrlaryn halqynyń, týǵan ultynyń alǵa basýyna, álemdegi órkenıet kóshiniń sońynda qalmaı, ósip-órkendeýine baǵyshtap, sol jolda jan aıamaı qyzmet etken Alash arystarynyń janqııarlyq eńbekteri arqasynda dúnıege kelgen edi. Araǵa 88 jyl salyp, «Qazaq» gazetin qaıta tiriltip, «Aıqap» jýrnalyn elimen qaıta qaýyshtyrǵan dosymyz Qoǵabaı Sársekeevtiń eńbegi de shyn máninde erlikke balaýǵa turarlyq is ekenin maqtanyshpen, senimmen aıta alamyz.
Alash arystary shyǵarǵan «Qazaq» gazetiniń 100 jyldyq toıy respýblıkamyzda keńinen atalyp ótti. Oblystarda, jer-jerde osy toıǵa arnalǵan ártúrli is-sharalar uıymdastyryldy. Qazaq ulttyq ýnıversıtetinde, Eýrazııa ulttyq ýnıversıtetinde, Ahmet Baıtursynov atyndaǵy ýnıversıtette jáne ózge de joǵary bilim shańyraqtarynda, kitaphanalarda ártúrli ǵylymı konferensııalar ótti. Q.Sársekeev ózi basqarǵan ujymnyń uıytqy bolýymen, gazetke janashyr azamattardyń belsendi qatysýymen Almatydaǵy «Dostyq» úıinde zııaly qaýymnyń basy qosylǵan úlken jıyn ótkizildi. Oǵan aqyn-jazýshylar, ǵalym-akademıkter, BAQ ókilderi qatysty. Esimderi elge tanymal tulǵalar Ábdijámil Nurpeıisov, Serik Qırabaev, Muhtar Shahanovtar, taǵy basqalary sóılep, qalyń oqyrmandy ulttyq mańyzy joǵalmaǵan uly gazetpen qaıta qaýyshtyrǵan Qoǵabaı Sársekeevke alǵystaryn aıtty.
«Qazaq» tórt jyldan artyq shyǵyp kele jatyr. Onyń betinde táýelsiz eldiń ózekti problemalary, ult taǵdyry jáne onyń dástúri, tili, dini, el tirshiligine táýelsizdik rýhyn engizip, ony kóterýdiń joldary, taǵy basqa zaman men qoǵamnyń ózekti máseleleri talqyǵa túsýde. Oıly usynystar, syn pikirler aıtylýda. Bári de eldiń qamy úshin! Qazaqtyń zııaly qaýymy, jalpy oqyrman jurt gazettiń shyǵýyn qýana qarsy alyp, ol kótergen máselelerge ún qosýda», dep jazǵan edi sol tusta ádebıetimizdiń abyz tulǵasy Serik Qırabaev. Gazet oqyrmandarymen kezdesýleri kezinde Alash arystary shyǵarǵan, olardyń isin jalǵaı otyryp, ózi shyǵarǵan «Qazaq» gazeti jaıynda keıbir syrlardyń tıegin aǵytqan edi Qoǵabaı dosymyz. Máselen, ótken ǵasyrdyń otyzynshy jyldarynda óziniń týǵan naǵashysy Júsipnazar Baıtursynov M.Dýlatovtyń «Oıan, qazaǵyn» sandyqta saqtap, óleńderin jatqa oqyp, ánge salyp oryndaǵany úshin ustalyp, atylǵanyn aıtatyn. Júsipnazar eshkimge qııanat jasamaǵan, ókimetke zııan keltirmegen, ishpegen-jemegen, ne urandatyp halyq arasyna shyqpaǵan, tek tabıǵı daryndy ánshi bolǵan adam eken. Onyń osyndaı áńgimesin estigende eriksiz otyzynshy jyldardaǵy repressııanyń aıazdy sýyq yzǵaryn arqamyzben sezingendeı kúı keshetinbiz. Al gazettiń júz jyldyǵy toılanǵan kezde ózine respýblıkamyzdyń ár óńirinen tanymaıtyn talaı azamattar habarlasyp, alǵystary men izgi tilekterin aıtqanyn áńgimelegen kezinde júzi de jadyrap, jaınap ketetin. «Solardyń biri – Boshaı Kitapbaev degen aǵamyz, jasy toqsannan asqan, sonaý О́skemennen áli kúnge deıin jıi-jıi qońyraý shalyp, habarlasyp turady, aqyl-keńesin berýden jalyqpaıdy», deıtin edi Qoǵabaı dosymyz.
