Bishkekte ótip jatqan birinshi Eýrazııa ekonomıkalyq forýmǵa qatysqan qaýymdastyq basshysy aldymen, sońǵy eki jyldyń halyqaralyq saýdaǵa aýyr tıgenin atap ótti. Onyń aıtýynsha, pandemııa jáne álemdegi geosaıası jaǵdaı Qazaqstannyń syrtqy saýda belsendiligine áserin tıgizdi.
«Qytaı tarapynan shekteý sharalary bizdiń elimiz úshin úlken kedergi boldy. 2020 jyldan bastap Qazaqstan Úkimeti ótkizý beketteriniń jumysyn jaqsartý úshin Qytaı tarapymen dıalog júrgizdi. Qazir kóptegen kásiporyn qosymsha ótkizý naryqtaryn Iran, Qytaı, Vetnam jáne Mysyr arqyly qarastyryp jatyr. Atalǵan elder Qazaqstandy da eksport múmkindikterin damytý úshin áleýetti seriktes retinde qarastyryp otyr. Sońǵy eki jylda dál osy eldermen jańa pisken jáne keptirilgen jemis pen kókónis ónimderine, muzdatylǵan jáne salqyndatylǵan et pen tamaq ónimderiniń barlyq assortımentine qatysty saýdanyń ósýi baıqalady», dedi Aıjan Naýryzǵalıeva Eýrazııa ekonomıkalyq forýmda.
Sondaı-aq qaýymdastyq basshysy Qazaqstanda qant qyzylshasynyń sorttaryn aýdandastyrý baǵytynda qazaqstandyq jáne reseılik ǵalymdardyń birlesip jumys istep jatqanyn habarlady.
Spıkerdiń málimdeýinshe, Reseı Federasııasymen ekonomıkalyq baılanystardyń keńeıýine qaramastan, qazirgi ýaqytta jetkizý ýaqyty uzartyldy.
Aıta keteıik, búgin Bishkekte birinshi Eýrazııa ekonomıkalyq forým ótip jatyr. Atalǵan sharaǵa Qazaqstan atynan bir top delegasııa bardy.