Apta saıyn kólemdi, jurt rıza bop oqıtyn gazet shyǵarýdyń qamymen júrgen dosymyz Qoǵabaı sol kúnderi elimizge paıda keltiretin taǵy bir mańyzdy máseleni oılap júripti, ol – «Qazaq» gazetine qosa ultymyzdyń baspasózinde, tarıhynda umytylmas orny bar «Aıqap» jýrnalyn da qaıta tiriltip, elimizben qaıtadan tabystyrý eken.
Osy oraıda kazaktyń tuńǵysh qoǵamdyq-saıası jáne ádebı jýrnaly «Aıqap» týraly da azyraq málimet bere ketkenimiz artyq bolmaıtyn sekildi. «Aıqap» «Qazaqtan» buryn shyqqan. Ol 1911 jyldyń qańtarynan 1915 jyldyń qyrkúıegine deıin Troısk qalasynda shyǵyp turǵan, sodan keıin qarajat jetimsizdiginen jabylyp qalǵan. Kólemi 16-24 bet, tırajy 1000-2000 dana bolǵan. Barlyǵy 88 nómiri jaryq kórgen. Redaktory demokrat-jazýshy, ulttyq jýrnalıstıkamyzdyń negizin qalaǵan Muhamedjan Seralın bolatyn. Jýrnal jumysyna S.Toraıǵyrov, S.Seıfýllın, B.Maılın, S.Dónentaev, S.Kóbeev syndy ultymyzdyń talantty aqyn-jazýshylary belsene atsalysqan. «Aıqap» qazaq halqynyń jıyrmasynshy ǵasyrdyń basyndaǵy saıası-áleýmettik ómiriniń túıindi máselelerine, mádenıet pen ádebıettiń, tildiń damýyna, halyq-aǵartý jumysyna kóńil bóldi. Kóshpeli qazaq sharýalarynyń qoǵamdyq-ekonomıkalyq jaǵdaıyn tolyq kórsetip, otyryqshylyq turmysqa kóshýdiń qajettigin jazdy. Áıel teńdigi máselelerin kóterdi. Búgingi jıyrma birinshi ǵasyrda Qoǵabaı dosymyz halqymyzdyń sol tuńǵysh jýrnaly «Aıqap-qa» da ekinshi ómir syılady. О́zi ómirge kelgen, qazaqtyń qasıetti keń dalasynyń qasterli bir pushpaǵy Torǵaı óńirinde «elim, ultym, jurtym» dep ózinen buryn ǵumyr keshken alashshyl aǵalarynyń kúresken isin búgingi zamanymyzda jalǵaı tústi. Sóıtip, «Qazaq» gazetine qosa «Aıqap» jýrnalyn shyǵarýdy da qolǵa aldy. Qoǵabaıdyń bul isine aqyndarymyz da laıyqty baǵasyn bergen edi.
«...Ahań-Jahańnyń belinen
Jaralǵan joq qoı» deme, sen.
Solardyń týǵan elinen,
Shyqqan ul – bul da eresen!
Babasy onyń Qobylandy,
Qara Qypshaq qoı – túp tóri!
Urpaǵy Qoqań oǵlandy,
Demessiń qalaı kókbóri! –
dep jyrlady aqyn Hamıtbek Musabaev.
... Sózi bólek, isi bólek,
Beınet-sýǵa túsip álek.
Qaıratyna tańdanasyń
Jany siri kisi me dep, –
degen joldarmen oǵan óziniń qurmetin, súısinisin bildirdi Júrsin Erman.
... Alash muńyn joqtaǵan, aǵa, seni
Arystardyń jalǵasy dep bilemin! – dep tolǵady Rafael Nııazbek.
Sol kezderde men dosymyz Qoǵabaımen jıi aralasyp júretin edim. Endi búgin oılansam ol da bir ómirimizdiń sáýleli, jarqyn kezeńi eken ǵoı. 2014 jyly jaz aıynda «Qoǵabaı aýyryp qalypty» degen jaısyz habar jetti Almatydan. Sodan buryn kóktemde onyń biraz ýaqytqa Amerıkaǵa baryp qaıtqanyn biletin edim. Sol eldegi balalary men nemerelerin saǵynyp, solardy kórip qaıtýǵa barǵan ǵoı dep oılaǵanmyn. Biraq sońynan bir ret sóıleskenimizde ol sol joly Amerıkadaǵy dárigerlerge de kórinip kelgenin aıtqan edi. Men birden sekem alyp, mán-jaıyn surastyra bastaǵanymda:
– Onshalyqty alańdaıtyn eshnárse joq. Men shylymdy kóp tartamyn ǵoı, sonyń ókpege azyraq áseri bolǵan sııaqty. Ol jaqtaǵy dáriger «shylymdy qoıyńyz» dep, biraz dáriler jazyp berdi. Endi sol dárigerdiń aıtqanyn oryndap júrmin, – dedi.
Men onyń shylymdy kóp tartatynyn biletin edim. «Osyny qoısańshy» dep birneshe ret keńes te bergenmin. «Ol da oıda joq emes» dep syrǵytpa jaýap bergen. Endi telefonnan meniń abyrjyǵan únimdi estigen soń meni tynyshtandyraıyn dedi me, «sen ýaıymdama, bul aýrýdan jazylamyn» dedi de, áńgimeni basqa arnaǵa buryp jiberdi. Kúldiretin biraz nárseler aıtty... Sodan keıin onyń Amerıkaǵa qaıtadan ushyp ketkenin estidim. Ushar aldynda kýrstas dosymyz Mátkerim Ákimjanovpen sóılesipti. «Osy joly ótkendegi kóringen amerıkalyq dárigerge qaıta jolyǵyp, «aýrýynan jazyldy» degen qaǵazyn alyp qaıtpaq oıym bar. Sodan keıin Alla jazsa Astanaǵa qaıta barǵanymda ózderiń sııaqty dostardy jınap, emin-erkin oınap-kúlip otyryp, jaqsy bir kesh ótkizermiz degen jospar bar» dep, qýantyp tastapty. Mátkerim ol habardy sol kúni-aq maǵan jetkizgen. Ertesinde men de úıine, ózine telefon soqqanymda biraz ýaqyt jaqsy sóılestik. Kúldirgi, qyzyqty áńgimeler aıtty. Meniń de kóńilim ornyna túsip, aýrýynan aıyqqan eken, endi birjola aıyǵyp ketse eken degen tilek kókeıde turdy.
Sonyń aldynda, burynyraq, meniń ómirimde de kúrdeli oqıǵalar bolǵan edi. О́mir boıǵy jubaıym Habıba Áýbákirqyzy qaıtys bolyp, qatty qınalyp, daǵdaryp qalǵanmyn. Odan keıin, jyldan asa ýaqyt ótkende, dosym Rymǵalı men jubaıy Hadıshanyń dáneker bolýymen ekinshi ret otbasyn qurdym. Sáti túskende ekinshi jubaıym Ásııa Shákenqyzy adamgershiligi mol jaqsy adam bolyp kezdesti. Ekeýmizdiń Astanadaǵy shańyraq qurǵan shaǵyn toıymyzǵa Qoǵabaı sonda jubaıy Gúlbarshynmen Almatydan ádeıi ushyp jetken edi. Sóıtip, Ásııamen tanysqan. Rý surasa kelgende ekeýi de arǵyn rýynan bolyp shyqty. «Sen ózimniń qaryndasym ekensiń ǵoı. Baıqa, mynaý kýrstasym Bodaýbaev óte bir qıyn adam, eger renjitetin bolsa birden maǵan habarlas», – dep ázildegen. «Sen, Bolat, meniń qaryndasymdy renjitpe», dep kúle sóılep, taǵy shegelegen. Sodan keıin aramyzdaǵy burynnan bar otbasylyq dostyq qatynastarymyz burynǵysha jalǵasa túsken.
Bir ret Almatyǵa jolymyz túskende Qoǵabaı birden: «Eshqaıda barmaısyńdar, bizdiń úıde bolasyńdar», dep shegelep, vokzaldan qarsy alyp, Almatydaǵy jańadan salyp bitirgen úıine alyp ketken. Sol joly Qoǵabaı men Gúlbarshynnyń qonaǵy bolyp, umytylmas bir apta ýaqytty birge ótkizgenbiz. Endi mine...
Amerıkadan kelgen Qoǵabaıdy ushaqtan «jedel járdem» mashınasy qarsy alyp, aýrýhanaǵa alyp barypty. Sodan aıyǵa almaı, esil azamat, aqyry kóz jumypty. Biz de, jubaıym ekeýmiz, bul qaraly habardy estı sala, dosymyzdy aqtyq saparǵa shyǵaryp salaıyq dep, bógelmesten Almatyǵa ushtyq...
Qoǵabaı Astanada bizdiń úıde sońǵy ret bolǵanynda «Qazaq sharýasy» atty kitabyn syılap: «Bolat, Ásııa, jandarym, Sender meniń tiregimsińder ǵoı! Alla, adasyp qalmaıyq, bir birimizdi joǵaltpalyq. О́zderińniń Qoǵashtaryń. 14.04.2013 j. Astana» dep qoltańba jazyp bergen edi. Onyń bul sózderine ol kezde mán bermegenmin. Endi ǵana ol sol kezdiń ózinde-aq aıyqpas dertke shaldyqqanyn bilgen eken-aý, biraq bizge sezdirmegen eken-aý degen oı kelip otyr. Ol tilekke Alla jetkizbedi, ne shara.
Q.Sársekeev bizge, dostaryna ǵana emes, ózi janyńdaı súıgen halqyna kerek úlken júrekti, ushqyr oıly azamat edi. О́tken ǵasyrdyń basyndaǵy halqymyzdy ult bolyp uıysýǵa, el bolyp eńse kóterýge jumyldyrýǵa tyrysqan Alash kósemderi shyǵaryp, artynan jabylyp, toqtap qalǵan «Qazaq» gazetin 88 jyldan keıin, «Aıqap» jýrnalyn 99 jyldan keıin qaıta tiriltip, qaıta shyǵaryp, erlik jasaǵanyn joǵaryda aıttyq. Táýelsizdik alǵan memleketimizdi naǵyz ulttyq elge aınaldyrý, memlekettik tilimizdi óziniń laıyqty, mártebeli tuǵyryna qondyrý, ultymyzdyń rýhyn kóterip, táýelsizdigimizdiń irgetasyn bekite túsý jolynda kúsh-qýatyn da, qalamgerlik talantyn da, kásipkerlikpen, eńbegimen tapqan qarjy-qarajatyn da aıamaı jumsap, aqtyq demi taýsylǵansha jankeshtilikpen eńbek etti. Onyń qalamynan týǵan shyǵarmalary da, qoǵamymyzǵa sińirgen eńbegi de halqymyzdyń sanasynan, tarıhynan óshpesi anyq.
Dos týraly essemniń sońynda Qoǵabaı qaıta shyǵarǵan «Qazaq» gazeti men «Aıqap» jýrnalynyń sodan keıingi ǵumyry týraly da birer aýyz aıta ketkenim jón sııaqty. Qoǵabaı ómirden qaıtqan soń gazet pen jýrnaldyń shyǵýy toqtap qalǵan joq. Qoǵabaı jasaqtaǵan redaksııa ujymy Qoǵabaıdyń burynǵy orynbasary, Qoǵabaı qaıtqannan keıingi bas redaktory Jasulan Máýlenulynyń basshylyǵymen bul basylymdardyń odan ári shyǵa berýin qamtamasyz etti. Bul úshin olarǵa alǵystan basqa aıtarymyz joq. Tek 2016 jyly ǵana Qazaq ulttyq ýnıversıtetiniń rektory Ǵ.Mutanov jýrnaldy odan ári jalǵastyryp shyǵarý quqyǵyn ýnıversıtetke berýdi ótinip, surap aldy.
Bul eki basylym da búginge deıin halqymyzǵa qaltqysyz qyzmet etýmen keledi.
Bolat BODAÝBAI,
jazýshy, Qazaqstannyń eńbek sińirgen qaıratkeri,
Halyqaralyq «Alash» ádebı syılyǵynyń laýreaty
